Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

SŌKSŌT 2 - LEKHARABU INTHENG (BSI)


Moses Intet

1 Hivalai hin Levi phunga mi inkhat in ama phunga nuhmei inkhat anuhmei sik aleiompui,

2 khana amanu’n sapa inkhat aleimatet pek. Amanu’n naite hme kaṭhaneng kha ahmu pha, thla 3 katlung aleithup a kae

3 tâk amanu’n pha kasôttak aleithup tor mak jo pha, peng vânga a’nsak rathi inkhat aloa tui hlut makna sik khe akanoa kae. Ashunga naite kha akhuma, tuipanga kahar inshâng kâra avada jo.

4 Khava naitepa unu khan inhlathima ahngâk a naite chunga khan heimo kachang tia a-en mathlip a kae.

5 Asōk-hei khan tuipanga anlôn lelelai khan reng sanu kha tui insi sik a tuidunga khan jōng kaṭumsuk a kae. Khavatak a amanu’n kahar inshâng hei kâra rathi kha aheihmua asōknu kha avamanhrut a kae.

6 Reng sanu khan amahlanga pase naitedông kha ahmu jo. Naite kha kaṭapsōt jo khana ama sik a reng sanu kha amalung inrim jo. “Hivahi Hebrew naite hei kâra inkhat kae,” ati.

7 Khava sōa a-unu khan, “Kei akase enga netui kavei sik a Hebrew nuhmei inkhat kava bek sik mo?” tia ader.

8 Amanu’n amasôna, “Ase pek roh,” ati. Khava jâra naipangnu kha kasea naitepa anutak kha ahongbek jo.

9 Reng sanu khan nuhmeinu hneng, “Hiva naitedông hi lo ina kei sik avei pek roh, avei man kapek sik che,” ati. Khang’khan amanu’n naitedông kha aloa avei jo.

10 Khava sōa, naitedông kha ahong khang sōt jo pha, amanu’n naite kha asa inkhat a akavei sik jo reng sanu hnenga aheiṭhōi jo. Amanu’n abinga inbek a, “Ke’n ama hi tui kâra inphut kakeisōt achang jâra arahming Moses kati sik,” ati.


Midi ram a Moses Tlânsōt

11 Moses kha ahonglen jo pha, ami Hebrewhei kaphâk sik a leikasōk a anmani kha rumhrat tak a ṭōn antamantlohei kha avahmu jo. Egypt pa inkhat in Moses mi Hebrew inkhat aleithat kha’m avahmu sōt jo.

12 Moses khan akimve kha a-enlea, tûte aka-en inthlip om mak jo ti amanhret pha, ama’n Egypt pa kha athat a nêrdi kâra akalōng kha avûm jo.

13 Ajîng kania inle nôk a kasea Hebrew mi 2 ale’nvōk hei avahmu hei, ama’n akaṭhepa hneng, “Heisa mo nang in na-Hebrew changpui kha navōk?” ati.

14 Mipa khan amasôn, “Tu’n mo nang kanchunga vai karôn sik leh ṭong katan sik a amanṭang che? Egypt mipa nathat kapōa ke’m nathat sik eng mo?” Khava sōa Moses kha kaṭi joa abinga inbek jo, “Kaṭōn leitlo kha mihe’n antahmu jo eng kae.”

15-16 Rengpa’n omchen kasōk kha athei pha Moses kha manthatna sik heia atlo jo, tâk Moses kha katlân joa Midi ram a va-omna sik a kase jo. Ni khat Moses khan tuikhur panga alei in-onglai Midianhei thempu, Jethro sanuhngâk 7 hei anpa kemōng leh kehei ta-in sik tui thlengkông mansipna sik a tui kathe kahong hei.

17 Tâk-kha kemōng kakhem ṭhahrep he’n sanuhngâk-hei kha anleihnongsōt hei. Khava pha Moses khan anmani hukna sik a leikasea khana anranhei kha tui aman in pek hei.

18 Anpa hneng an-inle pha, ama’n, “Heisa mo tuning chu hmatak ahe’nle chei?” tia ader hei.

19 “Egypt mi inkhat in kemōng kakhem alak-heia inphut ahuk ung, ama’n tui um athe pek ung khana kanranhei tui apek hei,” anti.

20 Ama’n asanuhngâk-hei hneng, “Ama kha khon mo ka-om?” tia ader hei. “Heisa mo mipa kha sona son nanta heidahlon? Se ruh, nibu sâkpui rih, vabe ruh,” ati.

21 Khang’khan Moses khan khanna om sik kha kahnōm jo, khana Jethro khan asanu Zipporah kha alômnu sik a apek jo,

22 amanu’n sapa inkhat aleinei pek. Moses khan abinga inbek a “Kei hiva ram a hin khōhme eng kae, khava jâra arahming hi Gershom tia kaphō sik,” ati.

23 Kum ṭhahrep sōa Egypt rengpa kha kathi jo, tâk Israelhei khachu ansōk changna inkōia ka-om ṭhak hei khana inṭangpui rangeia ka-ông ṭhak hei. Anka-ông rasa kha Pathen hneng katlunga,

24 an-inkōi rasa athei pek hei khana Abraham, Isaac leh Jacob hnenga ṭong intepna aleineipui hei kha ahong mandonsōt jo.

25 Ama’n Israelhei sōk changna kha ahmu jo khana anmani sik a amandon pek jo hei.

Komrem Revised Bible - LEKHARABU INTHENG

Copyright © Bible Society of India, 2015.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ