SŌKSŌT 19 - LEKHARABU INTHENG (BSI)

Sinai Tlânga Israelhei

^1-2 Israel mipui he’n Rephidim kha andahlon jo, Egypt anlei dahlonna thla 3 tlukna kani hma-inkei ning Sinai nêrdiram hong katlung jo hei. Sinai Tlâng panga khan anmani’n ṭhumhmun anleisyem,

³ Khana Moses khan Pathen leh inhmu sik a tlânga leikakea kae. Khana Rōngpu’n ama kha tlânga inphut abek a Jacob sōn Israelhei ahri pek sik hei kha amanthei:

⁴ “Rōngpu ke’n Egypt hei hnenga heimo kaleitlo khana marhmu khan ate kha amathla vânga ajōngpui kapōhrep a heikhonga mo kahong ṭhōi cheia hiva hmun kahong mathlung chei ti kha nangni’n nanhmu jo.

⁵ Tûn, nangni’n kaṭong pek hei nanjuia ka’ntepna kaṭha nannit inchu, nangni kamitak kha kachang sik chei.

⁶ kei hneng rōk a a’ntōksōt mipui kachang sik chei, khana nangni thempu kapōa kei nanirajen sik.”

⁷ Khang’khan Moses kha hong kaṭumsuk a mipui hlamkakeihei kha abek mantûp heia Rōngpu’n ṭong apek kha ahri pek jo hei.

⁸ Khava sōa mipui he’n inchun a anmasôna, “Rōngpu ṭonghri rakip kha keini’n kantlo sik,” anti khana khavakha Moses’n Rōngpu hneng thang akōi jo.

⁹ Rōngpu’n Moses hneng, “Mipui he’n nahnenga kaṭong hri kha antheia khana tuna inphut antaksenna sik che, kei sumtuk insâ inkhat a nahnenga kajōng sik eng,” ati. Mose’num mipuihei masônna kha Rōngpu hneng ahri jo,

¹⁰ khana Rōngpu’n ahnenga, “Mipuihei hneng se roh khana kamukna sik a tuning leh jîng hi insu inthengna hmang hei rasoh. Anpōn leh ander antasôp mantheng sik kae,

¹¹ khana atip a sik a’nrin dek sik hei kae. Khava kani ning khan kei Sinai Tlânga jōng kaṭumsuk sik eng, khan mipui he’n anhmuthei sik eng.

¹² Mipui he’n tlânglang anhei rakan makna sik akimvea mêrchîkna syem hei rasoh, khan chu tlâng kha anheikesōt makna sik a-emak leh ahnengbek um anheihnai makna sik kaṭhatak a manthei heiroh. Mi inkhat in ake aheichōn tet jo’nchu ama kha that nger sik kae;

¹³ tu inkhat in ama kha tônloa, hlung vâng a-emak leh the vâng kâp-hlon nger sik kae. Hiva dân hi mihring leh ran chunga hmang sik kae; anmani that nger sik hei kae. Tâk-kha pengkun ajō’nhring jo’nchu mipuihei khan tlâng ting antajōn sik kae,” ati.

¹⁴ Khava sōa Moses kha tlânga inphut jōng kaṭumsuk a, mipuihei hneng Pathen kamukna sik a anle’nrin dekna sik amanthei jo hei. Khava jâra anpōn leh ander anleisôp jo hei,

¹⁵ khana Moses’n anhnenga, “Ajîng atip ning khan inrin ruh, khava shunga khan nuhmei-pase hmun inchun mak ruh,” ati.

¹⁶ Ni 3 tluk ning jîngkâra khō inri, khō inphe atloa, sumtuk insâtak ahe’nze tlâng chunga khan inhmu jo, khan chu pengkun mahring inhnaktak inthei jo. Ṭhumhmuna mipui rakip kaṭi jo heia innok jo hei.

¹⁷ Moses’n Pathen inhmupui sik a aheiṭhōi hei, khana anmani tlângkea khan kangir jo hei.

¹⁸ Sinai Tlâng pumpui kha hmeikhu khan akatōm jo, ajârchu Rōngpu kha tlâng chunga khan hmeia akajōng kae. Hmeikhu kha ratap a akhu intung kapōa kakhu, mipui rakip anṭitrei jâra innoksō jo hei.

¹⁹ Pengkun mahring kha inhnak chet-chet hnâm jo. Moses’n ṭong ahri, Pathen in khō inri vâng ahei masônna kae.

²⁰ Rōngpu kha Sinai Tlâng chunga jōng kaṭuma, Moses kha chungting ahong kena sik aleibek a kae. Moses kha kakea

²¹ Rōngpu’n Moses hneng, “Ṭumsukloi inna mipuihei kha ramri a’nsyem kha anrakan makna sik khana kei anhong en makna sik eng gîkna pek heiroh; anmani’n khanga antlo’nchu mi katamtak kathi sik hei.

²² Thempuhei kapha’m kahnenga akahong hei kha anbing et a a’nsu intheng sik hei kae, achangmak inchu karâkna kapek sik hei kae,” ati.

²³ Moses’n Rōngpu hneng, “Mi-puihei hong kethei mak hei ning, ajârchu tlâng hi a’ntheng inkhat a lo sik a khana akimvea ramri syem sik a ṭong naleipek jo ung kae,” ati.

²⁴ Rōngpu’n amasôn, “Sesuk inna Aaron vaṭhōi roh. Tâk-kha kei hneng hongna sik a thempuhei leh mipuihei khan ramri kha heirakan hêrmak hei rasoh, achangmak inchu karâkna kapek sik hei kae.”

²⁵ Khava sōa Moses kha mipuihei hneng jōng kaṭumsuk a Rōngpu’n heimo aleihri kha aleimanthei jo hei.