SŌKSŌT 18 - LEKHARABU INTHENG (BSI)

Jethro’n Moses Avaphâk

¹ Pathen in Moses leh Israel mipuihei Egypt a inphut ahong ṭhōisōt hei pha aleitlo pek heirakip chunga Moses terpu Jethro, Midianhei thempu khan aleithei jo.

² Ama’n Moses nuhmei aleidahlon Zipporah kha aheiṭhōia Moses hnenga kahong,

³ khana amanu sapase Gershom leh Aliezer aheiṭhōisa hei. (Moses’n, “Kei ram hlop khōhmea leika-om eng,” atia asapa rahming kha Gershom aleiphōa kae.

⁴ Ama’n hi’m aleihri, “Egypt rengpa’n athat sik enga inphut Kapa Pathen khan a’nṭangpui enga, ahuk manhring eng,”; khava jâra sapa inkhat kha Eliezer tia aleiphō.)

⁵ Jethro khan Moses nuhmei khana asa pase 2 leh inṭhōia nêrdiram a Moses ṭhumhmun tlâng inthenga kahong jo,

⁶ Ama’n Moses hneng anmani hongna ṭong amanrôna kae,

⁷ khava jâra ama intōpui sik a Moses kha leikasesōt, ahmai kunga inkuna khana akabeng amajôp a kae. Khat leh khat antak damna chunga an-indertō leh Moses Pōn-inn shunga kahlut jo hei.

⁸ Israelhei hukna sik a Rōngpu’n Egypt rengpa leh mipuihei hnenga aleitlo rakip kha Moses’n Jethro hnenga aleihri pek jo.

⁹ Jethro khan khahei rakip kha athei pha aning kaṭha joa

¹⁰ ama’n ati, “Egypt rengpa leh amipui heia inphut nankahuksōt Rōngpu kha choi ka-ân ruh! Amihei ansōk changna inphut akahuksōt Rōngpu kha choi ka-ân ruh!

¹¹ Rōngpu hi pathen rakip nek a kalen chet ti hi tûnchu ke’n kamanhret jo, ajârchu Israelhei hi Egypt mipui he’n hnōisetak a antlo hei pha hiva ṭōn hi ama’n aleitlo pek hei kae.”

¹² Khava sōa Jethro’n Pathen hnenga ro-inthoina leh alak inthoina ahei choi jo; khana kamukna ṭōn inkhat kapōa inthoina thlai intheng kasa sik a Aaron leh Israel hlamkakeihei ama leh inṭhōia leikase hei.

Ṭongkatan Antakadei hei

¹³ Abân kania Moses kha mipuihei innâk-inse ṭong aleitana kae, khana jîngkâra inphut jân katlung kha le’nsaler.

¹⁴ Moses tatlo sik rakip kha Jethro’n ahmu pha, ṭongderna aleinei, “Mipuihei sik hiseng natlo hi heimo kae? Heisik a mo nabing rōk a ṭōn hiseng natlo, jîngkâra inphut jân katlung mipuihei nahnenga naman ngir heia ṭong antader che?”

¹⁵ Moses’n amasôn, “Ke’n hiva katlo nger sik kasōk ajârchu Pathen lungdo manhretna sik a mipuihei kha kahnenga akahong hei kae.

¹⁶ Mi 2 an-innâk pha, kahnenga kahong hei, ankâra khomo akadik ti ṭong katan, khana ke’n Pathen ṭongpek leh adân kamanthei hei.”

¹⁷ Khava sōa Jethro’n, “Khavakha akadik hlam a tlomak che.

¹⁸ Nang nabinga khana mipui he’m kachâm hêr sik jo chei. Nang rōk in natlo sik a hivahi katam rei.

¹⁹ Tûn ke’n akaṭha mantheina ṭhahrep nei che rong, khana Pathen in athlop sik che. Nang in Pathen hmaikunga mipui kahlâng nathlenga anṭong kasōk ahnenga namathlung sik hi akadik kae.

²⁰ Nang in Pathen ṭongpek-hei namanthei heia heikhonga mo aka-om sik hei khana heimo antatlo sik nahri manchên pek sik hei kae.

²¹ Kha leh inṭhōia nang in hlamkakei akarôntor sik mi ṭhahrep mipuihei hlamkakei sik a kadei heiroh: mi 1, 000 sik, 100 sik, 50; 10 hei sik a. Anmani kha Pathen kaṭit, taksenthei, khana sêrmarûk kasâk mak mi akachang sik hei kae.

²² Anmani kha mipui sik a ṭong katan ṭhak kha chang jo hei rasoh. Ṭong a’ntak hei seng chu nang hneng hong mathlung hei rasoh, tâk akabei hei seng khan anbinga ṭong anmathlâk thei sik. Khavakha nang sik kabei jôk sik jo, narôn kahrik anta’n sempui che achang jâra.

²³ Pathen ṭong pek che dungjuia, nang in hing’hin natlo’nchu, nabing sik a châmmak jo tin che, hiva mipuihei hi’m anṭong mathlâkna a-omsōa an-inn anjōn thei riri sik jo,” ati.

²⁴ Moses’n Jethro mantheina kha aleilo

²⁵ khana Israel rakip hei kâra akatlo tor sik aleikadei hei. Anmani kha mi 1, 000 sik, 100 sik, 50 sik, khana 10 hei sik a hlamkakei akadei jo hei.

²⁶ Anmani khan inthleng loa ṭongkatan inṭang jo hei, ṭong intak hei kha Moses hneng anhong mathlunga, ṭong kabei kasōk hei khachu anmani’n anleichai riri heia kae.

²⁷ Khava sōa Moses’n Jethro kha mathlâna chibei apek jo, khana Jethro kha a-innting inle jo.