SŌKSŌT 17 - LEKHARABU INTHENG (BSI)

Hlungpuia inphut Tui

¹ Rōngpu ṭongpek dungjuia Israel mipuihei kha Sin nêrdiram andahlona hmun inkhat a inphut inkhat a inthon lele heia kae. Anmani Rephidima ṭhumhmun ansyem, tâk khana khan tui in sik leiom mak.

² Anmani’n Moses hneng tlai makna anneia, “Tui in sik apek roh,” anti. Moses’n amasôn heia, “Heisa mo nangni’n masetna ṭong nanta hri? Heisik a mo Rōngpu chunga enmansinna nantanei?”

³ Tâk-kha mipuihei antui ahre rei jâra Moses anmaset ṭhak a kae. Anmani’n, “Heisa mo keini Egypt a inphut nahong ṭhōisōt ung? Keini, kansa leh kanranhei tuihrea thatna sik a mo kae?” anti.

⁴ Moses’n malung kana tak a Rōngpu hneng derna aneia, “Hiva mipuihei hi heimo kamanlo sik jo hei? Anmani’n kei hlung vâng denghlon sik a intluk jo hei,” ati.

⁵ Rōngpu’n Moses hneng, “Israelhei kâra hlamkakei ṭhahrep kadei heiroh, khana mipui hmating se ruh. Nang in Nile tuidung nalei vōkna khōnghre kha choi roh.

⁶ Kei nanhma a Sinai Tlânga hlungpui inkhat chunga leikangir sik eng. Hlungpui kha vō roh, khana inphut mipui ta-in sik tui hong kapût sik,” ati. Khang’khan Moses’n Israel hlamkakeihei hmaikunga aleitlo jo.

⁷ Ahmun rahming kha Massa leh Meriba, tia anleiphō hei, heijâra mo niti’nchu Israel sahe’n Rōngpu anhrimaset a, an-enmansinna, “Rōngpu kha nikâra aka-om mo, aka-om mak mo?” tia enmansinna anleineia kae.

Amalek-hei leh Anre Intuk

⁸ Amalek-hei kha kahong heia Rephidima Israelhei kha re anvasō jo hei.

⁹ Moses’n Joshua hneng, “Jînga Amalek-hei re intukpui sik a mi ṭhahrep kadei heiroh. Kei chu tlâng chunga Rōngpu’n choi roh ati eng khōnghre kha kamatua leikangir sik eng,” ati.

¹⁰ Joshua’n Moses ṭongpek ajuia kasea Amalek-hei kha re a’ntukpui jo hei. Khava lai khan Moses, Aaron khana Hur kase heia tlâng chunga kake heia kae.

¹¹ Moses’n akut 2 akalâng lai seng Israelhei kha kahrat hei, tâk akut kalâng kha ajōng mathlâk pha Amalek-hei kha leikahrat inphut ri hei.

¹² Moses’n akutbân akhâm jo pha Aaron leh Hur in Moses in-ongna sik hlung anvakadom pek a, ahnenga kangir heia akutbân hei kha kani atlâk mak hma seng anleikalâng puia kae.

¹³ Khang’khan Joshua’n Amalek-hei kha aleitor cher heia kae.

¹⁴ Khava sōa Moses hneng Rōng-pu’n, “Hiva retorna hi mandon ṭhakna sik a lekharabu mazet manhlut roh. Amalek-hei kha kasuk manhmang pet sik hei kae tia Joshua hneng hripek roh,” ati.

¹⁵ Moses’n maichâm inkhat asyema, khava rahming kha, “Rōngpu kha kapōnlek kae,” tia aphō jo.

¹⁶ Ama’n, “Rōngpu pōnlek kha kadom manshâng ruh! Rōngpu’n Amalek-hei kadōia ahei tik chenna re atuk manjôn sik kae,” ati.