SŌKSŌT 16 - LEKHARABU INTHENG (BSI)

Manna leh Vakanimhei

¹ Israel mipuihei kha Egypt andahlonsō thla hni changna ni 15 tluk ning Elim leh Sinai kâra Sin inti nêrdi ramhânga kahong jo hei.

² Khava nêrdiram a khan ankhengpet a Moses leh Aaron hnenga inphin heia

³ anhri, “Egypt ram a Rōngpu’n aleithat macheng ung inchu kanmadu jôk. Son chu in-ongna pha bekchu kanneia hme leh kantamadu thlai alak katamtak um kansâk. Tâk-kha nangni’n khana inphut hiva nêrdiram hin sâk lo inloa thatsō sik a nantaheiṭhōi ung kae.”

⁴ Rōngpu’n Moses hneng, “Tûn ke’n bōirōk a inphut bu nankhenga sik khō kasûr kapōa kajōng mathlâk pek sik chei. Mipuihei kha ani tina akasōk heia khava ninga antasâk khop sik anta’n hrut sik kae. Hing’hin anmani’n kaṭong antajui mo ti kha ka-enmansin sik hei.

⁵ Ni 6 tluk ning chu angaia antahrut aja 2 anta heichoia antamantluk sik kae,” ati.

⁶ Moses leh Aaron in Israel pumpui hei hneng, “Tuning khōhlei Egypt a inphut nanhong kaṭhōisōt kha Rōngpu kae, ti kha nanmanhret sik jo.

⁷ Ajîng jîngkâra Rōngpu a-omna vâr kadi rik-rak kha nanhmu sik. Nanhri masetna hei kha atheisō, kadik, ama chunga kae, ajârchu keini’n ama ṭongpek rōk kanhei tlosōt a kae,” ati.

⁸ Khava sōa Moses’n, “Khōhleia nantasâk sik hme anikapek sik leh jîngkâra nantluk hrepna sik a buhlom anikapek sik kha Rōngpu kae, ajârchu nangni’n heituk-hrep achunga hrimasetna nantanei kha atheisō jo. Keini chunga nanmaset ung pha kadiktak a chu, Rōngpu nanta maset kae,” ati.

⁹ Moses’n Aaron hneng, “Mipuihei kha Rōngpu hmaikunga anhonga anhong ngirna sik a hripek heiroh, ajârchu ama anhri masetna hei kha atheisō jo,” ati.

¹⁰ Aaron in mipuihei hneng ṭong ahri pek lai hei khan, anmani’n nêrdiramting anleihnget a khavatak a sumtuk chunga Rōngpu vâr kha heikavâr rik-rak joa kae.

¹¹ Rōngpu’n Moses hneng,

¹² “Ke’n Israelhei hrimasetna eng kathei jo. Khōhlei khō inthim hmuk a antasâk sik hme annei sik khana jîngkâra antamadu hrep buhlom anhmu sik. Khava sōa anmani’n Rōngpu kei hi an-Pathen eng kae tia anmanhret sik jo eng,” ati.

¹³ Khōhleia vakanim rup katamtak anṭhumhmun vena khan hong kajōng inhlut jo hei, jîngkâra anṭhumhmun kimvea radaitui katla jo.

¹⁴ Radai kahu kha asesō pha khava nêrdi chunga khan heimo inkhat a’nsâ leh a’npâk leika-om. Khavakha kavur di kapōa innema kae.

¹⁵ Khavakha Israel he’n anhmu pha heimo kae ti manhret mak hei, khat leh khat indertō hei. “Hivahi heimo kae,” inti hei. Moses’n anhnenga, “Hivahi Rōng-pu’n nantasâk sik a apek chei thlai kha kae.

¹⁶ Nangni mi inkhat et in atlukna sik, a-innshung milip a litre inhni-hni inhrut rasoh tia Rōngpu’n ṭong apek chei,” ati.

¹⁷ Israel he’n khanga an-inhrut, ṭhahrep inchu katam det a, alak inchu katlômdet akahrut ka-om hei.

¹⁸ Anheite pha, akatam kahrut hei ta kha’m inhlei dekmak, akatlôm ka-hrut hei ta kha’m tlâksam dekmak. Mi inkhat et in antlukna hrep sik a anleihrut a kae.

¹⁹ Moses’n anhnenga, “Mi inkhatbek in jînga sik tia khavakha a’nda mak sik kae,” ati.

²⁰ Tâk-kha mi ṭhahrep in Moses ṭong kha leirangei mak hei, anṭhensōt a anleida. Ajîng jîngkâra chu rahlung leikasip a kathua amarim kase ri jo, Moses kha anchunga ahnuk leikana ria kae.

²¹ Jîngkâr kataia mi rakip in antasâk katluk sik hrep kha anhrut a kae; kani ahonglum jo pha raleia antadahlon hei kha kajor ri jo hei.

²² Niruk tluk ning thlai kha chen 2, mi inkhat et sik a litre 4 anleihrut. Mipui hlamkakei rakip in Moses hneng kahong heia khavakha anhong manthei,

²³ khana ama’n anhnenga, “Jîng kani khi châmhngatna sik a’ntheng kani, ahnenga a’ntōksōt jo kae tia Rōngpu ṭongpek kae. Tuning hin nanta kachep sik kha kachep jo ruh khana nantakathei sik kha kathei jo ruh. A’nhlei rakip kha ṭhensōt sik khana jînga sik da sik kae,” atipek hei.

²⁴ Moses’n ṭong apek hei kapōa, a’nhlei kha jîng katlunga anleidasōt hei; khahei kha lei-apmak hei khana rahlung leihlut mak hei.

²⁵ Moses’n, “Hivahi tuning sâk jo ruh, ajârchu tuning kani hi Rōngpu hneng a’ntōksōt serning kani, Châmhngatna kae, khana ṭhumhmun tetlânga hmumak tin.

²⁶ Ni 6 shunga buhlom kha nanta’nhrut sik kae; tâk ni 7 ning, châmhngat ning khan chu buhlom kha inkhatbek om mak ning,” ati.

²⁷ Ni 7 ning khan mi ṭhahrep thlai kahrut sik a kasesōt hei, tâk heite vahmu mak heia kae.

²⁸ Khava sōa Rōngpu’n Moses hneng, “Heichen katlung mo namipui he’n kaṭong pek antalajui hnōm mak sik?

²⁹ Rōngpu ke’n, nanchâm inhngatna sik kani inkhat kapek chei kha mandon ruh, khava jâra ni 6 tluk ning khan ni 2 sik a nantasâk khopna sik thlai kapek ṭhak sik chei. Ni 7 ning chu mi rakip an-omna et a, a-inn dahlon loa aka-om sik hei kae,” ati.

³⁰ Khava jâra ni 7 ning mihe’n ṭōn leitlo mak hei.

³¹ Israel mipui he’n thlai kha manna anleiti. Khavakha akachek-hlak hmuchi inkhat kapō, khōihning vâng ansyem biscuite kapōa katuia kae.

³² Moses’n, “Egypt a inphut aheiṭhōisōt mea nêrdiram a sâk sik a thlai aleipek me kha nisōn he’n anhmu theina sik, Manna kha anmani hei sik a ṭhahrep daṭhen sik a Rōngpu’n ṭong apek me,” ati.

³³ Moses’n Aaron hneng, “Bephu inkhat lo ina, khava shunga manna kha litre 2 thōn roh, khavakha Rōngpu omna hmaikunga hnunga nisōn-nipâr hei tahong hmu sik a da roh,” ati.

³⁴ Rōngpu’n Moses hneng ṭong apek kapōa, pha kasôt da theina sik a Aaron in Intepna Bôm hmatak a khan bephu kha amatung jo.

³⁵ Israel sahe’n abânna kum 40 katlung, ankhō tlâkna Canaan ram antlung mak hma seng manna kha anleisâk a kae.

³⁶ (Khava neinâk tena kha antahmang kha litre 20 leh in-anga kae.)