SŌKSŌT 15 - LEKHARABU INTHENG (BSI)

Moses Hla

¹ Khava sōa Moses leh Israel he’n hiva hla hi Rōngpu hneng anleisak: “Ke’n Rōngpu hneng hla kasak sik, ajârchu ama’n akalûrtak retorna inkhat anei jo; ama’n shakorhei leh akatôrhei tuipui shunga ahlon manhlut hei.

² Rōngpu kha kei kahrung ratha kahrat kha kae; kei ani kahuk kha ama kae. Ama ka-Pathen kae, ama kachoi ka-ân sik, kapa Pathen kae, alenna chungchânga hla kasak sik.

³ Rōngpu kha rekahrat inkhat kae; Rōngpu hi ama rahming kae.

⁴ “Ama’n Egypt remi leh shakor gârihei Tuipui shunga ahlon manhlut hei; anṭōn karôn kaṭhapen hei kha Tuipui Kasen shunga amanchûm hei.

⁵ Tuipui inthûk kha amanvursi jo hei; tuithōia hlung kapōa kahlut jo hei,

⁶ “Nakut changting kha, Rōngpu, ratha aneia ṭit ka-om; inrepuihei kha navōk manhar sik hei.

⁷ Kalûrtak a natorna vâng khan na’nrepuihei kha nahlon maletsō jo hei; nahnuknat khan hmeia kasûk a anmani sapôt kapōa akâng manvâm hei.

⁸ Nang in tuipui kha nasêma tui kha inbunga ka-om; bang kapōa intlunhrek a leikangir; tuipui inthûknapen rajei kha akangar tak hongkachang.

⁹ Inrepuipa khan ati, ‘Ke’n kahnong sik hei khana kasur sik hei; Annei kamadudu kachoma kasem sik; Kachemjâm karadoksōt a antanei rakip kachom sik,’ ati.

¹⁰ Tâk-kha, Rōngpu, nakaphuk vōi khat sêm khan Egypt hei kha tui shunga akachûm jo hei; anmani ṭit ka-om tak tui shunga ngen kapōa kahlut jo hei.

¹¹ “Rōngpu pathenhei kâra tu mo nang kapō aka-om? Tu mo nang kapō inlaktak a a’ntheng aka-om? Tu’n mo nang tatlo kapō ṭōn-inlak leh ratha kaneitak akatlo tor?

¹² Nang in nakut changting nahei kalânga, khana ralei khan kan-inrepuihei amadesō hei.

¹³ Naṭong tepna najui mathlunga, mipui nahuksōt hei kha anhlam nakei hei; Naratha hratna vâng naram inthenga naṭhōi hei.

¹⁴ Jât he’n anthei jo, khana kaṭi heia innok hei; Philistihei kha ṭitna’n kasip jo hei.

¹⁵ Edom hlamkakeihei kaṭi jo hei; Moab a rekahrat hei kha innok jo hei; Canaan mihei anmalung katlasō jo.

¹⁶ Ṭitna leh lungdongna’n akabuksi jo hei. O Rōngpu, narathahrat kha anhmua, atloje omloa ṭitpum a kangir jo hei, namipui he’n hmating ansesōt mak hma seng– sōk changna a inphut namasōsōt mipuihei kha.

¹⁷ Anmani kha naṭhōi manhlut heia natlâng chunga naphunsōt hei, Rōngpu nang in na-inn sik a nakadei jo hmun a khan, nangkhet in nasak jo nabek-inna khan.

¹⁸ Rōngpu, nang kumleikōa reng kachang ṭhak sik che.”

Miriam Hla

¹⁹ Israel he’n tuipui shunga kachârbera hlam anleihro, tâk Egypt hei shakor gâri leh shakorhei khana akatôrhei tuipui shunga anhlut pha Rōngpu’n tui kha aheiṭhōi manchuna amakhusi jo hei.

²⁰ Aaron sernu sânkathem Miriam in khōngte aloa, nuhmei seng in anjuia khōngte akabena kalâm jo hei.

²¹ Miriam in hla asak pek hei, “Rōngpu manpâk hla sak ruh, ajârchu ama’n kalûrtak a torna anei jo; ama’n shakorhei leh ankatôr hei kha tui shunga ahlon manhlut jo hei.”

Tui Kakha

²² Khava sōa Moses’n Israel mipuihei kha Tuipui Kasen a inphut Shur nêrdiramhâng ting aṭhōi jo hei. Ni 3 katlung kase jo hei tâk tui leihmu mak hei.

²³ Khava pha Marah inti hmun a kahong jo hei, tâk khava hmun a tui kha kakha reia lei-in tor mak hei. Khava jâra arahming kha Marah antia kae.

²⁴ Mipui he’n Moses hneng ankakea a, “Heimo keini’n kanta in sik?” anti jo.

²⁵ Moses’n Rōngpu hneng malung kana tak a ader jo, khana Rōngpu’n thinghar inkhat amanhmu, khava thinghar kha tui shunga ahlon manhlut jo; khana tui kha inthei kachang joa kae. Khava hmun a khan Rōngpu’n anmani anhringna sik a chôndân inkhat aleipek hei khana khava vânga khan ama’num alei enmansin hei.

²⁶ Ama’n ahri, “Nangni’n kaṭong nanjuia ke’n kadik kati kha pui katluk a ṭōn vânga nantlosōt inchu, Egypt mihei chunga hrise kaleimasō inkhatbek vâng khan nangni karâkmak chei ning. Kei nan-indampa, Rōngpu eng kha kae.”

²⁷ Abâna anmani Elima hong katlung jo hei, khava hmun a khan tuiripût 12 ka-om hei khana kahno kung 70 leika-om hei; khava hmun a tui hnenga ṭhumhmun ansyem joa kae.