SŌKSŌT 11 - LEKHARABU INTHENG (BSI)

Moses’n Pasenai Salutir Ankathi sik Aphông

¹ Khava sōa Rōngpu’n Moses hneng, “Ke’n Egypt rengpa leh amipuihei chunga karâkna inkhat rōk kalajōngtir sik. Khava sō leh chu amansesōt sik jo chei. Kadiktak a hiva hmun a inphut nankhenga ahnong sōt sik jo chei.

² Tûnchu Israel mipuihei kha mi rakip in ansir-anpang hei hnenga sana, dangka leh hlung mankatam an-inderna sik a hripek heiroh,” ati.

³ Rōngpu’n Israelhei chunga Egypt he’n kajana aman pek hei. Kadiktak a, ṭōnkarônhei leh mi rakip in Moses kha mikalen hêr inkhat a anleimandon.

⁴ Khava sō leh Moses’n reng hneng, “Rōngpu’n ahri, jân ṭhangṭim vena Egypt ram katlung bit a kase sik eng,

⁵ khana reng hmun kahlō sik rengsapa inphut, sâng katak sōknu sapa katlung, Egypt asapa a’nte hma-inkei rakip kathi sik hei. Sehrat chete hma-inkei rakip he’m kathi sik hei,” ati.

⁶ Hmalai aleikasōk phungmak, khana akasōk nôk mak sik jo Egypt ram pumpuia inhnaktak a ṭapna kha kasōk sik.

⁷ Tâk-kha Israelhei leh anranhei hnenga khan chu ui inkhatbek inum hnukmak hei ning. Khava pha nangni’n Rōngpu Kei in Israelhei leh Egypt hei kâra khōiṭhenna katlo kha nanmanhret sik jo,” ati.

⁸ Moses’n hing’hin ṭongchaina anei, “Naṭōn karônhei seng kahnenga kahong sik hei, khana ankamuk sik eng, khana kami rakip ka’nṭhōi pet heia kansesōtna sik antangek sik eng kae. Khava sōa ke’n kadahlon sik jo chei.” Khava sōa Moses khan hnuk kana tak a reng kha adahlon jo.

⁹ Rōngpu’n Moses hneng aleihri, “Egypt ram a kaṭōn inlak katlosa theina sik a Rengpa’n naṭong hri arangei mak kha alamanjôn sik.”

¹⁰ Moses leh Aaron in hiseng ṭōn-inlak hi rengpa hmaikunga antlo jo, tâk Rōngpu’n amalung kha amanngarpek a ama’n Israelhei kha aram mandahlon mak heia kae.