SŌKSŌT 1 - LEKHARABU INTHENG (BSI)

Egypt a Israelhei Êngset a Antlona hei

¹ 14 Jacob leh inṭhōia Egypt a akase asahei, inkha-khat leh an-innshung et hei khachu

² Reuben, Simeon, Levi, Judah,

³ Issachar, Zebulun, Benjamin,

⁴ Dan, Naphtali, Gad leh Asher hei hi kae.

⁵ Jacob sōn leh pârhei kha ankhenga 70 hei kae. Asapa Joseph chu Egypt a aleika-omsa jo kae.

⁶ Phase dungjuia Joseph leh asōpuihei, khan chu anmani khang shunga mihei seng kathi jo hei,

⁷ tâk ansōn leh anpâr Israelhei khachu hong kapung hranghra heia hong kahrat jo hei, ansahei kha Egypt ram a leikasip jo hei.

⁸ Khava sōa, Egypt a khan Joseph inhret mak rengther inkhat in ratha ahongnei jo.

⁹ Ama’n amipuihei hneng, “Hiva Israelhei hi hong kapung heia hong kahrat jo hei, eini sik a ṭit ka-om tak kachang jo hei.

¹⁰ Re a-om pha eini dōitheina sik a ni’nrepuihei jôk an-inthōpui sik heia kha hiva ram a inphut katlânsōt thei hei. Khava jâra eini’n antlômna sik ahlam nijongsōt nger sik kae,” ati.

¹¹ Khava jâra ṭōn rahnak a mantlo heia anlungthim kha nam mathlâkna sik Egypt mihe’n anmani karâkna kapek sik a mi anda jo hei. Israel he’n rengpa sik Pithom leh Ramas khōpui inhnia neinâk bukna leh semsōtna hmun anleisyem pek.

¹² Khang’khan Egypt mihe’n Israel mihei kha inreng khōdeng katheitak a antlo chenna kapungsa chet-chet heia ram shung kha anhlōsō jo. Egypt hei khan Israelhei kha anhong ṭit jo hei

^13-14 khana êng kasetak a sōkṭōn anmantlo heia hringkhō inrimtak a anleida jo hei. An-inn sakna leh anhlei heia ṭōn anleimantlo hei, khana anmani’n anchunga maritna leinei mak hei.

¹⁵ Khava sōa Egypt rengpa’n, He-brew nupui he’n naite anmatet pha ankabôm sik thempi 2, Shiphra leh Pua hneng,

¹⁶ “Nangni’n Hebrew nupuihei nai matetna nan-inthōpui hei pha pase anmatet inchu that hei ruh, nuhmei anmatet inchu kahringa da hei ruh,” ati.

¹⁷ Tâk-kha khava thempi hei khan Pathen anṭit jâra rengpa ṭong kha leijui mak hei, pase naihei kha’m anlei manhring hei.

¹⁸ Khava pha rengpa khan thempi hei kha abek heia, “Heisa mo hinga nantatlo? Heisa mo pase naite hei kha kahringa nantada hei?” ati.

¹⁹ Anmani’n anmasôn, “Hebrew nuhmeihei chu Egypt nuhmei kapō changmak hei; anmani chu keini inkhat in ahmun kantlung mak hma kabeitak a anlei matet ri jo,” anti.

^20-21 Ajârchu thempi hei khan Pathen anṭit a, ama’n anhnenga ṭhatthei aleitlo pek hei khana anbing et innshung amanpung pek hei. Khana Israel innshunghei kha katamchet heia kangar chet jo hei.

²² Achaina rengpa’n ṭongpek inkhat amipui rakip hei hneng amasōa, “Hebrew pase naidông rakip chu Nile tuidunga hlon mathla hei ruh, tâk nuhmei naite rakip chu kahringa da hei ruh,” ati jo.