SAMUEL INKHATNA 9 - LEKHARABU INTHENG (BSI)

Saul in Samuel A’nhmupui

¹ Benjamin phunga Kish inti mikahao leh aṭong kase mi inkhat leika-om; ama Abiel sapa khan Zeror tupa kae, Aphia phungṭhen, Bekorath innshung mi kae

² Ama’n Saul inti, akhangdông laitak a ahme kaṭhatak sapa inkhat aleinei. Saul kha Israel shunga a’nshângdet leh hme kaṭhadet mi kae.

³ Kish shakōrtung ṭhahrep kalôn-invai hei, khava jâra saul hneng ati, “Sōk-hei kâra inkhat ṭhōi ina shakōrtung vajong roh.”

⁴ Anmani Ephraim ram shung leh Shalisha ramkei shunga kase hei, tâk hmumak hei; khava jâra Shaalim ramkei shunga khanga kase hei, tâk shakōrtung hei kha leihmu mak hei. Khava sōa Benjaminhei ramṭhen shunga kase nôk hei, tâk leihmu mak hei.

⁵ Zuph hei ramkei shunga anhong pha, Saul in asōkpa hneng ati, “Innting inle jo rih, akinchu kapa khan shakōrtung hei sik a khôk sakloa eini sik a amalung leikadong sik.”

⁶ Sōkpa khan amasôn, “Khō rangei roh! Hiva khōpui shunga hin mi intheng aṭong hri rakip adik jâra mihe’n antakaja hêr inkhat ka-om. Ahnenga se rih, shakōrtung hei kha khon mo nihmu sik amanthei tor khakhat sik me.”

⁷ Ahnenga nise’nchu, heimo nipek sik? Saul in ader. Nimârsha shunga thlai heite om mak jo, pek sik a heite neimak jo me, nilanei mo?”

⁸ Sōkpa khan amasôn, “Ke’n dangka kasintek inkhat kanei. Khavakha kapek sik, khana ranhei kha khon mo nivahmu sik hei amanthei sik me.”

^9-11 Saul in amasôn, “Mandonna kaṭhatak kae! Se jo rih.” Khang’khan mi inthengpa omna khōpuia khan kase jo hei. Khōpui hlam a tlâng kha anke pha, tui kathe sik a ahei kasōk nuhngâk ṭhahrep hei leh intō hei. Nuhngâk-hei kha ander hei, “Hmangtalâr kahmupa kha khōpui shunga ka-om mo?” (Khava lai chu sânkathemhei kha hmangtalâr kahmuhei tia anbek hei, tu inkhat in Pathen hnenga ṭong aderhnōm inchu, “Hmangtalâr kahmu hnenga se rih,” ati sik a kae.)

^12-13 “Ôk, ka-om,” tia nuhngâk he’n anmasôn hei. “Ama nangni hmadet a khan kase jo. Inranga nanse’nchu nanvaphâk man sik. Khōpui shunga nanhluttak leh nanvahmu sik. Tuningbia ama khōpui ajōng katlung kae, ajârchu mipuihei tlânga maichâma inthoina katōk sik a akase sik hei kae. Khōhmelâk hei kha ama inveiloa sâk leh in phut theimak hei, ajârchu inthoina kha ama’n mahâmṭhat apek masa sik kae. Tûn nangni nanse’nchu, tlânga thlai kasâk sik a ase mak hma nanvahmu sik,” anti.

¹⁴ Khava jâra Saul leh asōkpa kha khōpuiting kase jo hei, anhlut pha, Samuel kha kamukna hmun kajōn sik a anhnengting heikasôk jo.

¹⁵ Amak hma kania Rōngpu’n Samuel hneng aleiti,

¹⁶ “Ajîng kania hiva pha hin ke’n Benjamin phunga mi inkhat nahnenga kahei tir sik; ama kha kami Israelhei vai karôn sik a thai manthi roh, ama’n Philisti heia inphut ahuk sik hei kae. Kamihei inrengna kahmu jo khana inthōpuina sik a anpengna kathei jo.

¹⁷ Samuel in Saul kha aheihmulim leh, Rōngpu’n ahnenga ati, “Ke’n kahri pek che mipa kha hi kae. Ama’n kamihei vai arôn sik hei kae.”

¹⁸ Khava sōa Saul in kot hnenga aka-om Samuel hneng asora ader, “Khon mo hmangtalâr kahmupa kha aka-om, amanthei roh?”

¹⁹ Samuel in amasôn, “Hmangtalâr kahmu kha kei eng kae. Kamukna hmun ting hma kei inna se ruh. Tuning nan-inhnia kei leh bu nisâksap sik kae. Ajînga jîngkâra nanṭongder rakip kamasôn sik chei khana nanhlam kamanhro sik chei.

²⁰ Ni 3 ale’nhmang jo hei shakōrtung hei sik a nanmalung mandong mak ruh; khahei kha inhmudek jo hei. Tâk-kha Israel mipui he’n khangtuk hrep a antamadu mi kha tu mo? Khavakha nang che kae, nang leh napa innshung kae.”

²¹ Saul in amasôn, “Kei Benjamin phung mi eng kae, kei innshung chu phunghei kâra akasinpen kae. Kha achang inchu heisa mo kahnenga khanga nati?”

²² Khava sōa Samuel in Saul leh asōkpa kha innden kalen inkhat shunga aṭhōi heia khōhmehei, 30 kapō a’n-ong hei, omna dokhâng hmating hmun apek hei.

²³ Samuel in bu kasōng hnenga ati, “Ke’n ahlop a da roh tia kapek che hmetlang inkhat kha heichoi roh.”

²⁴ Khana bu kasōngpa khan shakea inphut kadeisōt hmetlang kha ahei choia Saul hmaikunga ada jo. Samuel in ati, “Enroh, nang sik a hmetlang kha hin ka-om jo. Kha sâk roh. Ke’n kabek hei mipuihei hi leh hiva pha sâk sik a ke’n kadapek che kae.” Khang’khan Saul in khava ning Samuel leh asâksap jo.

²⁵ Anmani kamukna hmun a inphut khōpuia heikaṭum jo hei, Saul sik a rakhum inkhat Innphu chunga ansyempek,

²⁶ ama khana khan kaje jo. Jîngkâr hmatak Samuel in Saul kha innphu chunga abek a, “Thō roh, nahlam a kamanse sik jo che,” ati. Saul kha kathōi jo, ama leh Samuel kha inṭhōi heia hlam anjui.

Samuel in Saul kha Vaikarôn inkhat a Thai Akano

²⁷ Khōpui hmor kha anheitlung pha, Samuel in Saul hnenga ati, “Sōkpa kha nihma ting aleisena sik manthei roh.” Sōkpa kha asesōa, Samuel in ahri manjōm a ati, “Hin bongkhat inhnga roh, Pathen in heimo ati kamanthei sik che.”