SAMUEL INKHATNA 7 - LEKHARABU INTHENG (BSI)

¹ Khava jâra Kiriath Jearima mipuihei khan Rōngpu intepna Bôm anvaloa tlâng chunga ka-om Abinadab intipa inna anda jo. Asapa Eleazar kha aka-ensui sik a ansuk mantheng jo.

Samuel in Israel Vai Arôn

² Rōngpu Intepna Bôm kha Kiriath Jearima pha kasôttak leika-om, kum 20 kapō. Hiva shung senga Israel he’n Rōngpu hnenga inthōpuina anleider.

³ Samuel in Israel mipuihei hneng ati, “Nangni’n Rōngpu hneng nanmalung pumpuia nanhong inle’nchu ram hlop hei pathenhei leh pathennu Astarte hei kha nantahlonsōt sik hei kae. Nantaksa pumpui Rōngpu hnenga a’npek sōt sik chei kae khana ama rōk nantakamuk sik kae, khana ama’n Philistihei ratha neina inphut ahuksōt sik chei.”

⁴ Achang jâra anlim Baal leh Astarte anhlonsōt heia Rōngpu rōk kha ankamuk jo.

⁵ Khava sōa Samuel in Israel rakip Mizpah a intûpna sik a aleibek hei, hinga ati, “Khana khan ke’n nangni sik a Rōngpu hneng kader sik.

⁶ Khan chu anmani ankhenga Mizpah a intûp jo hei. Tui ajing anthea Rōngpu hnenga inthoina inkhat a anleibun khana khava ning sûn nilun bu anhngōia kae. Anmani’n anti, Rōngpu dōina keini kaset jo ung.” (Hivahi Mizpah a Israelhei kâra innâk-insena, Samuel in intōk inchamna aleitlona kha kae.)

⁷ Israel he’n Mizpah a intûp jo hei ti ṭong Philisti he’n anthei pha, Philisti reng 5 he’n anmihei leh anmani kabuhlu sik a he’nphut jo hei. Khavakha antheia Israel he’n leikaṭi hei,

⁸ khana Samuel hneng anti, “Rōngpu ni-Pathen hnenga derṭhak inna om roh, Philisti heia inphut anihûkna sik me.”

⁹ Samuel in kemōng tere inkhat athat a Rōngpu hneng inthoina inkhat a apum a aleiro jo. Khava sōa Israelhei inthōpuina sik a Rōngpu hneng aleider, khana Rōngpu’n aderna kha aleimasôn.

¹⁰ Inthoina kha Samuel in aleitōklai, Philisti he’n ankabuhlu sik a hmating anheinam; tâk khava laitak khan Rōngpu’n anchunga khō ajōng manphepek jo hei. Anmani pui katluk a inhmak jo heia ṭitpum a katlânsōt jo hei.

¹¹ Israelhei kha Mizpah inphut hma annama Philistihei kha Bethkar katlunga anhnong hei, hlamdunga anleithat jo hei.

¹² Khava sōa Samuel in hlung inkhat aloa, Mizpah leh Shen kâra aleimatung, khana ati, “Heirakip a Rōngpu’n a’nthōpui me” – khana ama’n “Ebenezer”, Inthōpuina Hlung tia aphō jo.

¹³ Khang’khan Philistihei kha antor jo hei, khana, Samuel ahring lai seng Israelhei chunga re antlo makna sik a Rōngpu’n aleikhâr hei.

¹⁴ Ekron leh Gath kâra Philisti he’n anta leihlō khōpui kalen rakip Israelhei hneng anpek male jo hei, khang’khan Israel in anramṭhen seng chu anchensō nôk jo. Khana Israel leh Canaanhei kâr a’m mōngna leika-oma kae.

¹⁵ Samuel in ahring lai seng Israel vai aleirôn hei.

¹⁶ Akum katai Bethel, Gilgal leh Mizpah heia leikasea innâk-inse alei mancham heia kae.

¹⁷ Khava sōa Rama a a-inna inle sik, khana kha’num ṭongkatan inṭang sik. Rama a khan Rōngpu hneng maichâm inkhat aleisyem.