SAMUEL INKHATNA 5 - LEKHARABU INTHENG (BSI)

Philistihei kâra Intepna Bôm

¹ Intepna Bôm kha Philisti he’n ansursōa, Ebenezer a inphut ankhōpui Ashadod a ankadom jo,

² an-pathen Dagon bek-inna anchoi manhlut jo, khana syemlim hnenga khan anda jo.

³ Abâna jîngkâr hmatak Ashdod a mipuihei khan Dagon limsyem kha Rōngpu Intepna Bôm hmaikunga katlua ahmai raleia abea aka-om kha anleihmu. Khava jâra anmani’n ankadoma ahmun a anda nôk jo.

⁴ Abân jîngkâr hmatak a limsyem kha Intepna Bôm hmaikunga akatlu kha anvahmu nôk jo. Hiva pha hinchu alu leh adâr hei katlek heia kot hnenga leika-om hei; atakpum rōk kha intônmak.

⁵ (Khava jâra tuning katlung Dagon thempuhei leh Ashdod a kamukna kanei rakip in khava hmun kha rakanna anneia anke vâng chōnphung mak hei.)

⁶ Rōngpu’n Ashdod mihei kha kakhôktak a akarâk heia ṭitna aleipek hei. Anmani leh ramṭhen kimvea aka-om hei kha a’nhnak khōihli amannat heia akarâk hei.

⁷ Akasōk kha anhmu pha, anti, “Israel Pathen in eini leh ni-pathen Dagon akarâk me kae. Hinahin pha kasôttak Intepna Bôm hi dator mak min.”

⁸ Khava jâra tirle antira, Philisti reng 5 hei anbek mantûp jo hei khana ander hei, “Israelhei Pathen Intepna Bôm chunga heimo nitlo sik jo?” Anmani’n anmasôn, “Gath a vada ruh,” khava jâra Philistihei khōpui inkhat Gath a anvada jo.

⁹ Tâk khana khan atlung pha, Rōngpu’n khōpui kha’m akarâk a ṭit-inpirna kalentak kasōk jo. Khōihli nat vânga akarâk jo hei, khōpui shunga khangdông leh kater, mi rakip anrôn jo.

¹⁰ Khava jâra Intepna Bôm kha Philistihei khōpui inkhat Ekrona antir jo; tâk khana khan atlung pha, mipuihei kha ka-ông heia, “Einihei thatsōna sik a, Israelhei Pathen Intepna Bôm kha hin anheichoi jo!” anti.

¹¹ Khava jâra ave nôk a Philisti renghei inbek heia anti, “Eini leh ni-innshung athatsō makna sik me, Israelhei Intepna Bôm kha a-omna tlit a khan vada jo ruh.” Pathen in inhnaktak a akarâk hei jâra khōpui shunga khan ṭit-inpirna kasip jo.

¹² Akathimak hei kha’num khōihli anrôna mipuihei khan an-pathenhei hnenga inthōpuina sik ka-ông jo heia kae.