SAMUEL INKHATNA 4 - LEKHARABU INTHENG (BSI)

Intepna Bôm Antasur

¹ Khava pha Philisti he’n Israelhei chunga re tlo sik a intûp hei, achang jâra Israel he’n anmani re katuk sik a kasesōt jo hei. Israel he’n Ebenezer a rephōr anleimatung khana Philisti he’n Aphek a anmatung.

² Philisti he’n antuk manphut jo hei, rekahrat a an-intuksōa Israelhei kha antor jo hei khana rehmun a pase 4,000 kapō anleithat jo hei.

³ Akahring senghei khan rephōra anhong inle pha, Israel hlamkakei he’n anti, “Tuning heisa mo Rōngpu’n Philistihei amantor me? Se me sona Shiloa Rōngpu Intepna Bôm kha valo rih, ama’n eini asepui mea nikadōi heia inphut anihukna sik me tlo rih.”

⁴ Khava jâra Shiloa tlângva antir heia mathla kanei ranhringhei chunga antamantung Chunghnung Rōngpu Intepna Bôm kha anvalo jo.

⁵ Intepna Bôm kha aheitlung jo pha, Israelhei kha inpâk a ka-ông heia ralei kapha le’nnok a kae.

⁶ Philisti he’n anka-ông kha antheia anti, “Hebrew rephōra aka-ông heirakip so rangei ruh! Heijo mo kae? Hebrewhei rephōra Rōngpu Intepna Bôm kha heikatlung jo ti anmanhret pha,

⁷ kaṭi jo heia anti, “Anrephōr shunga pathen inkhat kahong jo! Eini inhmang sik jo me! Hmalai khan hinghiva hi nihnenga lasōktet mak!

⁸ Khava ratha kanei pathen heia inphut tu’n mo ahuk tor sik me? Nêrdiram a Egypt hei kathat pathenhei kha anmani kha kae!

⁹ Philistihei, re tloa kahrâng song ruh! Pase kasōk a re tuk ruh, achangmak inchu, anmani eini sōk aleikachang hei kapōa, Hebrewhei sōk akachang sik me kae. Khava jâra pase kasōk a re tuk ruh!”

¹⁰ Philisti he’n rahnak a re antuk a, an-innting akatlân inhlut Israelhei kha antor jo hei. Mi katamtak anleithat hei: Israel remi 30,000 anleithat hei.

¹¹ Pathen Intepna Bôm kha ansur jo, khana Eli sapahei, Hophni leh Phinehas anthat jo hei.

Eli thina

¹² Benjamin phunga mi inkhat rehmun a inphut Shiloa katlâna khava ning bât khan katlung jo. Amalung inrengna kha malârna, apōn ader akei hlera alu chunga vaiphin ada a kae.

¹³ Eli kha hlampanga in-ongna chunga intunga, Intepna Bôm chungchânga atheihnōm hêra ahmit kasanga alei-en. Mipa khan ṭong kha khōpui pumpuia ahri manthanga, mi rakip in anṭit lôtna leika-ông jo hei.

¹⁴ Eli khan mihei rasa kachōr kha atheia ader hei, “Hiva rasa inhnok hi heimo kae?” Mipa khan hripek sik a inrangtak a Eli hneng kase.

¹⁵ (Eli kha akum 98 jo kae khana ahmit hmuhêr mak jo.)

¹⁶ Mipa khan ati, “Kei rehmun a inphut ahong katlânsōt eng kae khana tuning hiva katlunga ahong katlân eng kae.” Eli’n ader, “Kasapa, heimo akachang jo?”

¹⁷ Ṭong karônpa khan amasôn, “Israelhei kha Philisti heia inphut katlânsōt jo hei; hivahi eini sik a ṭit ka-om tak mitorna me kha kae! Khava chunga, nasapa Hophni leh Phinehas anthat jo hei, khana Pathen Intepna Bôm ansur jo!”

¹⁸ Mipa khan Intepna Bôm kha ahrisōt pha, Eli kha kot hnenga a’ntungna inphut akahnungting inlet-hlon jo. Ama kha kater hêr jo khana atak katur hêr, a’nletna khan arîng asuk thlek a kathi jo. Ama kha Israelhei hlamkakei kum 40 le’nṭanga kae.

Phinehas nuhmei Hmeithainu Thina

¹⁹ Eli hmōinu, Phinehas nuhmei, kha nai aleivon, asanei sik pha hong kahnai jo. Amanu khan Pathen Intepna Bôm ansur jo khana aterpu leh apuise anthat jo hei ti ṭong athei pha, khava phatak a khan anaiha kaphu inphut a sa amatet jo.

²⁰ Amanu kha akathi sik a a-om jo pha, nai inneinu khan ahnenga ati, “Inngam roh! Sapa inkhat nanei jo!” Tâk amanu’n heite donmak khana masôn mak jo.

²¹ Amanu’n naidông kha Ichabod tia aphō khava tina khachu, “Pathen lûrna’n Israel adahlon jo”, Intepna Bôm surna leh aterpu leh apuise thina kha atina kae jo.

²² “Pathen lûrna’n Israel adahlon jo, ajârchu Pathen Intepna Bôm kha ansur jo,” amanu’n ati.