SAMUEL INKHATNA 27 - LEKHARABU INTHENG (BSI)

David in Philistihei kâra Aka-om

¹ David in abinga ati, “Ni khat chu Saul in alathat sik eng. Kei sik a akaṭhapen chu Philistine a akatlân sik eng hi kae. Khanachu Saul in Israel ram shunga ajōngmak jo ning, inhukthei sik jo eng.”

² Khava jâra David leh ami 600 hei kha inrangtak a Gath rengpa Maoch sapa Achish hneng kase jo hei.

³ David leh amihei an-innkōhei leh khana khan ka-om jo hei. David in anuhmei 2, Jezreel khōa Ahinoam leh Carmel khōa Nabal renghmeinu Abigail leh khan ka-om jo hei.

⁴ David kha Gath khōa katlân jo ti Saul in athei pha, abâna jōng nôk mak jo.

⁵ David in Achish hneng ahri, “Nang kaṭhōn nachang inchu, ka-omna sik khōpui kasin inkhat nei rong. Apu, na-innpui shunga nang leh omsap sik hi rangei mak.”

⁶ Khava jâra Achish in Ziklag khōpui kha apek jo; khava jâra tuning katlunga Ziklag hi Judah reng he’n anchanthang joa kae.

⁷ Philisti ram shunga David kha thla 6 ka-oma kae.

⁸ Khava pha shunga khan David leh ami he’n Geshur, Girzi leh Amalek mihei khava ramkeia pha kasôttak aka-om jo hei chunga re anleisō ri hei. Shur katlunga anramshung kha ansō hei, Egypt hlam senadung katlunga

⁹ nuhmei, pase, kemōng, sehrat, shakōrtung, sharîngsei anthat hei khana pōn leh der anchom hei. Khava sōa ama Achish hneng hong inle nôk,

¹⁰ ama’n ader, “Tûnlai khonting mo rerûk a akase chei?” David in amasôn, “Judah thlâng tinga ramṭhen a khana Jerahmeel phungṭhen hei ram a khana Kenhei omna ramheia kae.”

¹¹ David in nuhmei-pase athatpet hei, ama leh ami he’n heimo antatlo khet kha tûte inkhat in Gath a anse leh anvahri makna sik a aleitlo jo. Philisti ram shunga a-omlai seng David tatlo khachu hivahi kae.

¹² Tâk-kha Achish in David kha ataksen khana abinga ati, “Ama hi ami Israel he’n anhōt hêr jo. Khava jâra ahringkhō katlung bit a kei arazen sik jo enga kae.”