SAMUEL INKHATNA 26 - LEKHARABU INTHENG (BSI)

David in Saul Hringkhō Avea Aṭhensōt

¹ Ziph a mi ṭhahrep in Gibeah ka-om Saul hneng kahong heia Judea ramhâng hmora Hachila tlânga David inthup a ka-om tia anvahri pek.

² Saul kha David kajonga Ziph ramhânga Israel remi kahrângpen 3,000 aṭhōi heia khava phatak a kase jo,

³ Hachila Tlâng chunga hlam sira arephōr amatung jo. David chu ramthip shunga laka-om hi, Saul in ama kajonga kahong jo ti hi athei pha,

⁴ aka-en inthlip mi atir heia Saul kha khana a-omtakbak kha amanhret jo.

⁵ Inranga ama kasea Saul leh Ner sapa Abner, Saul remihei hlamkakei jena kha a-enmanchên jo. Saul kha rephōr shunga kaje, ami he’n ankakebit a kae.

⁶ David in Hit mi Ahimelech leh Joab naipa Abishai (Annu chu Zeruiah) hneng ader hei, “Nankâra tu mo Saul rephōra akase sik me?” Abishai in amasôn, “Kei kase sik eng.”

⁷ Khan chu khava jân a khan David leh Abishai in Saul rephōr shunga kahlut jo hei khana Saul in rephōr alaitak a kajea akasei kha aluthlōn tinga raleia aphun a kae. Abner leh remihei kha akimvea kaje hei.

⁸ Abishai in David hneng ati, “Tuning jân Pathen in nang inrepui mi naratha neina thōia ada jo. Akasei mama hin sun hlon eng sona vōi khat rōk a raleia manbek jo rong, vōi 2 kadôtmak ning!”

⁹ Tâk David in ati, “Nasuk manset mak sik kae! Rōngpu’n akadeisōt reng akasukset mi kha ama’n akarâk nger sik kae.”

¹⁰ David in ahri manjōm a, “Akahring Rōngpu rahminga, ke’n kamanhret khachu Rōngpu khet in Saul hi athat sik kae, athi pha ahong katluk joa angaia thina a-emak leh re shunga thina aratō sik kae.

¹¹ Rōngpu’n reng amanṭang inkhat kha ke’n kasukset sik hi Rōngpu’n hnōm mak a kae! Akasei leh atuipeng rōk hei hi inlo me sona se jo rih.”

¹² Khana David in kasei leh tuipeng rōk kha Saul luthlōna inphut aloa, ama leh Abishai kha kasōk jo hei. Omchen kasōk kha tûte inkhat in hmumak hei, manhret mak hei khana thōisōt mak hei, anmani ankhenga kaje hnger hei, ajârchu Rōngpu’n kahōia jena kha ankhenga apek hei.

¹³ Khana David in phaicham rekhat ting arakana tlâng lera kase jo, inhuk theina akahlajap a,

¹⁴ khana Saul remi rup-hei leh Abner hneng hong ka-ông jo, “Abner! Nathei eng mo?” Abner in ader, “Aka-ônga reng inthōisōt chu tu mo?”

¹⁵ David in amasôn, “Abner, nang Israel shunga akalenpen che changmak mo? Khan chu heisa mo nakapu, reng kha nahrung mak? Tûntak khan mi ṭhahrep nakapupa kathat sik a rephōra kahlut jo hei.

¹⁶ Abner, naṭōnhlam kaṭha tlomak che! Akahring Rōngpu rahminga intep eng khachu nangni nankhenga akathipet sik a rahōi kasōk cheia kae, ajârchu Rōngpu’n renga amatung, nankapupa kha hrungmak cheia kae. Enruh! Rengpa kasei kha khon mo aka-om? Aluthlōna atuipeng kha khon mo aka-om?”

¹⁷ Saul in David karesō kha amanhret a ader, “David, nang che mo, kasapa?” David in amasôn, “Ôk, Reng kalûr.”

¹⁸ Khana ama’n amanjōmsa, “Apu, heisa mo nasōkpa nahnong ṭhak eng? Heimo katlo jo? Hei ṭhena mo katlo jo?

¹⁹ Reng kalûr, ke’n kahri sik hi rangei roh. Rōngpu’n nang hi kei kadōia amanṭang che achang inchu, inthoina inkhat tōk roh, amalung thlengna anei sik; mihring tatlo achang inchu Rōngpu hâksêrna kha anchunga tlung rasoh. Ajârchu kei hi Rōngpu ram a inphut, jât-hlop pathenhei rōk kamuk theina ram a anhnongsōt enga kae.

²⁰ Rōngpu ram a inphut inkârtak a, jât-hlop hei ram a athat mak hei rasoh. Heisa mo Israel reng in kei kapō uihrik kathat a akahong? Heisa mo ram va kapōa kei ahnong sik eng?

²¹ Saul in amasôn, “Ke’n kaṭhe jo. Kasapa David, hong inle roh! Avea sukset mak jo che ning, ajârchu tuning jân kahringkhō nahuk jo enga kae. Kei mikamotak kachang jo eng! Ke’n ṭit ka-om tak ṭōn katlo jo!”

²² David in amasôn, “Hina nakasei ka-om, Reng Kalûr. Nami inkhat hin hong sona va’nlo rasoh.

²³ Rōngpu’n aṭong kajuihei leh akadik-hei kha tloman apek hei. Tuning kei ratha neina thōia aleida jo che kae, tâk-kha Rōngpu’n reng amanṭang nang kha sukset mak che eng.

²⁴ Tuning nahringkhō kahukpek che kapōa, Rōngpu’n khava kapōhrep a tlo rasoh khana bōina rakip a amasō rasoh!”

²⁵ Saul in David hneng ati, “Pathen in vâng pek che rasoh, kasapa! Natlona rakip a hme nasō sik!” Khanga David kha ahlam ahro jo, khana Saul in a-inna inle jo.