SAMUEL INKHATNA 22 - LEKHARABU INTHENG (BSI)

Thempuhei Antathat hei

¹ David kha Gath khōpuia inphut katlâna, Adullam khōpui hnenga hlungkōk a vaka-om jo. Asopui hei leh a-innkō he’n khana aka-om kha anthei pha, ahnenga kahong jo hei.

² De inrimna kathok rakip, bat leh râk kaneihei, malung akatlaimak hei, pase 400 ahnenga kase hei, anmani hlamkakeia inṭang jo.

³ David kha Moab ram a Mizpah a khanga kase, khana Moab rengpa hneng avahri, “Pathen in kei sik a heimo amantluk pek eng ti kamanhret sōt mak kârseng lungsettak a kanu leh kapahei nahnenga hong hei sona hin aman om pek hei roh.”

⁴ Khang’khan David in anu leh apahei kha Moab rengpa hnenga adahlon jo hei, khur kōk shunga a-omlai seng anu leh apahei kha Moab rengpa hneng leika-om jo hei.

⁵ Khava pha sânkathem Gad kha David hneng kahonga ahri, “Hin om mak roh, Judah ram a tûntak se jo roh.” Khava jâra David kasōksōt a Hereth ratu thōia kase jo.

⁶ Ni khat chu Saul kha Gibeah tlângbung chunga tamarisk thingkung thōia in-ong, akut a kasei achoia aṭōn karôn rakip akimvea kangir hei. David leh aloihei kha an-omna anhmu jo ti ṭong Saul hneng anhri pek,

⁷ aṭōn karônhei hneng ati, “Rangei ruh, Benjamin mihei! David in nangni nankhenga hlei leh vomhrui rahōn apek sik cheia khana aremi kâra ṭōnkarôn amanchang sik chei tia nantamandon mo?

⁸ Khava sik jâra mo kei kadōia a’ntluk chei? Kasapa khet leh David inmattōna atanei kha tûte inkhat in ahri pek mak chei. Tûte inkhat in amandon mak chei khana kamihei kâra inkhat, David in tûnlai hin kei thatna sik a ahlam a-en leh kasapa’n mathokna anei kha tûte inkhat in amanthei mak chei!”

⁹ Doeg intipa kha Saul ṭōnpui karônhei kâra khan kangir, ama’n ati, “Nob khōa David kha Ahitub sapa Ahimelech hneng kavaselai kahmu.

¹⁰ David in heimo atlo sik kha Ahimelech in Rōngpu hnenga aderpek, khava sōa David kha thlai ahlek apek a Philisti mi Goliath chemjâm kha apek jo.”

¹¹ Khava jâra Reng Saul in Ahimelech leh a-innshung mi rakip, Nob a thempu kachang hei kha’m, ava manbek jo hei, khana anmani kahong hei.

¹² Saul in Ahimelech hneng ati, “Rangei roh, Ahimelech!” Ama’n amasôn, “Apu, nasōk ka-om eng.”

¹³ Saul in ader, “Heisa mo nang leh David in kei kadōia a’ntluk chei? Heisa mo ahnenga bu leh chemjâm napek, khana ama sik a Pathen derna nanei pek? Tûnchu kei adōi jo eng khana kei thatna sik a ahlam ajong jo!”

¹⁴ Ahimelech in amasôn, “David hi ṭong kajuipen ṭōnkarôn inkhat nachen kha kae! Ama hi nakamâk, nakahrung raja-hlamkakei, khana reng-innpui shunga mi rakip in kajana antanei mi kae.

¹⁵ Kadik, ama sik a ke’n Pathen hneng ṭongderna kanei, khana hivahi ahma kakei changmak. Nang kadōia intlukna chungchânga chu, Reng kalûr nang in kei leh ka-innshung tûte inkhat in nantadem mak sik ung kae. Hiva chungchânga kei heite manhret mak eng!”

¹⁶ Rengpa’n ati, “Ahimelech, nang leh na-innshung mi rakip akathi sik chei kae.”

¹⁷ Khan chu ahnenga kangira ka-om remihei hneng, “Rōngpu thempuhei hi that hei ruh! David leh marûk a ṭōn anmantluk khana atlânsōt kha anmanhret pet inum amanthei mak hei.” Tâk akahngâk remi he’n Rōngpu thempuhei thatna sik a ankut kalâng hnōm mak heia kae.

¹⁸ Khava jâra Saul in Doeg hneng, “Nang in that hei roh!” ati–Deog in athatpet jo hei. Khava ning thempu von zakkō kabong invona rahōi kasōk thempu 85 athat hei.

¹⁹ Saul in thempuhei khōpui Nob a aka-om rakip thatna sik a ṭong apeksa jo hei: nuhmei-pase, naipang leh naite, sehrat, shakōrtung leh kemōng, ankhenga anthatpet hei.

²⁰ Tâk-kha Ahimelech sahei kâra inkhat Abiathar kha leikatlânsōt man a David hneng kahlut jo.

²¹ Heikhonga mo Saul in Rōngpu thempu athat hei kha ahri pek.

²² David in ahnenga ati, “Khava ning Doeg kha khana khan kahmu pha, Saul hneng avahri nger sik tia kamanhret. Achang jâra na-innshung mi rakip thina kha kei jâra kae.

²³ Kahnenga om roh, ṭimak roh. Saul in nang leh kei athat hnōm me kae, khana kei leh om hin nang inhukna kachang sik.”