SAMUEL INKHATNA 21 - LEKHARABU INTHENG (BSI)

Saul hnenga inphut David Tlânsōt

¹ David kha Nob khōa Ahimelech thempu hneng kase jo. Ahimelech kha innok pum a David inhmupui sik heikasōk khana ati, “Heisik a mo nabing rōk a hin akahong che?”

² David in amasôn, “Rengpa ṭōn inkhat a akahong eng kae.” Ahei tir enga katlo sik ṭōn hi tûte inkhat in manhret mak hei rasoh ati. Kamihei chu, hmun inkhat a inhmu rih tia kahri pek jo hei.

³ Khan chu tûn nang in heimo sâk thei nanei? Buhlom pheng 5 leh heikhat nanei kha apek roh.”

⁴ Thempu’n ati, “Ke’n buhlom sâkngai chu neimak eng, a’ntheng buhlom rōk kanei; namihei tûnlai nuhmei leh a’ntônmak anchang inchu nansâk thei sik.”

⁵ David in amasôn, “Ôk, inchunpui mak hei. Ṭōn heikhat a kansōksōt inum, kamihei beklanga inthenga aka-om ṭhak hei kae; tûnlaia ṭōn kakhôktak a kanhonglai hinchu heituk-hrep a a’nthengdet sik hei mo!”

⁶ Khava jâra thempu’n buhlom intheng kha David apek jo; ajârchu anei buhlom kha Pathen hnenga a’ntōksōt rōk kha kae, khavakha a’ntheng dokhânga inphut anloa buhlom ather vâng anthleng jo.

⁷ (Khava ning khan Saul ran ka-ensuihei hlamkakei, Edoma Doeg intipa kha beklanga ṭōn inkhat jâra khana khan leika-om.)

⁸ David in Ahimelech hneng ati, “Kasei nanei mo achangmak leh chemjâm napek tor sik eng mo? Rengpa ṭongpek eng khan ahei manhnot rei enga, kachemjâm leh kahmangchâk alak-hei jongsōt tor mak jo eng.”

⁹ Ahimelech in amasôn, “Elah Phaichama nang in naleithat Philisti mipa Goliath chemjâm kha kanei, zakkō katôi dana kahnungting pōn vânga a’nzea inda. Namadu’n chu inlo roh, hina aka-om hmangchâk chu kharōk kha kae.” David in ati, “Chu apek roh. Khona achang innum akaṭhachet chemjâm om mak!”

¹⁰ Khan chu David kha Saul a inphut katlânsōt a, kasesōt jo, Gath a Reng Achish hnenga kase jo.

¹¹ Rengpa sōk he’n Achish hneng anti, “Hiva mi hi anrama reng kachang jo David kha changmak a mo? Nuhmei he’n anlâm pum a ama chungchânga hla ansâk a, ‘Saul in lishing lishing athat, David in lishing sôm sôm athat,’ tia anhla phōpa kha hiva mi hi kae.”

¹² Anṭonghri hei khan David malung atôn jo, khana Reng Achish kha aṭit hêr joa kae.

¹³ Khava jâra anmani’n ahnenga anhong pha David in mikamotak inkhat a inhlem jo khana hei-inkhat athemna sik anmanchu pha a’nvet kapōa inhlemsak jo, khōpui kekot heia akarit heia ama kha ahner hmea achihrui amankai heia kae.

¹⁴ Khava jâra Achish khan aṭōn karônhei hneng ahri, “Enruh! Mi hi a’nvet kae! Heisa mo kahnenga nantahong ṭhōi?

¹⁵ Ke’n mi invet katluk a kaneimak a mo? Heisa mo ahlop inkhat amona ṭōn vânga kei inhângna kapek sik a ka-innshunga nantahong ṭhōi?”