SAMUEL INKHATNA 2 - LEKHARABU INTHENG (BSI)

Hannah Derna

¹ Hannah’n ader: “Rōngpu’n kamalung hi inpâkna amansip; Ama ṭōntlo pekna eng jâra heituk a a’npâk jo eng mo! Kaka-en kadahei kamanuisō hei; Pathen in a’nthōpui eng jâra heituk a akahōi jo eng mo!

² “Rōngpu kapōa a’ntheng inkhatbek om mak; ama kapō om hêrmak; Ni-Pathen kapōa ani kahrung alak om mak.

³ Inlensak a ṭong inhnak nahri kha hai roh; Na’nlensakna ṭong kha sip manti roh. Ajârchu Rōngpu kha a’nhretsō Pathen kae, Ama’n mihei ṭōntlo rakip ṭong atan a kae.

⁴ Rekahrat remihei thepui kha ador thlek, tâk akatlasam amanhrat.

⁵ Pha khat a von kakhop hei kha tûnchu sâk hmuna sik a ratha hlona kase hei, tâk von kaṭâm hei kha anvon ṭâm nôk mak jo. Akaching nuhmei khan sa 7 anei jo, Sa katamtak kaneinu kha abinga andahlon jo.

⁶ Rōngpu’n mi athat hei, khana amanhring nôk hei; ama’n mihei kathirama atir hei, khana aheiṭhōi male nôk hei.

⁷ Mi ṭhahrep sara amanchang hei; khana alak amanhao hei, ṭhahrep amansinsak hei, alak in amanlen hei.

⁸ Sarahei kha vaiphin kâra inphut akei mathō hei akaneimak hei kha an-inrengna inphut akadom manshâng hei. rengsahei kâra aman omsap hei, kajana hmun a aman ong hei. Raleichung kunghmun kha Rōngpu ta kae; khahei chunga ralei hi asak kae.

⁹ “Ama’n taksenthei kachang mihei hringkhō kha ahrung, tâk mikaṭhamak-hei khachu inthim thōia inhmanghei; mi inkhat hi arathahrat vânga hme asō changmak.

¹⁰ Rōngpu kadōihei kha suk manhmang kachang sik hei; marvâna inphut anmani kadôia khōjang jōng kapōk sik. Rōngpu’n vânhnōi pumpui ṭong atan sik, arengpa kha ratha apek sik, areng kadei kha torna amannei sik.”

¹¹ Khava sōa Elkana kha Rama a a-inna inle jo, tâk naipang Samuel khachu Shiloa ka-om jo khana Eli thempu thōia Rōngpu arazen jo.

Eli Sapahei

¹² Eli sapahei kha malung kadikmak hei kae. anmani Rōngpu kha heite donmak hei

¹³ khana mipuihei hneng thempu ngekna chôndânhei chungchânga donmak hei. Khava kanek a, mi inkhat in inthoina ran atōk pha, thempu sōkpa khan makhe abâk 3 indo kha ahei choi sik. Hme kha ansōng lai khan,

¹⁴ an sōngna be shunga khan makhe kha aphum sik, makhe tahonglōksōt seng kha thempu chen akachang sik kae. Khang’khan Israel mi Shiloa inthoina sik a akahong rakip hei kha hinga antatlo hei kae.

¹⁵ Hiva chung nôk a, athai kha anlosōt a anro mak hma, thempu sōkpa kha kahonga inthoina katōkpa hneng, “Thempu taro sik a hme ajing apek roh; ama’n nasōngsa hme chu rahlâng mak ning, hme kahring rōk amadu,” ati sik.

¹⁶ Mipa khan, “Ahlam kasōk kha tlo hi me sona, athai kha ahma inkeia ro hi rih; khava sōa namadu kha inlo roh,” ati’nchu, thempu sōkpa khan hinga ati sik, “Changmak! Tûn apek roh! Napek mak eng inchu, rumhrat a kalo sik!”

¹⁷ Hiva Eli sahei setna kha Rōngpu hmit-enna kakhôk hêr jo, ajârchu Rōngpu hnenga inthoina kha khanga kajana neiloa anleitloa kae.

Samuel Shiloa A-om

¹⁸ Khava lai khan Samuel naipang khan a’ntheng hruipōn zakkō kasei akeia, Rōngpu razenna aleitlo manjôn.

¹⁹ Akumtina anu’n zakkō kasei, akasin inkhat et akaṭhui pek a, akumtina inthoina katōk sik a apuise ajui pha ahnenga achoi pek sik.

²⁰ Khava sōa, Eli’n Elkana leh anuhmei kha vâng apek sik hei, khana Elkana hneng ati sik, “Nangni’n sapa inkhat nantōksōt jo, ama kahlânga hiva nuhmeia inphut Rōngpu’n sa alak pek che rasoh.” Khava sōa anmani an-innting inle nôk hei.

²¹ Rōngpu’n Hannah kha mahâmṭhat apek a sapa 3 leh sanu 2 aneisa nôk hei. Naipang Samuel chu Rōngpu ṭōn tlona shunga hong kalen jo.

Eli Khana Asapahei

²² Eli kha tûnchu kater hêr jo. Asapa he’n Israelhei chunga antatlo rakip khana anmani khan Rōngpu Pōn-inn kot kunga ṭōnkatlo nuhmeihei antajepui hei ṭong kha athei ṭhak jo.

²³ Khava jâra anhnenga ati, “Heisa mo hinga nantatlo? Nanṭōn tlo akaṭhamak kha mi rakip in anhri pek jo eng.

²⁴ Kasahei, hivahi hai ruh! Rōngpu mihe’n antahri manthang hi mater ka-om tak kae!

²⁵ Mi inkhat in mi inkhat kadôia aset jo’nchu Pathen in ahrung thei; tâk Rōngpu dōina aset jo’nchu tu’n mo ahrung sik?” Tâk anpa ṭonghri kha rangei dekmak hei, ajârchu Rōngpu’n anmani kha that sik a amantluk jo hei.

²⁶ Naipang Samuel kha hong kakhang jo khana mihring leh Rōngpu lungsetna achen jo.

Eli Innshung Kadōia Sânsōtna

²⁷ Rōngpua inphut sânkathem inkhat in ṭong hi ahei rôna Eli hneng kahonga ahri: “Nanpusōn Aaron leh a-innshung he’n Egypt rengpa sōk anchang lai, Aaron hnenga kei kabinga lei-inlâr jo eng.

²⁸ Israel phung rakip a inphut ama innshung hi kei thempu sik a kakadei kae, kamaichâm inzen sik a, marim katui karo sik a, zakkō katôi invona kei hneng ṭong ani kader sik a. Khana maichâm chunga ro-inthoina inphut chen inkhat an-indana sik a ratha kapek hei kae.

²⁹ Ke’n kamipuihei inthoina leh tōkna kangek hei chunga heisik a mo phâmrai setpuma nanta-enhla. Eli, kami he’n kei hneng inthoina anta heitōk akaṭhapen antaṭhen vânga heisa mo nasahei navei manthai heia, nang in kei kanek a nasahei namanlûr jôk hei?

³⁰ Rōngpu Israel Pathen ke’n nang innshung leh nang phungṭhen he’n kumkhōa thempu akachang cheia kei nanta razen sik eng kae tia le’ntep eng. Tâk tûnchu kahri hi kae, khavakha nei hêrmak jo ning. Khava kanek a, kei kajana anikapek hei kha kakaja sik hei, anikahnōise hei kha kahnōise sik hei.

³¹ Rangei roh, ke’n nang leh nang phungṭhen shunga rether rakip kathatna sik a pha kahong jo, na-inn shunga pase inkhatbek katerbera om mak hei ning.

³² Nang inreng sik che khana Israel mi alak-hei hnenga kapek sik hei vâng rakip kha thangset pum a na-en sik, tâk nang innshung mi inkhatbek in kater a hringmak jo hei ning.

³³ Achang innum, nasōn inkhat chu kahringa kada sik, ama’n thempu inkhat a arazen sik eng. Tâk ama ahmit hong kacho sik khana a’nhōrna rakip inhmangpet sik, khana nang sōn alak-hei kha innâk-insea kathisō pet sik hei.

³⁴ Nasapa 2 hei Hophni leh Phinehas kha ni khat a anthi pha, khava khan kaṭong hri rakip hongkadik sik tia nahnenga amalâr sik.

³⁵ Kei ṭong kajui sik leh kamantlo hnōm rakip akatlosōt sik thempu inkhat kakadeisōt sik. Ke’n kakadeisōt rengpa ângshunga pha rakip a a’nzen sik a, asōn apâr kapek sik.

³⁶ Nang sōn akahring seng he’n khava thempu hneng kase sik hei khana sêr leh bu anvader sik, sâk thei heikhat hmun a sik a thempu kha inthōpui che rung anti sik.”