SAMUEL INKHATNA 18 - LEKHARABU INTHENG (BSI)

¹ Saul leh David inbekna inchai jo. Khava kahnunga, Saul sapa Jonathan khan David inthloppui sik a amaduhêr jo khana abinga a’nlungset kapōa aheilungset jo.

² Khava ninga inphut Saul in David kha a-ompui jo, a-inna manlemak jo.

³ Khang’khan Jonathan in David kha alungset hêr jâra aheitik a inthloppui sik a intepna anei jo.

⁴ Ama’n apōn ahliksōt a David hneng apek jo, inṭhōia arevon, achemjâm, asâi khana akhōnkir apeksa jo.

⁵ Saul in David atirna rakip a hmesōna anei, khava jâra Saul in David kha remihei chunga rehlam kakeia amanṭang. Hivahin Saul ṭōnkarôn leh mi rakip katlai jo hei.

David Chunga Saul Thangset

⁶ David in Goliath athatsōa ahon’le pha khan remi he’n inna anho’nle pha, Israel khōpui rakip a inphut nuhmei heikasōk heia Reng Saul hlam intōpui sik a heikasōk hei. Inpâkna hla ansak, kalâm hei, sumkutben leh ṭingṭang anmanhring hei.

⁷ Anmani inpâkna nitna khan nuhmei he’n hinga hla ansak, “Saul in lishing lishing athat, David in lishing sôm sôm athat.”

⁸ Saul in hivahi rangei hnōm mak khana ahnuk kana hêr jo. Ama’n ati, “David sik a lishing sôm sôm, kei sik a lishing lishing rōk anhrisōt. Abâna anmani’n inthlop puina anneia ama hi reng anmanchang sik jo!”

⁹ Khava jâra khava ninga inphut David chunga thangsetna leh hlamrin môna anei jo.

¹⁰ Ajîng kania khan Pathena inphut rathla kaṭhamak khan Saul chunga jōng kachu nôk joa innshunga a’nvet kapōa hnuk kasetak a kaṭong jo. David in anilak a atlori kapōa aserângdâr akarôt a kae, khana Saul in akasei akut a amatu.

¹¹ Saul in abinga ahri, “Ke’n David hi bang leh kakakho rabek sik,” tia amandon, khana vōi 2 kasei vâng akakho tâk David inthoksōt ṭhak a kae.

¹² Saul in David kha aleiṭit ajârchu Rōngpu’n Saul adahlona David a-ompui joa kae.

¹³ Khava jâra Saul in David kha atirsōt jo khana remi lishing hlamkakeia ada jo. David in amihei kha rehmun a aṭhōi hei

¹⁴ khana atlona rakip a hme asō ajârchu Rōngpu’n a’nṭang puia kae.

¹⁵ Saul in David hmesōna hi amanhret khana aṭitsa chet jo.

¹⁶ Tâk-kha Israel leh Judah mi rakip in David anlungset, ajârchu ama hi hmesōna kanei hlamkakei kae.

David in Saul Sanu A-ompui

¹⁷ Khava sōa Saul in David hneng ahri, “Hin kasanu upanu Merab ka-om, nanuhmei sik a kapek sik che, amirōkchu remi kahrâng leh ṭong kajui inkhat a narazen sik eng kae, khana Rōngpu re akakōn sik che kae.” (Hinga achang inchu Philisti he’n David kha anthat sik jo, ama khet in that mak jo ning, tia Saul in amandon).

¹⁸ David in amasôn, “Kei reng kamâk akachang sik eng hi, kei hi tu eng mo, khana ka-innshung hi heimo akae a?” ati.

¹⁹ Tâk-kha Merab kha David hneng pekna sik ahnai jo pha, Mehola mi Adriel intipa hnenga anpek jo.

²⁰ Kha’num, Saul sanu Michal kha David leh inlungset hei, khavakha Saul in athei pha le’npâk a kae.

²¹ Saul in amandon, “Michal hi David kapek sik, ama man-ôkna chânga kahmang sik, khana Philisti he’n anthat sik.” Khava jâra Saul in vōi 2 changna David hneng ati, “Nang kei kamâk akachang sik che kae.” ati.

²² Aṭōn karônhei kha binga David hneng hinga amanti hei: “Rengpa’n nachunga katlai khana aṭōn karôn rakip in anmadu che; tûn hi asanu ompuina sik a pha kaṭha jo kae.”

²³ Khava jâra anmani’n David hneng khanga anvati jo, ama’n amasôn heia ati, “Reng kamâk chang sik kha kaja ka-om tak inkhat kae, kei kapō sara leh hnemna kase inkhat sik a chu kalenrei.”

²⁴ David ṭonghri kha aṭōn karôn he’n Saul hneng anmanthei jo,

²⁵ Saul in David hnenga hripek sik kha anhnenga hinga ṭong apek hei: “Rengpa’n nanga inphut hmōinu man amadu khachu, aremi kathihei phuhlōna Philisti akathihei vun 100 heitan sik kha kae.” (Hivahi Philisti he’n David kha anthatna sik a Saul mantlukna kae.)

²⁶ Saul ṭonghri kha aṭōn karôn he’n David hneng anhri pek jo, David um reng kamâk chang sik kha amandona inpâk jo, luhôngna kani atluk mak hma,

²⁷ David leh ami he’n kakōn heia, Philisti mi 200 anvathat hei. Ama’n anvuntan kha rengpa hneng achoia akamâk achang theina sik a, khaseng kha ama tathat a anteipet jo. Khava jâra Saul in asanu Michal kha David hnenga nuhmei sik a apek sik kasōk jo.

²⁸ Rōngpu’n David kha a’nṭhōipui jo khana asanu Michal in David kha alungset jo ti hi Saul in inthengtak a amanhret jo.

²⁹ Khava jâra Saul in David kha aṭit chet jo khana ama ahring lai seng a’nrepui kachang jo.

³⁰ Philisti remihei kahong heia re intuk hei, tâk Saul ṭōnkarôn ralak-hei kanek a David in hme asōpek a kae. Khava jâra David kha arahming inthang hêr jo.