SAMUEL INKHATNA 17 - LEKHARABU INTHENG (BSI)

Goliath in Israelhei Indōina sik Achōi hei

¹ Philistihei re sik a Judah hei khōpui inkhat Socoh a intûp hei; Socoh leh Azekah kâra ka-om Ephes Dammim inti hmun inkhat a anrephōr anmatung.

² Saul leh Israel he’n intûp heia Elah Phaichama rephōr anmatung, khana khan Philistihei re tukna sik intluk hei.

³ Philistihei kha tlâng inkhat chunga injôk jo hei, khana inkhat ting khan Israelhei ka-om hei, ankâra phaicham inkhat ka-om.

⁴ Goliath inti mi inkhat Gath khōpuia inphut Israelhei re katuk sik a Philistihei rephōra inphut heikasōk. Ama hi metre 3 kapō inshâng

⁵ kilograme 57 kapō kahrik sum-êng revon khana sum-êng lukhu inkhat leh invona kae.

⁶ Akehei kha sum-êng vânga akatōm hei khana sum-êng kasei sung adâr chunga achoi.

⁷ Akasei kha pōnkhôngna thingtlōnhei kapōa insâ, akasei thirhmur kha kilograme 7 kapō kahrik. aphō indoma remi inkhat ahmating kase.

⁸ Goliath kha kangira Israelhei hneng ka-ônga ati, “Nangni khan heimo nantatlo, re sik a a’njôk chei? Kei Philisti eng kae, nangni’n Saul sōk chei kae. Kei kadōi sik a nanmi inkhat kadei ruh.

⁹ ama’n ator enga athat eng inchu, keini nansōk kachang sik ung; tâk ke’n katora kathat inchu, nangni kansōk akachang sik chei kae.

¹⁰ Hinahin tûn ke’n Israel remihei re kachōi chei kae. Kei kadōi sik a mi inkhat nantakadei sik a kangam chei!”

¹¹ Saul leh ami he’n hivahi anthei pha, anṭit hêr jo.

Saul Rephōra David Aka-om

¹² David kha Judah ram a Bethlehema inphut Ephrathah mi, Jesse sapa kae. Jesse kha sapa 8 anei hei, khana Saul in reng achanglai ama chu leikater hêr jo.

¹³ Asapa upa 3 hei chu Saul leh re katlo sik a inṭhōi hei. Upapen kha Eliab, abân kha Abinadab khana inthumna kha Shammah kae.

¹⁴ David kha matlumpen kae, khana unai upapen 3 hei khan Saul leh anleiom lai,

¹⁵ David kha apa kemōnghei kakhem sik a Bethlehema kâklalak leh inlea kae.

¹⁶ Goliath in Israelhei kha jîngkâr leh khōhlei katai ni 40 aleichoi heia kae.

¹⁷ Ni khat chu Jesse’n David hnenga ati, “Hiva hmuchi katheisa hi kilograme 10 leh buhlom 10 hi choi roh, rephōra na-uhei hneng inranga choi hei roh.

¹⁸ Khana hiva sene inha hei hi rehlam kakeipa hnenga pek roh. Heikhonga mo na-uhei kha aka-om hei va-en hei roh khana anmani navahmu hei leh kahōia anka-om manhretna sik heimo inkhat heichoi male roh.

¹⁹ Reng Saul leh na-uhei, khana Israel mi rakip Elah Phaichama Philistihei re katuk sik a ka-om hei.”

²⁰ David kha ajînga jîngkâr hmatak kathōia, kemōnghei ka-ensui sik a mi inkhat adahlona, thlai kha aloa, Jesse’n ahri pek kapōa kase jo. Ama kha, Israel he’n re khō-ông antloa, re injôkna hmun a ansesōt laitak, rephōra khan vakatlung jo.

²¹ Philistihei leh Israel remihei kha re intuk sik a, inhngettō heia anhmuna kangir jo hei.

²² David khan thlai kha sâk leh in katintapa hneng adahlona, rehmun a katlân inhlut jo, a-uhei hneng kasea, heikhonga mo aka-om hei ader hei.

²³ Anmani hneng ṭong ahrilai, Goliath kha hmating kahonga hma aleitlo kapōa Israelhei kha binga re tukna sik a achōi jo hei. Aṭong kha David in athei jo.

²⁴ Israel he’n Goliath kha anhmu pha, anṭit a katlân jo hei.

²⁵ Anmani khat leh khat inbek heia, “Ama so enruh! Ama chōina me so rangei ruh! Ama kathat hnenga Reng Saul in inpâkman kalentak apek sik a intep jo; khana rengpa’n ahnenga asanu a-ompui sik a apeksa sik khana apahei innshung in ramsêrṭhei antapek sik rangei mak jo,” anti.

²⁶ David in ahnenga ka-om mihei hneng ader hei, “Hiva Philisti kathat leh hiva inzakna inphut Israelhei insōsōt mipa khan heimo achen sik? Hei-hei chang rasoh, akahring Pathen remihei in-erpui khōvel Philisti hi tu mo kae?”

²⁷ Anmani’n Goliath kathat mipa hneng tloman pek sik kha anleimanthei.

²⁸ David in mihei hneng ahri kha, a-u upapen, Eliab in athei jo. David hneng ahnuk kana a ati, “Khan heimo natlo? Ramhânga ka-om nakemōnghei kha tu’n mo a-ensui hei? Nang mikajana inhret mak naipang, nang do? Re intuk ka-ena nang akahong che changmak a!”

²⁹ “Tûna khan ke’n heimo katlo?” David in amasôn. “Ṭongder kapha yamak mo?”

³⁰ Mi inkhat hnengting inhea aṭong mama kha aleider, ader hei katai, ṭong masôn mama kha aleithei.

³¹ Mi ṭhahrep in David ṭonghri kha antheia, Saul hneng anvahri pek a Saul in abek jo.

³² David in Saul hneng ati, “Kaja ka-om Reng, tu inkhat in hiva Philisti hi aṭitmak sik kae! Kei kase sik eng khana ka’nrepui sik.”

³³ Saul in amasôn, “Changmak. Heikhonga mo ama na’nrepui tor sik? Nang chu naipangtek che kae, khana ama chu ahringkhō shunga hin remi ahong kae jo kae!”

³⁴ David in amasôn, “Kaja ka-om Reng, ke’n kapa kemōnghei kakhemhei. Shabakkai leh kavom he’n kemōngte antlen pha rakip a,

³⁵ kahnonga, kabuhlu, khana kemōngte kha kahuksōt. Khana shabakkai leh kavom khan ahnget eng inchu, ahrak kakarâk a kavōk hlon ri.

³⁶ Ke’n shabakkai leh kavom kathat hei, khava kapōa hiva akahring Pathen remihei in-erpui Philisti hnenga hin katlo sik.

³⁷ Rōngpu’n shabakkai leh kavom heia inphut ahuk eng; ama’n hiva Philisti hinna inphut ahuk sik eng.” Saul in amasôn, “Kaṭha jo. Se roh, Rōngpu’n ompui che rasoh.”

³⁸ Ama’n arevon kha David hneng a’nvon sik a apek: sum-êng lukhu, David luchunga amankhu khana ôm-mârsha amanhak a kae.

³⁹ David in Saul chemjâm kha arevon chunga amansura sesōt sik a atlo, tâk setor mak, ajârchu ama’n khahei kha hmangphung mak a kae. Ama’n Saul hneng ati, “Hihei hi leh chu re tlotor mak ning. Kei hmangphung mak eng.” Khava jâra alosōtpet jo hei.

⁴⁰ Ama’n akemōng khemna sung khana hlung inpumneng 5 kava dunga inphut aloa amârsa shunga athōn hei. Dengna saiphi amantluk a Goliath inhmupui sik kase jo.

David in Goliath Ator

⁴¹ Philisti mipa kha, ahma a aphō kachoipa kha kasea, David langting heihong aphut jo. Ama heikahnai det-det jo,

⁴² khan David kha kaṭha ahei-en pha, hmumasina anei jo, ajârchu ama kha a’njen neng, hme kaṭha naipang hrep kae.

⁴³ Ama’n David hneng ati, “Sung kha heisik a mo? Kei hi ui mo nati eng?” Khana apathen hnenga inphut hâksêrna kha David chunga atlungna sik a alei-ôn.

⁴⁴ David kha achōia ati, “Hong roh, nataksa kha vahei leh shahei tasâk sik kapek sik hei.”

⁴⁵ David in amasôn, “Nang in chemjâm, kasei, sungtlōn leh kahnenga kahong che, tâk-kha kei chu nang in na’n-erpui, Israel remihei Pathen, Akahratpen Rōngpu rahminga nang kadōi sik akahong eng kae.

⁴⁶ Tuningtak hin Rōngpu’n nang kei ratha neina thōia ada sik che kae; ke’n kator sik che khana nalu katan sik kae. Philisti remihei taksa kha va leh shahei tasâk sik a kapek sik hei. Khan chu Israel in Pathen anei ti hi vânhnōi in anhong manhret sik,

⁴⁷ khana Rōngpu’n amihei hukna sik a chem leh the rangei mak ti hi hiva hmun a aka-om rakip in anhmu sik. Ama hi rehmun a torna kanei kae, nangni nankhenga keini ratha neina shunga ada sik chei.”

⁴⁸ Goliath kha David hnengting hong aphut nôk jo, khana David khan Philistihei re injôkna hnengting inranga inrepui sik a katlân jo.

⁴⁹ Akut kha amârsa shunga athōna hlung inkhat akeisōt, Goliath kha adengna jo. Amachetak a amasuk a alusai kakōi jo, khana Goliath kha ahmai raleia amakhup a katlu jo.

⁵⁰ Khang’khan, chemjâm kasea, David in Goliath kha hlung dengna leh hlungpumte vânga athat a ator jo!

⁵¹ Ahnenga katlân, atak chunga vakangir, Goliath chemjâm kha apaia inphut aradoksōt a alu atan a athatna jo. Philisti he’n ankahratpa thi kha anhmu pha, katlânpet jo hei.

⁵² Israel leh Judah mihei khan ka-ông heia anhnong hei, Gath leh Ekron sōngkot katlunga anjui hei. Philistihei kha Shaaraim jōnna hlamdung heia intôn heia katlu hei, Gath leh Ekron tlungna akâr heia.

⁵³ Israel he’n Philistihei kha anvahnongna inphut anhong inle pha, anrephōr hei kha anhei chom hei.

⁵⁴ David in Goliath lu kha aloa Jerusalema achoi jo, khana Goliath re hmangchâk-hei khachu ama pōn-inn shunga ada hei.

Saul hneng David Malârna

⁵⁵ David in Goliath inrepui sik a asōk kha Saul in ahmu pha, aremi hlamkakei Abner hnenga ader, “Abner, ama so tu sapa mo?” Abner in amasôn, “Kaja ka-om Rengpa, kei manhret mak eng.

⁵⁶ “Khan chu se’na vamanhret roh,” Saul in ṭong apek jo.

⁵⁷ Khang’khan David in Goliath athatsōa rephōra ahong inle pha, Abner in Saul hneng aleiṭhōi jo. David in Goliath lu kha alachoi ṭhak hia kae.

⁵⁸ Saul in ahnenga ader, “Rether, nang tu sapa che mo?” David in amasôn, “Kei Bethlehema nasōk Jesse sapa eng kae.”