SAMUEL INKHATNA 16 - LEKHARABU INTHENG (BSI)

David Reng sik a Thai Manthina

¹ Rōngpu’n Samuel hneng ati, “Heituk kasôt mo Saul sik a alakachâm sik che? Ke’n ama hi Israelhei reng sik a rahlâng mak jo eng. Tâk tûnchu olive thai ajing jong roh khana Bethlehema Jesse intipa hneng se roh, ajârchu ama sahei kâra inkhat reng sik a kakadei jo.”

² Samuel in ader, “Heikhonga mo katlo tor sik? Saul in athei inchu athat sik eng!” Rōngpu’n amasôn, “Sehratte inkhat inṭhōi roh khana khan Rōngpu hneng inthoina katōk sik kae ti roh.

³ Inthoina khan Jesse kha bek roh, khana heimo tlo sik kha kamanthei sik jo che. Ke’n kamanthei che mi kha reng sik a thai namanthi sik kae.”

⁴ Rōngpu’n amanthei kha Samuel in atlo jo, Bethlehema kase jo, khōpuia hlamkakeihei kha ṭitpum a ama inhmupui sik kahong hei khana ander, “Hmangtalâr kahmupa, hivahi kamōng tak a akahong che mo?”

⁵ “Ôk,” tia amasôn. Rōngpu hnenga inthoina tōk sik a akahong eng kae. Nanbinga inthengsōt una ahei jui ruh.” Ama’n Jesse leh asahei kha’m an-inthengsōtna sik amanthei hei, khana inthoina sik a abek hei.

⁶ Anmani anhongtlung pha Samuel in Jesse sapa Eliab kha ahmua abinga ati, “Kadeisōt kha hiva Rōngpu hmaikunga akangirpa hi kachang nger sik.”

⁷ Tâk Rōngpu’n ahnenga ati, “Heituk a’nshânga ahme aṭhat inum malung manhlut mak roh. Ke’n ama rahlâng mak eng, ajârchu mihei ta-en kapōa ke’n enmak eng. Mi’nchu avânga ahmesō an-en, ke’nchu anmalung shunga ka-en kae.”

⁸ Khava sōa Jesse khan asapa Abinadab abeksōt a Samuel hneng aheiṭhōi. Tâk Samuel in ati, “Changmak, Rōngpu’n ama hi’m kadei mak.”

⁹ Khana Jesse’n Shammah aheiṭhōi. “Changmak, ama hi’m Rōngpu’n kadei mak,” Samuel in ati.

¹⁰ Hing’hin Jesse khan asapa 7 hei kha Samuel hneng aheiṭhōi hei. Khana Samuel in ahnenga ati, “Changmak, Rōngpu’n hihei hi inkhatbek kadei mak.”

¹¹ Khava sōa ahnenga ader, “Sapa alak nalaneisa mo?” Jesse’n amasôn, “Matlumpen laka-om, tâk ama chu kemōng kakhem ramhânga kase jo.” Samuel in ati, “Ama hin ahongna sik manthei roh. Ama ahong mak hma seng inthoina hi tōkmak min.”

¹² Khava jâra Jesse’n mi ava manbek jo hei. Ama kha ahme kaṭha, ataksa kaṭha rether inkhat, khana ahmit kaharsenga kae. Rōngpu’n Samuel hneng ati, “Hivahi kae, thai manthi jo roh!”

¹³ Samuel in olive thai kha aloa David kha a-uhei seng hmaikunga amanthi jo. Khava phatak a Rōngpu rathla khan David kha athlop manphut jo khana khava ninga inphut a-ompui jo. Khava sōa Samuel kha Rama a hong inle jo.

Saul Ṭongtan hmun a David

¹⁴ Rōngpu rathla khan Saul kha adahlon jo, khana Rōngpu tajōngtir rathla kaṭhamak khan amanrim jo.

¹⁵ Asōk he’n ahnenga anti, “Pathen tajōngtir rathla kaṭhamak khan nang amanrim jo che ti hi kanmanhret jo.

¹⁶ Khava jâra ṭingṭang inhringthei kanta manhret mi kanjongsōt sik. Rathla kaṭhamak kha nachunga ahong pha, mi khan aṭingṭang amanhring sik, khana nang kaṭha nôk sik che.”

¹⁷ Saul in ṭong apek jo hei, “Kaṭhadek a mahring inhringthei kha heijongsōt ruh khana kahnenga heiṭhōi ruh,” ati.

¹⁸ Ama inzen inkhat in ati, “Bethlehem khōpuia Jesse khan mahring inhring kathem sapa inkhat anei. Ama hi ṭit kaneimak, hme kaṭha, remi kaṭha, khan ṭongkahri kathem inkhat kae. Rōngpu’n a’nṭhōipui.”

¹⁹ Khava jâra ama’n tirle atira Jesse hnenga hinga amanti, “Nasapa David, kemōng kakhempa kha kei hneng heitir roh.”

²⁰ Jesse’n David kha Saul hneng kemōng tere inkhat, buhlom phur karôn shakōrtung inkhat khana ju kasip shavunpeng inkhat leh atir jo.

²¹ David kha Saul hneng kahonga rengpa inzen invei jo. Saul in ama kha amanṭhat hêr khana are hmangchâk kachoi sik a akadei jo.

²² Khava sōa Saul in Jesse hneng ṭong aleitir: “Ke’n David hi kamadu. Kei ṭōn tlona hin om jo rasoh.”

²³ Khana inphut chu, Pathen in rathla kaṭhamak Saul chunga ahei tir kataia, David in aṭingṭang amatua amanhring sik. Rathla kaṭhamak kha kasōk sik khana Saul kha kaṭhadet sik khana kadam nôk sik.