SAMUEL INKHATNA 14 - LEKHARABU INTHENG (BSI)

Jonathan in Ṭōn Kakhôk Atlo

¹ Ni khat chu Jonathan in are hmangchâk kachoipa hneng ati, “Philisti rephōr ting vase rih.” Tâk Jonathan in apa Saul hneng chu hripek mak,

² apa chu Gibeah inphut hlareilo Migron a kapothei kung thōia rephōr amatunga pase 600 a-ompui hei.

³ (Zakkō kabong kachoi thempu kha Ahijah kae, ama hi Ichabod naipa Ahitub sapa, ama hin Phinehas sapa khana Eli, Shiloa Rōngpu thempu, tupa kae.) Jonathan asesōt kha khanna ka-om mihe’n manhret mak hei.

⁴ Michmash rakanna, Jonathan in Philistihei rephōr tlungna sik a ajōn sik hlam a khan hlung kaphok kalentak 2 hlamsir inhnia inkhat et ka-om hei: inkhat kha Bozez, inkhat kha Sene anphō hei.

⁵ Inkhat kha hmun rakanna hlamsir sak ting, Michmash ahnget, inkhat khan thlâng ting, Geba ahnget.

⁶ Jonathan in retherpa hneng ati, “Sova khōvel Philistihei rephōr ting rakan jo rih. Rōngpu’n abôm sik me; ama’n atlo’nchu, retorna apek sik me kha heite inkhat in tingtor mak ning, hinahin eini nitlômtek inum heite khôkmak.”

⁷ Retherpa khan amasôn, “Natlo hnōm rakip kha katlopui sik che.”

⁸ Jonathan in ati, “Kaṭha jo, nirakan sik jo hi Philisti he’n ahmu hei rasoh.

⁹ Anmani’n aleihngâk ruh anti’nchu ni-omna hin nihngâk sik hei.

¹⁰ Khana anhnenga hong ruh anti’nchu, kase sik me; ajârchu khavakha eini’n re nitorna sik a Rōngpu’n mêrchîkna apek me kachang sik.”

¹¹ Khava jâra Philisti he’n anheihmuna sik heia antlo jo, khana Philisti he’n anti, “Enruh! Hebrew ṭhahrep an-intûpna khur kōk heia inphut heikasōk jo hei!”

¹² Khan chu anmani’n Jonathan leh retherpa kha anbek hei, “Hin heisōk ruh! Heikhat hripek sik chei kannei!” Jonathan in retherpa hneng ati, “Ahei jui roh. Rōngpu’n anmani chunga torna kha Israel hnenga apek jo.”

¹³ Jonathan in akut leh amarkhup a hmun rakanna kha kakea retherpa kha’num aleijui. Jonathan in Philistihei kha abuhlu heia avōk mathlâk jo hei, khana retherpa khan athat jo hei.

¹⁴ Khava ahma kakei mithatna khan Jonathan leh retherpa khan hectare ṭhen manlia inkhat shunga mi 20 anleithat hei.

¹⁵ Khō leh vena aka-om Philisti rakip ṭit inper jo hei; rephōr shunga ka-om re kasōhei khana remi seng kha anṭit reia innok jo hei; ralei innok jo, ṭit-inpirna kalentak kasōk jo.

Philistihei chunga Retorna

¹⁶ Benjamin ram a Gibeah khōa aka-ensuia aka-om Saul mihei khan Philistihei inhmak pum a ankatlân kha anleihmu.

¹⁷ Khava jâra Saul in amihei hneng ati, “Remihei kha anja tei hei ruh, tu mo a’nhmang jongsōt ruh.” Anmani’n khanga antlo pha anrevon anchoia Jonathan leh retherpa kha inhmang jo hei ti anmanhret jo.

¹⁸ Saul in Ahijah thempu hneng, “Zakkō kabong kha hin heichoi roh,” ati. (Khova ning Ahijah khan khavakha Israel mipui hmaikunga aleichoi.)

¹⁹ Saul in thempu hnenga khanga ṭong ahrilai, Philistihei rephōr shunga inhmakna kha akhe chet-chet jo, khava jâra Saul in ahnenga ati, “Rōngpu hneng derna sik pha om mak jo!”

²⁰ Khan chu ama leh amihei kha Philistihei, inhmaktak a anmani leh anmani a’ntuk hei chunga vadōina sik a rehmunting va’nṭang jo hei.

²¹ Hebrew ṭhahrep, Philistihei lang tinga aleika-om hei khana anrephōr katlunga ale’nṭhōi hei khan anhmai anhei mahe nôk a Saul leh Jonathan anheijōm jo hei.

²² Aralak, Ephraim tlânga a’nthup he’num, Philistihei katlânsōt jo hei ti anthei jo, khava jâra anmani’m he’nvei jo heia Philistihei anbuhlu jo hei,

²³ Bethaven kakhea re le’ntuk hei. Khava ning Rōngpu’n Israel aleihuk jo hei.

Retuk kahnunga Omchen Kasōk hei

²⁴ Khava ning Israelhei kha vonṭâma katlasam hei, ajârchu Saul in ka-ôrtak a ṭongpek aleimasō: “Kei inrepuihei chunga phu kahlō mak hma seng tuninga bu akasâk mi kha hâksêr chen rasoh.” Khava jâra khava ning sûnsôt tu inkhat in heite sâk mak hei.

²⁵ anmani ankhenga ratukōk thōia kahong heia hmun rakip a khōihning anhmu jo.

²⁶ Ratu thōi kha khōihning kasip a kae, tâk tu inkhat in sâk mak hei ajârchu Saul hâksêrna kha anṭit a kae.

²⁷ Tâk Jonathan inchu apa’n hâksêrna inkhat vâng mipuihei amaṭhit hei ti kha leithei mak jo; akut a achoi sung vânga khōihning thâr kha asun a khōihning ajing aleisâk jo. Khava phatak a khan ratha ahongneidet jo.

²⁸ Tâk-kha ankâra inkhat in ati, “Eini nikhenga vonṭâma katlasam jo me, tâk napa’n amaṭhit mea hinga ati, ‘Tuninga heikhat kasâk mi kha hâksêr chen rasoh.’”

²⁹ Jonathan in amasôn, “Heikhonga ṭit ka-om tak ṭōn mo kapa’n nimihei chunga atlo jo! Enruh khōihning ajingte kasâk jâra heituk a ratha kaneidet jo mo!

³⁰ Nimihe’n nikadōi hei antor hei pha antachomsōt thlaihei kha anleisâk inchu heituk a ratha antaneidet sik mo? Heimandon hngap ruh, heituk akatamdet Philisti antathat sik hei mo!”

³¹ Khava ning Israel he’n Philistihei kha Michmash a inphut Aijalon katlunga hlamdunga intuk heia anleitor jo hei. Hiva pha Israelhei kha vonṭâma katlasam hêr jo hei,

³² khana ankadōi heia inphut antachomsōt hei, kemōng leh ranhei anlo heia khava hmun a anthat jo hei khana hme kha thisen ala-ompum a anleisâk jo.

³³ Saul hneng anleihri pek, “Enroh, mipui he’n hme thisen ompuma ansâk a Rōngpu dōina setna antlo jo.” Saul in ka-ônga, “Nangni jât kajōr chei kae!” Kahnenga hin hlung kalentak heimakhōn ruh,” ati.

³⁴ Khava sōa ṭong inkhat apek nôk hei: “Mipuihei kâra se ruh khana anranhei leh ankemōnghei hinahin anheikeina sik manthei hei ruh. Khahei kha hinahin antathat heia antasâk sik hei kae; hme kha thisen ompuma ansâk a, Rōngpu hneng setna antatlo hêrmak sik kae.” Khava jâra khava ninga jân a ankhenga anranhei anheikei heia khana khan anleithat jo hei.

³⁵ Saul in Rōngpu sik a maichâm asakna hma inkeipen kha anleisak jo.

³⁶ Saul in amihei hneng ati, “Eini ṭumsuk me sona jân a Philistihei re tuk hei rih, jîng khōvâr katlunga ankarōi chom me sona thatpet hei rih.” Anmani’n anmasôn, “Akaṭhapen namandon kha tlosōt roh.” Tâk thempu khan ati, “Ahma kakeia Pathen derna nei hi rih.”

³⁷ Khava jâra Saul in Pathen hneng ader, “Ke’n Philistihei re katuk sik hei mo? Keini torna napek sik ung mo? Tâk-kha khava ning khan Pathen in masôn mak a kae.

³⁸ Khava sōa Saul in mipui hlamkakeihei hneng ati, “Hin hong ruh, tuning hei setna mo nilei tlona aka-om jo jongsōt ruh.

³⁹ Ke’n Israelhei retorna anikapek akahring Rōngpu rahminga intepna kanei, akaṭhe mi khachu kasapa Jonathan achang inum that sik kae.” Tâk tu inkhat in heite hrimak hei.

⁴⁰ Khava sōa Saul in anhnenga ati, “Nangni nankhenga khanting ngir ruh, kei leh Jonathan in hinting kangir sik ung.” “Akaṭhapen namandon kha tlo roh,” tia anmasôn.

⁴¹ Saul in Israelhei Pathen Rōngpu hneng ati, “Rōngpu, tuning heisa mo namasôn mak eng? Rōngpu, Israelhei Pathen, hlung intheng hei hina inphut amasôn roh. Ṭhena kha Jonathan a-emak leh kei kachang inchu Urim hin amasôn roh; tâk ṭhena kha nami Israel anchang inchu Thummim hin amasôn roh. Amasôna kha Jonathan leh Saul chunga katla jo; mipuihei chu changmak jo hei.

⁴² Khava sōa Saul in ati, “Kasapa Jonathan leh kei kâra akhing roh.” Khana Jonathan chunga katla jo.

⁴³ Khava sōa Saul in Jonathan hnenga ader, “Heimo natlo jo?” Jonathan in amasôn, “Ke’n kasung choi vânga khōihning ajing kaloa kaleisâk jo. Kei hin ka-om eng, akathi sik a intluk eng.”

⁴⁴ Saul in ahnenga ati, “Nang thatsōt nachangmak inchu Pathen in kei athat rasoh!”

⁴⁵ Tâk mipui he’n Saul hneng anti, “Israelhei sik a hiva retorna kalentak ahei kachoi Jonathan hi that sik jo mo? Changmak! Akahring Rōngpu rahminga a’ntep ung kae, alu chunga asam inkhatbek kapha inhmang mak ning. Tuninga nitlosōt hi Pathen inthōpui jâra nitlosōt kae.” Khava jâra mipui he’n Jonathan kha athi sik a inphut anhuk jo.

⁴⁶ Khava sōa, Saul in Philisti ahnong hei kha kahai jo, khana anramṭhen ting inle jo hei.

Saul Vairôn leh A-innshung

⁴⁷ Saul in reng ahongchang sōa, hmun rakip a akadōihei chunga re aleituk hei: Moab, Ammon, Edom mihei, khana Zoba leh Philisti renghei. Are tukna rakip a hme aleisō.

⁴⁸ Ama kahrâng tak a re atuk a Amalek-hei kapha’m aleitor hei. Re buhluna rakip a Israelhei aleihuk hei.

⁴⁹ Saul sahei kha Jonathan, Ishvi, khana Malchishua hei kae. Asanu upanu kha Merab anti, naipangnu kha Michal anti.

⁵⁰ Anuhmei kha, Ahimaaz sanu Ahinoam kae; aremi hlamkakei kha apakasin Ner sapa, Abner kae.

⁵¹ Saul pa Kish leh Abner pa Ner kha Abiel sahei kae.

⁵² Ahring lai seng Saul in Philistihei kadōia re inhnak a atuk sik kasōk. Kha achang jâra mikahrat leh mi kahrâng ahmuna hmuntina aremi kâra amanveisa a kae.