SAMUEL INKHATNA 11 - LEKHARABU INTHENG (BSI)

Saul in Ammon Mihei Re Ator hei

¹ Thla khat kapō athlengsō kahnunga Ammonhei Reng Nahash in aremi aheiching heia Gilead ram a Jabesh khōpui kadōia hong kakōn hei khana akake khum jo. Jabesh mihe’n Nahash hneng anti, “Keini leh inhnōmna nei rih khana nang kanvai karôn sik a kanrahlâng sik che.”

² Nahash in amasôn hei, “Ahlam inkhat a nangni leh inhnōmna kasyem sik: khachu nanhmitsai changtinga rakip kakhersōt sik khanga Israel rakip sik a rahming setna achangna sik.”

³ Jabesh hlamkakei he’n ahnenga anhri, “Israel ram rakip a ṭong hi tlânga kantir theina sik a ni 7 ahngâk roh. Kan-inthōpui sik tûte a-om mak jo’nchu, keini nahnenga hongkahlut sik jo ung.”

⁴ Antlângva hei kha Saul omna Gibeah khō hong katlung jo hei, mipuihei kha malung nat a kaṭap jo hei.

⁵ Saul kha hleia inphut sehratchehei leh lakahongbi, kachanga Saul in ader hei, “Heimo aka-om jo? Heisa mo mi rakip akaṭap hei?” Jabesh tlângvahei ṭong heirôn kha anhri pek jo.

⁶ Khavakha Saul in athei pha, Pathen Rathla’n achunga jōng kachōnga, ahnuk kana hêr jo.

⁷ Ama’n sehratche 2 athat a, ahme kha atlanga a-ât hei, khahei kha tirle amanchoi heia Israel ram rakip a hiva gîkna hi leh amansem hei, “Tu a-enum Saul leh Samuel kahnung kajuia re kakōnmak kha sehratche chunga a’ntlo kapō hi achen sik kae!” Rōngpu’n heimo aheitlo sik tia Israel mipui he’n anleiṭit a kae, anmani inkhatbek kaitlâkloa heikasōk heia kae.

⁸ Saul in anmani Bezek a amantûp hei: Israel a inphut mi 3,00,000 khana Judah a inphut mi 30,000 hei kae.

⁹ Anmani’n Jabesh a tlângvahei hneng anti, “Nanmihei hneng vahri ruh, ajînga sûnṭim mak hma anmani huksōt sik hei kae.” Jabesh mihe’n ṭong kha anthei pha inpâk hranghra jo hei

¹⁰ khana Nahash hneng anti, “Jînga hin nahnenga kahlut sik jo ung, kanchunga natlo hnōmchen natlo thei sik jo.”

¹¹ Khava ning jân a khan, Saul in amipuihei kha rup thuma aṭhen jo hei, jîngkâr hmatak ankadōihei rekur a katlân heia Ammonhei kha anbuhlu jo hei. Sûnṭim laia anthat jo hei. Akahring hei kha inchek-chai jo hei, anbing et a katlânsō jo hei.

¹² Khava sōa Israel mipui he’n Samuel hneng anti, “Saul in kanreng changmak ning tia akahri hei kha tupen hei mo? Kankut chunga ahei pek roh, kanthat sik hei!”

¹³ Tâk-kha Saul in ati, “Tuning tûte inkhat inthat theimak ning, ajârchu tuning hi Rōngpu’n Israelhei ahuk sōtna kani kae.”

¹⁴ Samuel in anhnenga ati, “Nikhenga Gilgal ting se rih, Saul in nireng achangna hi vaphôngsōt nôk rih.

¹⁵ Khava jâra anmani ankhenga Gilgal ting kase heia khana hmun inthenga khan Saul reng changna kha anphôngsōt a kae. Anmani’n inlôikhômna inthoina antlo jo, Saul leh Israel mi rakip in omchen kasōk kha inpâk a annit jo.