SAMUEL INKHATNA 10 - LEKHARABU INTHENG (BSI)

¹ Khava sōa Samuel in olive thaikōk kha aloa Saul luchunga amanthi jo, amajôp a ati, “Rōngpu’n hiva Israelhei vai karôn sik a thai amanthi jo che kae. Nang in amihei chunga vai narôn sik khana ankadōi rakip heia inphut nahrung sik hei kae. Rōngpu’n amihei chunga vai karôn sik a akadei jo che ti mêrchîkna kha hivahi kae:

² tuning nang in nadahlon eng pha, Benjamin ram a Zelza khōa Rachel thlân hnenga mi 2 na’ntōpui sik hei. Anmani 2 he’n nahnenga, shakōrtung nantajong hei kha kanhmu jo hei, khana napa kha shakōrtung hei sik a amalung dongmak joa, nangni sik a amalung inrima, ‘Kasapa chungchânga heimo katlo sik jo?’ tia aderṭhak jo hei.

³ Khana inphut Tabor a thingkung intheng natlung mak hma seng khanga se roh, khana khan mi 3 hei Bethel a Pathen hneng inthoina katōk sik a hlam antajui navaratō sik hei. Ankâra inkhat in keche tere 3 ahe sik hei, inkhatpa khan buhlom pheng 3 arôn sik, khana inthumpa khan shavunpeng inkhat vomhrui ju kasiptak arôn sik.

⁴ Anmani’n anchibei sik che, khana buhlom pheng hni anpek sik che, khavakha nang in narahlâng sik kae.

⁵ Khava sōa Gibeah ram a Pathen Tlânga Philistihei rephōra khan vakase sik che. Khōpui hlutna khan tlâng chunga maichâma inphut sânkathem rup khat serângdâr, sumkutben, bunglir leh ṭingṭang manhring pum a akajōng suk hei na’ntōpui sik hei. Anmani kalâm sik hei khana ka-ông sik hei.

⁶ Manhret manloa Rōngpu rathla khan nachunga ajōnghlim sik che, nang um anmani beklanga lâmna leh pengna kâra invei sik che, khana mi inlak inkhat kachang sik jo che.

⁷ Hivahi ahong sōk pha, Pathen in akeina che rakip kha tlo roh.

⁸ Kei Gilgal a kasemak hma nang hma leikase sik che, khana khan ke’n ka’nhmupui sik che khana ro-inthoina leh inlôikhôm inthoina katlosōt sik. Kei kahong leh heimo tlo sik kamanthei mak che kârseng khana khan ni 7 aleihngâk roh.”

⁹ Saul in Samuel dahlon sik a ahe’nhe pha, Pathen in Saul kha lungri ahlop inkhat apek jo. Khana Samuel in amanthei rakip kha khava ning kasōksō pet joa kae.

¹⁰ Saul leh asōkpa kha Gibia anjōngtlung pha, sânkathem rup khat in anleiratō hei. Pathen rathla’n manhret theiloa achunga hongkachu jo, khana akalâm leh akapenga inveisa joa kae.

¹¹ Amak hma Saul a le’nhret he’n hiva atlo hi anhmu pha inkhat leh inkhat inder hei, “Kish sapa chunga heimo akasōk jo? Saul hi sânkathem akachang jo mo?”

¹² Khava hmun a ka-om mi inkhat in ader hei, “Hiva sânkathem alak hei-e heikhonga, anpahei kha heikhonga mo nantamandon hei?” Hiva ṭong hi ṭongchîk inphutna kachang jo, “Saul kapha’m sânkathem akachang jo mo?”

¹³ Saul rathla a lâmna leh ôngna achaisō pha, tlâng chunga maichâm ting kase jo.

¹⁴ Saul pakasin in ama leh asōkpa ahmu heia anhnenga ati, “Khon mo avakase chei?” Saul in amasôn, “Shakōrtung kajonga kase ung? Kanhmumak hei pha, Samuel hneng vakase ung.”

¹⁵ Saul pakasin khan ader a, “Ama’n heimo amanthei chei.”

¹⁶ Saul in amasôna, “Ranhei kha inhmu jo hei tia amanthei ung,” ati, tâk reng achang sik ṭong Samuel tahri khachu apakasin hneng hrisōt mak.

Saul kha Reng sik a Phôngsōtna

¹⁷ Samuel in mipuihei kha Mizpah a beklanga intûpna sik aleibek hei,

¹⁸ khana anhnenga ati, “Rōngpu Israelhei Pathen in ati, ‘Egypt a inphut kaheiṭhōi chei khana Egypt mihei leh nangni inrimna kape rakip heia inphut kahuksōt chei.

¹⁹ Kei nan-Pathen eng kae, nankhōdeng theina leh nan-intakna rakip a inphut nankahuksōt inkhat eng kha kae, tâk tuning chu nandahlon jo eng khana reng inkhat pekna sik a nander jo eng. Kaṭha jo, nanphung et leh nanphungṭhen et a Rōngpu ângkunga hong intûp jo ruh.’”

²⁰ Samuel in phung inkhat et a hmating amanhong hei, khana Rōngpu’n Benjamin phung kha akadei jo.

²¹ Khana Samuel in Benjamin phunga innshung et hmating amanhong hei, Matri innshung akadei jo. Khava sōa Matri innshunga mihei kha hmating kahong hei, khana Kish sapa Saul kha akadei jo. Anmani’n Saul kha anjong jo, tâk anhmumak jo pha,

²² anmani’n Rōngpu hneng ander, “Mi alaka-omsa mo?” Rōngpu’n amasôn hei, “Saul kha sona son ka-om, neinâk-hei kâra inthup.”

²³ Khava jâra mihei katlân heia Saul kha mipui kâra anheiṭhōi, mi alak kanek a a’nshângdet kha anhmusōt a kae.

²⁴ Samuel in mipuihei hneng ati, “Rōngpu’n akadeisōt mi kha hin ka-om jo! Nikâra ama kapō tûte om mak.” Mipui he’n, “Rengpa ahringsei sôt rasoh!” antia ka-ông hei.

²⁵ Samuel in reng inkhat ratha neina leh aṭōnhlam ahri manchên pek hei, khana amazet manhlut hei, khavakha hmun inthenga ada a kae. Khava sōa mi rakip an-inn et a atir jo hei.

²⁶ Saul kha’m Gibeah a-inn kajōna kase jo. Pathen in anmalung atônpek hei, ratha kanei pase ṭhahrep leh inṭhōi jo hei.

²⁷ Tâk inṭangna kase mi ṭhahrep in, “Hiva mi hin heikhong mo eini sik akaṭha inkhat atlo tor sik a?” anti. Saul kha heite sakmak heia kutchoi heikhat um pek mak hei.