RUTH 3 - LEKHARABU INTHENG (BSI)

Ruth in Puise Ahmu

¹ Pha chomkhat sōa Naomi’n Ruth hneng ati, “Nang sik a puise inkhat kajōng pek sik che, nabinga inn nahlōna sik.

² Nang in ṭōn navatlosap pui nuhmeihei kapupa Boaz kha eini innshung inhnaipui kae ti hi mandon roh. Tûn kaṭong rangei roh. Tuning khōhlei bunim avōk sik kae.

³ Khava jâra tui insi roh, marim katui inchaikhum roh, pōn kaṭhapena invon roh. Khana asâng vōkna vase roh, tâk asâk a-insō mak hma seng nang in khana na-om kha manthei mak roh.

⁴ Ama khon mo akaje manhret manchên roh, khana ama aje jo pha, se ina apōnsi kha hlik inna akethlōna vaje roh. Ama’n heimo natlo sik kha amanthei sik che.”

⁵ Ruth in amasôna ati, “Nahri rakip ke’n katlo sik.”

⁶ Khava jâra Ruth in savōkna hmun a vakasea aterpi’n amanthei kha avatlo jo.

⁷ Boaz khan asâk a-insō leh amalung kahōitak a leika-om. Bunim buk chunga jena sik a inthlong jo. Ruth in sip atia kase jo, apōnsi kha ahlik jo khana akethlōna vakaje jo.

⁸ Jâna manhret manloa hong inṭhang jo, khō athlir, nuhmei inkhat akethlōna akaje kha ahmu pha inlak asâk jo.

⁹ “Nang tu che mo?” tia ama’n ader. “Ruth eng kae,” tia amanu’n amasôn. “Ajârchu nang hi kei inhnaipui innshung mi che kae, kei ka-ensui sik a inkhat che kae. Khava jâra lungsettak a a-ompui roh,” ati.

¹⁰ Ama’n ati, “Rōngpu’n vâng pek che rasoh. Naterpi sik a nang in ṭōn natlo hei kanek a tuna natlosōt ṭōn hin innshung kajana akalen chet namalâr jo kae. Nang in akanei mo, sara mo, rether inkhat naleijong thei, tâk tlomak che.

¹¹ Tûnchu namalung mandong mak roh, Ruth. Khōpuia mi rakip in nang hi nuhmei kaṭha che kae ti hi anmanhret che jâra, nangek eng rakip kha katlosōt sik.

¹² Nang innkō inhnaipui eng kae, akadik kae, nang ka-ensui sik eng kae; kachanga kei kanek a a’nhnaichet inkhat laka-om.

¹³ Tuning jânchu hivahin rek jo roh khana jîngkâra ama’n nang chunga a’nkhang tor sik mo enhi rih. A’nkhang inchu kaṭha jo; achangmak inchu, Rōngpu rahminga intep eng, ke’n inkhang sik eng. Tûnchu hinahin je inna jîngkâr katlunga om jo roh.”

¹⁴ Khang’khan amanu kha akethlōna karek jo, tâk amanu hme hmutheina sik kani kha ahong vâr mak hma katho jo, ajârchu khana khan a-om kha mi inkhat in antamanhret sik a Boaz in madu mak a kae.

¹⁵ Boaz in ahnenga ati, “Napōnsi kha hinahin mazer ina pha roh.” Amanu’n khanga atlo jo, ama’n bunim kilograme 20 kapō abunpek a adâr chunga amanṭan jo. Khan chu khōpuia amanu hong inle jo.

¹⁶ Inna ahong tlung pha, aterpi’n aleider, “Kahmōinu, heikhonga mo nahei tlo?” Boaz in ama sik a atlo rakip aterpi hneng ahri pek jo.

¹⁷ Amanu’n ahrisa, “Kut karōk a nahnenga inle theimak tin ati enga, hiva bunim rakip hi apek enga kae,” ati.

¹⁸ Naomi’n amanu hneng ati, “Tûnchu, Ruth, hihei rakip hi heimo ahong kachang sik nahmu mak kârseng, dehrat roh. Tuning Boaz in hiva ṭonghei hi achaisō mak kârseng inhnga mak ning.”