RUTH 1 - LEKHARABU INTHENG (BSI)

Elimelech leh A-innshung Moab a A’nthon hei

^1-2 Tenlai, Israel he’n reng annei mak hma, vonṭâm leikatla. Khava jâra Elimelech intipa, Ephrath phungṭhen Judah ram Bethlehema ka-om mi khan alômnu Naomi leh asapa 2 Mahlon leh Chilion aṭhōi heia pha bongkhat sik a Moab ram a kase hei. Khana khan anleiom lai

³ Elimelech kha kathi jo, Naomi kha asapa 2 hei leh dahlona ka-om jo hei,

⁴ asapahei khan Moab jōr Orpah leh Ruth an-ompui jo hei. Kum 10 kapō an-omsōa,

⁵ Mahlon leh Chilion um kathi jo hei. Naomi kha asapa leh apuise omloa abing rōk a leika-om.

Naomi leh Ruth In Bethlehema An-inle

⁶ Pha ṭhahrep sōa Rōngpu’n amihei sâng leh be kaṭha amankhôm heia vâng apek jo hei tia Naomi’n aleithei jo, khava jâra ahmōinu hei leh Moab ram dahlon sik a le’ntluk jo.

⁷ Judah ramting inlena sik a kase inphut jo hei, tâk hlam a anselai,

⁸ amanu’n anhnenga ati, “Nan-inna inle inna nannu hei leh va-om jo ruh. Nangni’n kei hneng leh akathi jo hei hneng akaṭha chei kapōa Rōngpu’n nanchunga kaṭha ompui chei rasoh.

⁹ Nan-inhnia lu nanhong nôk a inn nanhlō nôkna sik Rōngpu’n mantlukpek chei rasoh.” Khava jâra anmani kha amajôp heia mathlâna chibei apek jo hei. Tâk anmani kha kaṭap jo hei

¹⁰ khana ahnenga anti, “Changmak! Nang leh inthoia namihei hneng kase sik ung.”

¹¹ Naomi’n amasôn hei, “Kahmōi hei, nangni a’nle nger sik chei kae. Heisik a mo nanta juihnōm eng? Nanka-ompui sik a sapa kalamatet tor sik tia nantamandon eng mo?

¹² Inle jo ruh, kei avea inn neinôk sik a chu kater hêr jo eng. Khana apha kha a-oma tuning jân hin inn kaneia sapa kalanei sik achang inum,

¹³ anmani honglen sik kha nantalahngâk sik mo? Hivahin mi inkhat leh nanka-om sik kha khârmak chei ning mo? Ethei mak ning, kahmōi hei, khavakha ethei mak ning ti kha nanmanhret. Rōngpu’n kei adōi jo eng, khana nangni sik a kamalung kana hêra kae.”

¹⁴ Ave nôk a anmani kaṭap jo hei. Khava sōa Orpah khan aterpi kha amajôp a chibei atlosōa a-inna inle jo, tâk Ruth inchu Naomi kha amatutlit a kae.

¹⁵ Khava jâra Naomi’n ati, “Ruth, nanainu chu amihei leh apathen hnenga inle jo. Ama leh inṭhōia innhlam inle jo roh.”

¹⁶ Tâk Ruth in aleimasôn, “Nang dahlonna sik chea ati mak roh. Nasena hmuntina kase sik eng, na-omna hmuntina, ka-om sik eng. Namihei kha kami kachang sik hei, khana na-Pathen kha ka-Pathen kachang sik.

¹⁷ Nathina hmun a khan kathi sik eng, khana khava hmun kha ka’nvûmna kachang sik. Thina tei loa, heikhat jâra nanga inphut inṭhenna kanei inchu Rōngpu’n kachunga karâkna inhnakpen kha mathlung rasoh!”

¹⁸ Ruth in ama leh inṭhōia sena sik a a’ntluk kha amanhret pha, heite hrisa mak jo.

¹⁹ Anmani Bethlehem katlunga khanga kase hei. Antlung pha, khōpuia ka-om rakip inlak ansak a nuhmei he’n anhri, “Hivahi Naomi khet kha mo?”

²⁰ Amanu’n amasôn heia, “Naomi ati mak jo ruh; Marah tia ahei bek jo ruh, ajârchu Chunghnung Pathen in kahringkhō hi akakha amanchang pek jo eng.

²¹ Hiva hmun hi kadahlon pha, katluk a kaleinei, tâk kahong inle pha, Rōngpu’n kakarōk a aheiṭhōi jo eng. Chunghnung Rōngpu’n themmô apek enga inrengna amathlâk jo eng pha hin heisik a mo kei hi Naomi tia nantalabek sik eng?”

²² Hing’hin, Naomi khan Moab a inphut ahmōinu Moab jōrnu Ruth leh ahong inle hei kae. Bethlehema anhongtlung pha sâng khôm le’nphut bia kae.