ROMANHEI 9 - LEKHARABU INTHENG (BSI)

Pathen leh Amihei

¹ Ke’n akadik kha kahri kae; Kei Christa ta eng kae, kamalei seimak. Rathla Intheng tamanse, kei mandon ṭhen theina hinum, kamalei seimak ti kha amanchên,

² Ti chu ke’n heituk a’nreng eng mo khana heituk bânglo jena kamalung akana jo mo,

³ kataksa leh kathisenkhet kamihei sik a tia kahri pha, kamalei seimak ti hi amanchên pek eng. Ajârchu, anmani sik jâra kei Pathen hâksêr akachen leh Christa a inphut ṭhensōt inkhat a indon eng.

⁴ Anmani Pathen mihei kae; asa amanchang jo hei khana alûrna anhnenga amalârpek jo hei; ṭong a’nteppui heia Dân kha apek hei; anmani’n akadik kamukna kha annei jo; Pathen ṭongtepna kha anchen jo;

⁵ anmani hi rahming inthang pusōn heia ajōng kakōn hei kae; khan chu Christa kha mihring inkhat a anmani phung kae. Heirakip chunga vaikarôn Pathen kha ahei tik a choi ka-âna om rasoh! Amen.

⁶ Ke’n Pathen ṭongtep kha inṭhe jo katina changmak; ajârchu Israel mi rakip kha Pathen mi changmak heia kae.

⁷ Abraham sōn rakip hei kha’m, Pathen sa changpet mak hei, ajârchu Pathen in Abraham hneng, “Nahnenga ka ṭongtep tu leh shahei kha Isaac a inphut nahmu sik kae,” ati.

⁸ Hiva tina chu, taksa dungjuia a’nte sahei khachu Pathen sa changmak hei, khanga changloa Pathen ṭongtep dungjuia a’nte sahei seng rōk kha atu asa kadik-hei kae, tia inlo hei.

⁹ Ajârchu Pathen ṭongtep kha hiva ṭong hi kae, “Kei aphatak a he’nle sik eng khana Sarah in sapa inkhat anei sik.”

¹⁰ Khana hivahin inchai mak. Ajârchu Rebecca in sapase 2 anei hei, anpa inkhat rōk nipu Isaac kha kae.

^11-12 Tâk-kha sapa inkhat kadeisōt a Pathen mantlukna kha pui atlukna sik, Pathen in Rebecca hneng ati, “Upapa khan naipangpa kha arazen sik kae.” Hiva ṭong hi an-intet mak hma, akaṭha leh akase heite anmani’n anmanhret mak hma, Pathen in aleihrisa kae; khava jâra Pathen takadei hi ṭōntlo jâra changmak, abekna chunga a’nngai kha kae.

¹³ Hing’hin Ṭong intheng in ati, “Ke’n Jacob kamalungset, tâk Esau chu ka-en kada,” ati.

¹⁴ Khan chu, eini’n Pathen kha dikmak niti sik mo? Kha changmak!

¹⁵ Ajârchu ama’n Moses hneng, “Ke’n kamadudu chunga khan maritna kanei sik kae; ke’n kamadudu chunga khan lum lona kanei sik kae,” ati.

¹⁶ Khan chu mihring ṭōn tlona leh mihring maduna chunga a’nngai changloa, Pathen lungset maritna rōk a khan a’nngai kha kae.

¹⁷ Ajârchu Ṭong intheng in Egypt reng Pharaoh hneng ati, “Vânhnōi raleichunga kajâi manthang sōna sik leh karatha hratna manhmuna sik a hmang sik chea, khava sik mônga nang renga kasyem che kae.”

¹⁸ Khava jâra Pathen in amadudu chunga lungset maritna aneia, racham kase amanchang hnō-hnōm kha racham kasea asyem kae.

Pathen Hnuknat leh Maritna

¹⁹ Tâk-kha mi inkhat in kahnenga hing’hin, “Kha achang inchu, Pathen in mi inkhat ṭhena kha heikhong mo ahmu thei sik? Pathen lungdo kha tu’n mo akhâmtor sik?” ati sik.

²⁰ Tâk-kha, Eh kaṭhōn, Pathen hnenga ṭong insôn sik, nang kha tu che mo? Ralei bephu inkhat in akasyem hneng, “Heisa mo hinga nasyem eng?” tia ader thei sik mo?

²¹ Hei-achang inum, be kakhengpa khan amadudua matlak kha hmangtheina ratha aneia kae, khana matlak ahlom inkhat rōk a inphut a bephu 2, inkhat chu man kabeia, inkhat chu man katama, asyemthei heia kae.

²² Khava kapōa Pathen tatlo hi’m akadik kae. Ama’n ahnuk natna leh aratha hratna kha amalâr hnōma kae. Tâk-kha ahnuk natna hêr hei chunga leh asuk manhmang sik hei chunga thōkna, adesōt pek heia kae.

²³ Khan chu alûrna kachen sik a aman tlukdek maritna kachen jo einihei chunga ajōng pek me alûrna katamtak kha’m malâr sik a amadua kae.

²⁴ Ajârchu einihei hi Jehudihei kâra rōk changloa Jât-hlop hei kâra inphut a’m abeksōt mipui me kha kae.

²⁵ Ajârchu ama’n Hosea lekha a hing’hin ahri: “Kami kachangmak mihei kha ke’n, ‘Kamihei,’ kati sik. Kamalungset mak jât kha, ‘Kalungset hei,’ kati sik.

²⁶ ‘Nangni kami changmak chei,’ tia ahrina hmuntak a khan, anmani akahring ṭhak Pathen sahei a’nti sik hei kae.”

²⁷ Khana Isaiah in Israelhei chungchânga aleiphông: “Israel mihei kha tui-ôngpui nêrdi ja anchang inum, ankâra mi ajingte rōk hukmanhring akachang sik hei kae;

²⁸ ajârchu Rōngpu khan vânhnōi pumpui atintana kha achailoi sik jo.”

²⁹ Hing’hin hma a Isaiah in aleihridek kapōa, “Chunghnung Rōngpu khan eini tu leh sa ṭhahrep aleidahlon pek mak me’nchu, eini Sodom leh Gomorrah kapōa aleikachang sik me kae.”

Israelhei sik Paul Derna

³⁰ Khava jâra eini’n niti khachu Jât-hlop hei anbinga Pathen leh akadik a omsapna sik aleikajong mak hei kha, taksen jâra ama leh akadiksap amanchang jo hei.

³¹ Khana kadeisōt jât-hei, Dân vânga Pathen leh kadik a omsapna sik kajōng hei khan Pathen leh kadik a omsapna kha hmutor mak jo hei.

³² Heijâra mo antahmutor mak? Ajârchu anmani taksenna chunga changloa, ṭōn tlona chunga an-inngai jâra kae. Anmani, “Inpaina hlung,” chunga khan inpai inthlûk jo heia kae.

³³ Ajârchu hing’hin Ṭong Inthenga inhri: “Enruh, ke’n Ziona hlung inkhat mipui inpaina sik kada, hiva hlung hin mihei amanpai intluk sik hei. Tâk-kha tu achang inum ama kataksen khachu amalung tlâksam mak ning.”