ROMANHEI 4 - LEKHARABU INTHENG (BSI)

Abraham Tekâk

¹ Kha achang inchu, niphung hruia nipa Abraham chungchânga heimo niti sik? Ama’n aleiratō kha heimo?

² Aṭōntlo jâra Pathen leh dikna kha a chensap achang inchu, inlensakna heikhat ama’n aleinei sik kae; tâk Pathen hmit-hmua heite leinei mak.

³ Ṭong intheng in ahri, “Abraham in Pathen ataksen, khana ataksenna jâra khan Pathen in ama akadik inkhat a arahlâng jo.”

⁴ Ṭōnkatlo mi kha akanihlō inpek, tâk khahei khachu mankase kutchoia inteimak, rathaman hei kae.

⁵ Tâk-kha anṭōn tlona chunga changloa, an-Pathen taksenna chunga a’nngai hei, khan chu anṭhena kha ṭhena kaneimak tia amalârsōt jo hei, khahei taksenna kha ama khet leh dikna an chensapna sik Pathen in ateia kae.

⁶ Mi inkhat ṭōntlo rakip teipekloa Pathen in mikadik inkhat a arahlâng jo mipa hōina kha David in ahri pha hing’hin aleiti:

⁷ “Pathen in anṭhena, ansetna arangei mandam jo hei kha mikahōihei kae!

⁸ Rōngpu’n asetna atei pek mak sik mi kha mikahōi kae!”

⁹ Khava David tahri hōina kha vun katanhei sik rōk jo mo? Changmak! Vun katanmak hei sik a’m ahri kae. Ajârchu eini’n, ṭong inthenga nitei, “Abraham in Pathen ataksen, khava ataksenna jâra Pathen in ama mikadik inkhat a arahlâng.”

¹⁰ Khavakha heitik a khan mo aleikasōk? Avun tan mak hma a-emak leh atan sōa mo? Avun atan sōa changmak, atan mak hma a kae.

¹¹ Ama kha hnungtōa avun atan kae, khana avun tan hi taksenna anei jâra Pathen in avun tan mak hma mikadik inkhat a arahlâng jo ti mêrchîkna kha kae. Khava jâra vun a’ntanmak inum Pathen kataksen mi rakip leh mikadik inkhat a arahlâng jo hei sik a Abraham kha rathla langa anpa kachang jo.

¹² Abraham hi vun katanhei, ti chu anvuntan chung nôk a khan Abraham in avun tan mak hma hringkhō aleihmang kapōa akahmang hei sik a pa kha’m kachang jo.

Taksen Jâra Pathen Ṭongtep Rahlâng

¹³ Pathen in Abraham leh atu asahei hneng vânhnōi ralei hi antahlō sik kae tia ṭong aleitep pek pha khanga aleichena kae, khavakha Abraham in Dân ajui jâra changmak, tâk ama’n taksenna aneia Pathen in mikadik inkhat a arahlâng jâra kae.

¹⁴ Ajârchu Pathen in aṭongtep kha Dân kajuihei hneng apek hei-achang inchu, taksen kha heite hnemmak jo, khan chu Pathen ṭongtep kha akarōksai kachang jo.

¹⁵ Dân khan Pathen hnuknat ajōng rôn sōt; tâk Dân om makna hmun a, Dân juimakna kha’m om mak.

¹⁶ Ṭongtep kha Abraham sōn rakip he’n mankasea Pathen kutchoi pek kapōa anchen theina sik taksenna chunga ale’npek kae, Dân kajui rōk hei hnenga changloa Abraham taksenna kapōa taksenna kaneihei hnenga kae. Ajârchu Abraham hi eini nikhenga rathla langa nipa kae;

¹⁷ Ṭong intheng in ahri kapōa, “Ke’n nang jât katamtak hei pa kamanchang jo che.” Khava jâra akathi’m amanhringsōt khana aleika-om mak kha’m aṭongpek in aman om tor, Abraham in aleitaksen khava aṭongtep kha Pathen hmit-hmua akaṭha kae.

¹⁸ Inhōrna sik heite ajâr aleiom mak laitak Abraham in aleitaksen khana lei-inhōra kae, khava jâra “jât katamtak hei pa,” kha hongkachang. Ṭong intheng in hing’hin, “Natu nasa ârsi ja kapōa kachang sik hei,” ati.

¹⁹ Khava pha ama akum 100 katlukvet jo; ataksa a’n-en pha akathisa ka-ang jo khana Sarah kha’num von choitor mak jo, tâk ataksenna khachu leitlâksam dekmak a kae.

²⁰ Ataksenna kha inhling mak; khana Pathen ṭongtep a khan inkei-chiona neimak; ataksenna khan rathahrat amansip a, Pathen kha choi ka-ânna anei.

²¹ Pathen in aṭong tepna kha atlo tor nger sik tia inchênna ahlamrin.

²² Khava jâra, Abraham in ataksen jâra, “Pathen in mikadik a arahlâng” kae.

²³ “Mikadik a arahlâng,” inti ṭong hi, ama sik rōk a a’nzet changmak.

²⁴ Ni-Rōngpu Jesu thina inphut akakei inthōipa takkasen, mikadik a arahlâng sik seng eini sik a’m khavakha a’nzet kae.

²⁵ Eini setna jâra ama akathi sik a pek sōt jo kae, khan chu eini Pathen leh akadiksap nichang theina sik, ama akahring sik a keimathōi jo kae.