RENGHEI INKHATNA 9 - LEKHARABU INTHENG (BSI)

Solomon hneng Pathen A’nlâr nôk

¹ Rn Solomon in Bek-inn leh reng-innpui asak hnōmseng asaksō pha,

² Rōngpu’n ahnenga Gibeona atlo kapōhrep a, avea inlâr nôk a kae.

³ Rōngpu’n ahnenga ati, “Naderna kha kathei jo. Nang in nasaksōt Bek-inn hi ahei tik a kei kamukna sik a kaman thengsōt jo. Ke’n ahei tik a ka-ensui ṭhak sik khana kahrung ṭhak sik.

⁴ Napa David in atlo kapōa, malung inthenga leh malung kahlut a narazen eng inchu, kadân najuia kaṭong pek che rakip natlo’nchu,

⁵ napa David hnenga kale’ntepna, Israel chunga asōn he’n ahei tik a vai antarôn sik kae kalei ti kha kanit sik kae.

⁶ Tâk-kha nang leh nasōn he’n kei jui sik nanbâng inchu, ke’n kapek chei dân leh ṭongpek-hei kha nanjuimak inchu, khana pathen ralak nankamuk inchu,

⁷ khan chu ke’n kaleipek hei ram a inphut kami Israelhei kalosōt sik hei kae. Khana kei kamukna sik a kaman thengsōt hiva Bek-inn hi’m kadahlon sik kae. Hmuntina mihe’n Israel hi ṭongsaina annei sik jo khana hnōisetak a antlo sik jo.

⁸ Hiva Bek-inn hi suk manchim abuk hongkachang sik, khana khava hnenga akase rakip in anmalung atôn sik khana inlak ansak sik. Anmani inder sik hei, ‘Heisa mo Rōngpu’n hiva ram a leh Bek-inn chunga hinga atlo?’

⁹ Mihe’n anmasôn sik hei, ‘Anpu sōnhei Egypt a inphut anhei kaṭhōisōt Rōngpu an-Pathen kha andahlon jâra kae. Anmani’n pathen ralak an-inloa ankamuk hei. Khava jâra Rōngpu’n hiva inrengna hi anchunga amathlung kae.’”

Solomon leh Hiram Inhnōmna

¹⁰ Solomon in Bek-inn leh areng-innpui asakna khan kum 20 kahlut a kae.

¹¹ Aṭōn sik a amadu rakip Tyre Reng Hiram in cedar, hmeila, sana ahnenga aleipek. Achaisōa, Reng Solomon in Hiram hneng Galilee ramkeia khōpui 20 aleipek jo.

¹² Hiram kha khavahei ka-ena vakase, khana leimadu mak hei.

¹³ Khava jâra Solomon hneng ati, “Kasōpui, napek eng kha hiva khōpuihei hi mo!” Hiva jâra hin aramkei kha tûn katlung Kabul tia inhret jo.

¹⁴ Hiram in Solomon hnenga sana kilograme 4,000 kakhea aleitir pek.

Solomon Hmesōna Ralak-hei

¹⁵ Reng Solomon in Bek-inn leh reng-innpui, khōpui nisōtinga ram a kasiptak a inn sakna sik leh khōpui bang sakna sik a rumhrat a ṭōnkatlo mi aleimatung hei. Ama’n anmani kha Hazor, Megiddo leh Gezer khōpui syem mantherna aleihmang hei.

¹⁶ (Egypt reng in Gezer kha abuhlua aleilo, ashunga aleika-om hei kha athat hei khana khōpui kalen kha hmei aleiro. Khan chu asanu’n Solomon hnenga inn aheinei pha ama’n luhông kutchoi inkhat a ahei pek,

¹⁷ khana Solomon in asyem manther a kae.) Solomon in rumhrat a ṭōn katlohei kha ahmang heia, Thōi intong Beth Horon,

¹⁸ Judah ramhânga Baalath, Tamar aleisyem manther hei,

¹⁹ ahnenga neinâk anta heipek hei dana sik khōpuihei, ashakor leh ashakor gârihei, khana Jerusalema, Lebanona, aram shunga hmun rakip a asak hnōm rakip sakna sik a kae.

^20-21 Ama’n rumhrat a ṭōn amantlo hei kha, Solomon in Canaanhei sōn leh pârhei, Israel he’n anram anlopek hei pha anta leithat mak hei kha ahmang heia kae. Hihei hi Amor, Hit, Periz, Hiv leh Jebush inveisa hei, ansōn anpârhei kha tûn katlung hin sōk kachang thang heia kae.

²² Solomon in Israelhei chu sōk a hmangmak hei; anmani chu remia, ṭōn karôna, remi hlamkakeia, shakor gâri kachinga, khana shakor remi ṭōna ama anrazena kae.

²³ Solomon in inn hlop-hlop sakna sik a rumhrat a ṭōn amantlo hei ka-ensui sik a ṭōnkarôn 550 leika-om hei.

²⁴ Solomon in khōpui nisōting ram kha inn asak mansipsō jo, Egypt rengpa sanu, a nuhmei rahminga, amanu sik a Solomon in asaksōt reng-innpuia khan David khōpui kha athon jo.

²⁵ Rōngpu sik a asaksōt maichâm chunga khan ro-inthoina leh inlôikhômna inthoina kum khat a vōi 3 sâm Solomon in aleitōk a kae. Rōngpu hnenga marim katui rona’m aleineia kae. Khang’khan Bek-inn sakna kha achai jo.

²⁶ Reng Solomon in thir rakōng rup Edom ram a, Elah hnenga, Agaba Tuikekâk panga, Eziongeber hmun a aleisyem.

²⁷ Reng Hiram in athir rakōng rup heia inphut tui-ôngpuia ṭōnkatlo kathem ṭhahrep Solomon mihei leh ṭōn katlosap sik a ahei tir hei.

²⁸ Anmani Ophir ram a rakōng anheitôra, Solomon hneng sana kilograme 14,000 anheichoi male pek a kae.