RENGHEI INKHATNA 7 - LEKHARABU INTHENG (BSI)

Solomon Innpui

¹ Solomon in a-innpui um aleisak, kum 13 kahlut.

^2-3 Lebanon Ratu Denpui inti kha metre 44 kasei, metre 22 inpâk, khana metre 13.5 inshâng. Hivahin cedar kacho agôr 3, agôr inkhat a kacho 15 sâm intung hei, anchunga cedar thingtlōn ankhang heia kae. Achung khârna kha cedar vânga insyem, karōi manbukna den katlunga anmanjom, khahei kha kacho he’n anrôn hei.

⁴ Bang asir 2 heia khan thlikot agôr 3 et ka-om hei.

⁵ Kot-hei leh thlikot-hei kha adung avai a’n-anghrep kekim hei kae, khana bang rakip a thlikot agôr 3 hei kha lang khat a agôr hei kha leh inhngettō hei.

⁶ Chopuihei Denpui inti kha metre 22 kasei khana metre 13.5 inpâk. Hivahin chopuihei tarôn, achunga pōn makhu sumpuk inkhat ka-om.

⁷ Reng In-ongna Den, Solomon in ṭong atanna, Ṭong tanna Denpui tia’m inhret kha ralei hmaia inphut chunga innsun makheina, phuchung thōi katlung kha cedar thingpek vânga ashungting anrabek a kae.

⁸ Solomon omna inn, Ṭong tanna Denpui kahnungtinga inn hlop inkhat kha inn ralak-hei kapōa anleisyem. Ama’n inn kha leh in-anghrep a a nuhmei, Egypt rengpa sanu sik a inn inkhat aleisak.

⁹ Hiva inn rakip leh ṭongtan hmun kalen kha hlung kaṭhahei vânga innhmuna inphut chunga insun mankopna katlung ansak a kae. Hlunghei kha hlung omna hmun heia ansyem hei khana atena dungjuia ashunga leh avâng intong asir hei kha a-âtna vânga an-âttan heia kae.

¹⁰ Innhmun kha hlung hmun a hlung kalen tatak vânga ansyem hei, ṭhahrep chu metre 3.5 kasei hei alak he’n metre 4 sâm kasei hei.

¹¹ Khahei chunga khan atena dungjuia a’n-âttan hlung ralak-hei leh cedar thingtlōn anda hei.

¹² Reng-innpui innden, Bek-inn shungtinga innden leh Bek-inn hlutna innden banghei kha, an-âttan hlung thōthum ankhangsō akaia cedar thingtlōn thōkhat et ankhang heia kae.

Huram Ṭōn

¹³ Reng Solomon in Tyre khōpui kalena ka-om sum-êng ṭōn kut kathem, Huram tia ava manbek hei.

¹⁴ Aka-om mak jo apa kha Tyre inphut kae, khana ama kha’m sum-êng ṭōna kut kathemtak inkhat kae; anu kha Naphtali phunga mi kae. Huram kha akathemtak leh pha kasôttak a kut ṭōn aleikatlo jo kae. Sum-êng ṭōn rakip katlosōt sik a Reng Solomon bekna kha leikahnōma kae.

Sum-êng Chopui Inhni

¹⁵ Huram in sum-êng chopui 2 amatung hei, metre 8 sâm inshâng hei khana metre 5.3 sâm kalenhei, khana Bek-inn hlutna khan anmatung hei.

¹⁶ Ama’n chopui lera da sik heia, ret-thleng metre 2.2 inshâng 2 ansyem hei.

¹⁷ Chopuihei chung et a hrui antapher,

¹⁸ leh sum-êng kapothei agôr 2 vânga ret ansyem.

¹⁹ Chopui luburhei kha tharorei lim anpō, metre 1.8 inshâng hei,

²⁰ khahei kha hrui a’npher ret chunga ahmor inpumna chung et a khan anda hei. Kacho luburhei kimve et a kapothei 200 agôr inhnia anda hei.

²¹ Huram in hiva sum-êng chopui 2 hi Bek-inn hlutna hmatak a amanngir hei: inkhat thlang tinga asira akangir kha Jachin tia anphō, khana sak tinga asira akangir khan Boaz tia anphō.

²² Tharo reipâr leh a’npō sum-êng lim kha chopui chunga ka-om jo hei. Khang’khan chopui chunga ṭōn kha inchai jo.

Sum-êng Tuikōk

²³ Huram in a’npum sum-êng tuikōk aleisyem, metre 2.2 inthûk, akhang kha metre 4.4 kasei, abei ka-âng kha metre 13.2 kae.

²⁴ Tuikōk bei avâng intong bit a, sum-êng umthlum lim agôr 2 anmankop hei, khahei kha leh tuikōk kha sum-êng apek inkhat rōk vânga insyem hei.

²⁵ Tuikōk kha sum-êng sehratche 12 anhmai vângting akahnget hei khōn chunga anda, 3 et in ramkei 4 anhnget et.

²⁶ Tuibe bang kha millimetre 75 insâ. Ahmor kha, kōklei kapō kae, tharo reipâr kapōa avângting kalep. Tuikhur khan litre 40,000 kapō tui akan.

Sum-êng Gârihei

²⁷ Huram in sum-êng gâri 10 asyemsa; inkhat et kha metre 1.8 kasei, metre 1.8 inpâk, khana metre 1.3 inshâng.

²⁸ Khahei kha adung akhang in-angtling thingpek vânga abang ankim hei,

²⁹ kha leh inṭhōia shabakkai, sehratche, khana mathla kanei ranhringhei lim thingpek chunga khan inzet hei; kekim chung heia, shabakkaihei leh sehratchehei chung leh athōia hrui inpherhei inzetsa.

³⁰ Gâri inkhat a sum-êng kâng 4 leh kâng inherna atlōn ka-om hei. Arakir manlia gâri thlengkông karôn sik a sum-êng theksung ka-om hei; theksung hei kha hrui inher vânga ret ansyem hei.

³¹ Thlengkông sik a gâri chunga sōnke inkôikim inkhat ka-om. Khavakha gâri chunghmora inphut achungting centimetre 45 inshâng khana ashungting centimetre 18 kahlutdet. Khava chunga khan lim inzet hei.

³² Akâng hei kha centimetre 66 inshâng hei; khahei kha gâri thingpek inpha hei thōia ka-om hei, gâri kâng inherna thirtlōn hei kha gâri kha leh pumkhat hei kae.

³³ Kâng hei kha shakor gâri kâng kapō hei kae; kâng inherna atlōn hei, gâri chungtinga ahmor hei, kâng sung, kâng alaitak a a’nherna hei ankhenga sum-êng rōk hei kae.

³⁴ Gâri rakip a athōi tinga arakir 4 heia theksung ka-om hei, khahei kha gâri kha leh pumkhat hei kae.

³⁵ Gâri rakip chunghei kimvea centimetre 22 inpek hrui vânga inkhit hei; hiva theksung hei leh thingpek hei kha gâri kha leh pumkhat hei kae.

³⁶ Theksung hei leh thingpek hei chunga, ahmun rōkna rakip a mathla kanei ranhringhei, shabakkaihei leh kahno kung limhei vânga aret ansyem hei, inṭhōia ahmun tina hrui inpher lim anmazet.

³⁷ Hing’hin gârihei kha ansyem; ankhenga in-angpet hei, anlenje leh anlim thakhat hei kae.

³⁸ Huram in thlengkông 10 aleisyemsa, inkhat et gâri inkhat et sik a. Thlengkông inkhat a metre 1.8 abei kave, litre 800 tui aken.

³⁹ Ama’n gâri 5 kha Bek-inn thlang ting ada hei, khana alak 5 hei kha sak ting ada hei; tuikōk khan thlang-nisōting ada.

Bek-inn Manhlengsōtna Ṭongbong

^40-45 Huram in tuibehei, akabōk losōtnahei leh thlengkamhei asyemsa. Reng Solomon sik a Rōngpu Bek-inn sakna kha akhenga achai jo. Asyem seng kha hihei hi kae: Chopui 2 Chopui chung heia thlengkam kapō ret-thleng 2 Ret-thleng vângting chunga hrui inpher lim Sum-êng kapothei 400, ret-thleng kimve chunga 100 sasâm agôr inhnia asyem Gâri 10 Thlengkông 10 Tuikōk Tuikōk karôn sehratche 12 Bephu hei, vutlōk hei, leh thlengkamhei kae. Bek-inna hmangchâk rakip Reng Solomon sik a sum-êng inne vânga ansyem kae.

⁴⁶ Hivahei seng hi reng in asyemsōtna hmun, Jordan Phaichama Sukkoth leh Zarethan kâra asyem hei kae.

⁴⁷ Solomon in hiva sum-êng neinâk-hei hi ankahrik temak hei, ajârchu khahei kha katam hêr hei, khava jâra ankahrik kha in-enmak jo hei.

⁴⁸ Solomon in Bek-inn hmangchâk, sana vânga ansyem maichâm, Pathen hnenga buhlom tōkna dokhâng anei hei,

⁴⁹ A’nthengpen Hmun hmatinga a’ntung thaihmei kung 10, thlâng tinga 5, sak tinga 5 hei; reipâr hei, thaihmei hei, khana chaiche hei kae;

⁵⁰ kōkleihei, thaihmei sêmthatna hei, thlengkamhei, marim katui rona thlenghei, hmeira-ê choina khâng hei; Hmun Inthengpen kot leh Bek-inn vângtinga kot-hei kapacha hei. Hiva hmangchâk-hei seng hi sana vânga ansyem hei kae.

⁵¹ Rn Solomon in Bek-inn ṭōn rakip achaisō pha, apa David in Rōngpu hneng aleitōksōt rakip kha bek-inn karōi bukna khan ada jo hei — dangka, sana, khana alak neinâk-hei.