RENGHEI INKHATNA 6 - LEKHARABU INTHENG (BSI)

Solomon in Bek-inn Asak

¹ Israel he’n Egypt ram anhong dahlona kum 480 sōa, Israelhei chunga Solomon reng achang kum 4 tlukna shunga, thla 2 tlukna Mavi thla Solomon in Bek-inn sak aphut a kae.

² Ashungting metre adung 27 kasei, avai metre 9 inpek, khana metre 13.5 inshâng.

³ Ahlutna innden kha metre 4.5 inthûk khana metre 9 inpek, hmun intheng kapōa avai inpek a kae.

⁴ Bek-inn bang kha akhur kave ka-om hei, inn shungtinga kanek a avângting kapingdet a kae.

⁵ Bek-inn sira leh kahnungtinga, avâng intong bang heia, rabek mankop den athō 3 insak, den khat kha metre 2.2 inshâng et a ansak.

⁶ Athōipen den kha metre 2.2 inpek, alaia athōa den kha metre 2.7 inpek, achungpen athōa den kha metre 3.1 inpek. Innden rakip a Bek-inn banghei kha athōipena kanek a inpa det-det hei, ajârchu chungden banghei kha kacho matungna kasea bang inkhat chunga inkhat anngir torna sik a kae.

⁷ Bek-inn ansaklai hlung hemna, hreicha, khana thir hmangchâk rasa asōk makna sik, Bek-inn sakna hlunghei kha hlung hmun a anleimantluk hei.

⁸ Inn sakmankop thōipen den a hlutna sik kot kha bek-inn thlâng ting indo, 2 leh 3 tlukna den a kena sik a kechōnna ka-om.

⁹ Hing’hin Reng Solomon in Bek-inn asaksō jo. Achung tinga chungkhâr kha cedar thingtlōn leh thingpek vânga a’nsyema kae.

¹⁰ Inn sakmankop chungden 3, den inkhat et a metre 2.2 inshâng hei, Bek-inn vâng intong banga rabek mankop a ansak hei, khana Bek-inn leh manjōmna kha Cedar thingtlōnhei vânga ansuktō hei.

¹¹ Rōngpu’n Solomon hneng ahri,

¹² “Nang in kadân leh kaṭong pek rakip najui inchu napa hnenga kale’ntepna kha katlo pek sik che.

¹³ Nang in nasyemsōt Bek-inn shunga kamihei kâra ka-om sik eng, khana ke’n dahlon hêrmak hei ning.”

¹⁴ Hing’hin Solomon in Bek-inn asak kha achai jo.

Bek-inn Ashung Manretna

¹⁵ Bek-inn ashunga bang kha athōia inphut chungkhâr katlung cedar thingpek vânga anrabek, khana innshung ralei hmai khachu hmeila thingpek anpha a kae.

¹⁶ Ashunga den inkhat, Hmun Inthengpen inti kha, Bek-inn kahnungpena ansak. Khavakha metre 9 kasei khana athōia inphut chungkhâr katlunga cedar thingpek vânga ankhârtana kae.

¹⁷ Hmun Inthengpen ahmatinga den inkhat kha metre 18 kasei.

¹⁸ Cedar thingpek chunga ûmṭhlum lim leh reipâr lim anhem manbet hei; abang hlung kha a’nhmu makna sik a, ashung intong akhenga cedar thingpek vâng ankatōmsō.

¹⁹ Bek-inn kahnungting Rōngpu Intepna Bôm dana sik a den ashungpen inkhat ansak.

²⁰ Hiva ashungden hi metre avai 9 kasei, avai metre 9 inpek, khana metre 9 inshâng, akhengpet a sana intheng vâng ankatōm. Maichâm kha Cedar thingpek vâng anmakhu.

²¹ Bek-inn ashungting kha sana vânga ankatōm, ashunga den sana vânga a’ntōm kha’m ahlutna chunga akhangting sana hrui anmankei hei.

²² Bek-inn ashungting akhenga, hmun Inthengpen shunga maichâmhei kha’m sana vâng rōk a ankatōm.

²³ Mathla kanei ranhring 2 hei olive thing vânga a’nsyem hei khana Hmun Inthengpen shunga anda hei, inkhat et kha metre 4.4 inshâng hei.

^24-26 An-inhnia in-angtling hei. An-inhnia mathla 2 ṭim annei et, anmathla inkhat kha metre 2.2 ṭim kasei, khava jâra anmathla hmor inkhat a inphut ahmor inkhat katlung metre 4.4 kae.

²⁷ Anmani 2 hi Hmun Inthengpen asir asira anda hei, anmathla kha anzera innden alaiṭima intō hei khana anmathla ahlop 2 hei khan banga antôna kae.

²⁸ Mathla kanei ranhring 2 hei kha sana vânga ankatōm hei.

²⁹ Innden apui karôn banghei kha leh ashungtinga den rakip hei kha mathla kanei ranhring, kahno bō, leh reipâr limhei anmazet a ret ansyema kae.

³⁰ Athōia ralei hmai kapha’m sana vâng rōk a ankatōma kae.

³¹ Ahmun Inthengpen hlutna kot a olive thinga ansyem kot khâr 2 anmando; kot khâr chung kha alu anmanjûma kae.

³² Kot-hei hi mathla kanei ranhringhei, kahno kung khana reipâr limhei anmazet a anmanret. Kot-hei, mathla kaneihei, khana kahno kunghei kha sana vânga ankatōm hei.

³³ Apui karôn den hlutna kot kha adung leh avai in-anghrep olive thingpek vânga ansyem.

³⁴ Hinahin hmeila vânga insyem, thlep mankopthei kot 2 ka-om hei

³⁵ khana mathla kanei ranhring, kahno kung, reipâr limhei inzet hei, anchunga hin sana vâng ankatōma amanret hei.

³⁶ Bek-inn hmating khan ashung intong innden inkhat ansyem, bang in akekimpet, khavakha hlung athō 3 ankhang akaia cedar thingtlōn thōkhat sâm ankhanga kae.

³⁷ Bek-inn innhmun kha Solomon vai rôna kum 4 tlukna, thla 2 tlukna, Mavi thla a khana andeng manphut a kae.

³⁸ Solomon vairônna kum 11 tlukna, thla 8 tlukna, Bul thla, anta leimantluk kapōhrep a Bek-inn kha ansaksō jo. Hiva sakna hin Solomon kha kum 7 kahlut a kae.