RENGHEI INKHATNA 20 - LEKHARABU INTHENG (BSI)

Syria leh Re tlona

¹ Syria Reng Benhadad in aremi rup rakip amantûp hei, reng 32 he’n anshakor leh anshakor gârihei vânga anbôm, ama kha injôk a Samaria akake khum jo, khana abuhlu jo.

² Ama’n Israel Reng Ahab hnenga ṭongkarôn mi khōpuia atir, “Benhadad in hing’hin ngekna anei,

³ nadangka leh sanahei, nanuhmeihei leh nasa ratha kaneipen hei kha ahnenga heipek roh,” anvati.

⁴ Ahab in amasôn, “Kakapu, Reng Benhadad hneng hripek ruh, kei kahnōm eng; kei leh kanei rakip nangta kaetheia kae.”

⁵ Hnunga ṭong karônpa kha Benhadad a inphut ngekna inkhat leh inṭhōia Ahab hneng he’nle nôk a ati: “Ke’n ṭong kahei tira nasana dangka, nanuhmei leh nasahei napek sik eng kae kalei ti jo.

⁶ Hei-achang inum tûnchu, nareng-innpui leh naṭōn karônhei inn akajongsōt sik, khana anmani’n mankatam neinâk antati rakip akachomsōt sik a kaṭōn karônhei kahei tir sik jo hei. Anmani jîng kania hiva phatak a anmani khana khan heikatlung sik hei.”

⁷ Reng Ahab in ram shunga hlamkakei rakip abek heia ahri, “Hiva mipa hin eini inhmang sik amadu jo me. Ama’n mi ahei tir heia kanuhmei, kasa, kasan a dangkahei ahei ngek eng, kei kahnōm jo eng.”

⁸ Hlamkakeihei leh mipui he’n anmasôn, “Ama kha heite donmak roh; namalung mandong mak roh.”

⁹ Khava jâra Ahab in Benhadad ṭong karônpa hneng amasôn, “Kakapu rengpa hneng hripek ruh, ahma inkeia angekna khachu kahnōm eng, tâk vōi 2 tlukna ngekna khachu hnōm tor mak eng.” Ṭong karônpa kha kase jo khana ṭonghlop inkhat leh he’nle nôk,

¹⁰ Benhadad a inphut ṭong ahei rôn, “Nang khōpui kavōk-khōi sik a mi katluk a kaheiṭhōi sik hei, khana khava hlunghei kha ankut vânga anchoisōt sik hei. Ke’n katlosōt mak inchu pathen he’n avōkthat hei rasoh!”

¹¹ Rn Ahab in amasôn, “Reng Benhadad hneng hri ruh, re kahrâng remi inkhat in retlo sōa inlensak, retlo mak hma inlensak phungmak.”

¹² Benhadad in Ahab masônna kha, ama inthōpui hei, vaikarôn ralak-hei leh anpōn-inna ju an-ina an-om laitak aleithei jo. Amihei hneng khōpui kha buhluna sik a intlukna sik ṭong apek jo hei, khava jâra anngirna hmun ansor jo.

¹³ Hiva pha hin sânkathem inkhat in Reng Ahab hneng kasea ahong hri, “Rōngpu’n ati, remi katamtak heiso ṭitmak hei roh! Tuning anchunga torna kha kapek sik che kae, khan chu kei hi Rōngpu eng kae ti hi nahong manhret sik kae.’”

¹⁴ Ahab in ader, “Re buhluna kha tu’n mo hlam akei sik?” Sânkathem in amasôn, “Ramṭhen vaikarônhei hlamkeina thōia ka-om remi khangther he’n khavakha antatlo sik kae.” Reng in ader nôk a, “Tu’n mo apui karônpen remihei kha hlam akei sik hei?” Sânkathem in amasôn, “Nang in nakei sik kae.”

¹⁵ Khava jâra reng in ramṭhen hlamkakeihei thōia ka-om khangtherhei kha abek mantûp hei, ankhenga 232 hei kae. Khava sōa Israel remi abek mantûp hei, ankhenga pase 7,000 hei kae.

¹⁶ Re buhlu kha sûnṭima anphut, Benhadad leh ama inṭangpui 32 hei kha rebuk a ju inruia an-omlai.

¹⁷ Khangther remihei kha hmapena kase hei. Benhadad in atirsōt remihei khan ahnenga thang ankōia, Samaria inphut remi kahong jo hei anti.

¹⁸ Ama’n ṭong amasōa, “Anmani re katlo sik anchanga, inchamna kahri sik anchanga, kahringa sur hei ruh,” ati.

¹⁹ Khangther remi he’n re hma ankeia, Israel remi he’n anjui heia kae,

²⁰ anmani inkha-khat in anta’ntukpui hei kha anthat heia kae. Syriahei katlân jo hei, Israel he’n rahnak a anhnong hei, tâk Benhadad chu shakor achōnga, shakor remi ṭhahrep hei leh katlânsōt jo.

²¹ Rn Ahab in hleipuk kha avahlōa, shakor leh shakor gâri asur heia kae, khana Syriahei chunga hme kasetak a torna anei heia kae.

²² Khava sōa sânkathem kha Reng Ahab hneng kasea ati, “Inle ina naremi vasyem kaṭha roh, khana mantlukna kaṭhadek a vanei roh, ajârchu Syria rengpa’n abân Zerkhō inchoi phatak a re ajōng kakōn nôk sik kae.”

Vōihni changna Syria Re Kōn

²³ Reng Benhadad ṭōnpui karôn he’n ahnenga anti, “Israelhei pathen chu chingtlâng pathen kae, hiva jâra anmani’n antator me kae. Phaichama re nitlo’nchu, eini’n nitor nger sik hei.

²⁴ Tûnchu, vaikarôn 32 hei kha losōt hei ruh khana ram thōia hlamkakei sik he’n manthleng hei ruh.

²⁵ Hivasōa nang ani kadahlon remi jahrep, shakor leh shakor gâri in-anghrep a bek mantûp nôk hei roh. Eini’n Israelhei hi phaichama re nituk sik hei, atunchu eini’n nitor sik jo hei.” Reng Benhadad in kahnōma anṭong mansena kha amajôm jo.

²⁶ Zerkhō a’nchoi pha Benhadad in aremi amantûp a, Israelhei chunga re katlo sik Aphek khōpuia injôk jo hei.

²⁷ Israelhei kha anbek mantûp heia revon invon jo hei; hmating insôn heia Syriahei leh hmai inhnget a rephōr inhnia intung hei. Israel remihei kha, ramhânga Syria remi kasip a aka-om hei kha leh nite hei pha, ke rup kasintek hei kapōa inhmu jo hei.

²⁸ Sânkathem inkhat Reng Ahab hneng kasea ahri, “Hivahi Rōngpu ṭonghri kae, ‘Syria he’n kei hi chingtlâng Pathen kae, phaicham ta changmak anti eng, ke’n anmani remi katamtak hei chunga torna kapek sik chei, nang leh namipui he’n kei hi Rōngpu eng kae tia nanmanhret sik eng.’”

²⁹ Ni 7 hi Syria leh Israelhei kha, hmai inhngettō heia anrekura ka-om hei. Ni 7 tluk ning khan re intlo jo hei, Israel he’n Syriahei kha 100,000 anthat hei.

³⁰ Akahring seng kha Aphek khōpui kalen shunga katlân hei, khana khan khōpui kur kachima remi 27,000 adehlon nôk hei. Benhadad um khōpuia hin katlân inhlut jo, inn inkhat achortinga den a inthup a ka-om.

³¹ Aṭōn karônhei ahnenga kase heia anhri, “Israel renghei chu lungset kathemhei tia kanthei. Keini borapōn kankhōna kansuia khana kanhrak a hrui kanrôna Israel rengpa hneng hlutna sik a ṭong apek roh, nahringkhō ahuk thei khet chea kae.”

³² Khava jâra ankhôna borapōn anjema, hrui anhrak a an-ora Ahab hneng kase heia anvahri, “Nasōk Benhadad in ahringkhō sik ngekna anei che.” Ahab in amasôn hei, “Ama tûn kapha alakahring mo? Kaṭha! Ama kha kei hneng chu sōpui inkhat kapō kae.”

³³ Benhadad sōk-hei khan akaṭha mêrchîkna anhngâk ṭhak a, Ahab in “sōpui” tia ahrisōt kha khava phatak a khan anmatua anhri jo, “Nang in nahri kapōa, Benhadad hi nasōpui kae!” Ahab in ṭong amasōa, “Kahnenga heiṭhōi ruh.” Benhadad kha aheitlung pha Ahab in ashakor gâria chōngpuina sik a abek jo.

³⁴ Benhadad in ahnenga ahri, “Kapa’n napa hnenga inphut alopek khōpui rakip kha kamale sik che, khana kapa’n Samaria khōpuia invei tlona hmun asyem kapōa nang in Damascus a nasyem thei sik a kae.” Ahab in amasôn, “Khavakha achang inchu, ke’n nang kamasō sik che.” Ama leh inhnōmtōna ansyema amanse jo.

Sânkathem in Ahab Themmô Apek

³⁵ Rōngpu ṭongpek dungjuia sânkathem rup-hei kâra inkhat in aloi sânkathem inkhat hneng aheivōk roh tia ṭong apek. Tâk inkhatpa khan hnōm mak jo,

³⁶ khava jâra ama’n inkhatpa hneng ati, “Rōngpu ṭongpek nang in najui mak jâra nang in kei nadahlon lim eng leh shabakkai inkhat in athat sik che kae.” Khana ama’n adahlon lim leh, shabakkai kahonga inkhatpa kha athat jo.

³⁷ Khava sōa hiva sânkathem hi ahlop inkhat hneng kasea ahri, “Kei eivō roh!” Hiva mipa hinchu avōk jo; inhnaktak a avōk a sânkathempa kha sungbi intôn jo.

³⁸ Sânkathem kha ahme thupna sik, ahmai kha pōn vâng akatoma, kasea hlam sira kangir, Israel rengpa hong sik kha aleihngâk a ka-om jo.

³⁹ Rengpa hlam a ahong pha, sânkathem in abek a ati, “Reng Kalûr, kei rehmun a re intuk enga remi inkhat in inrepui mi inkhat ahei sura kahnenga ahei thōia hinga ahri, ‘Hiva mipa hi hrung kaṭha roh, ama atlânsōt inchu khava sik a nang hringkhō napek sik kae, achangmak leh leichoia dangka 3,000 napek sik kae.’

⁴⁰ Tâk-kha ṭōn ralak a ka’nsaler kathi, mipa kha leikatlân jo.” Khava pha rengpa’n amasôn, “Nang karâkna sik kha nabinga na’nhri sōt jo, khava karâkna kha napek sik kae.”

⁴¹ Sânkathem khan ahmaia katōmna pōn kha ahliksōt jo, hiva phatak a hin rengpa’n ama kha sânkathem inkhat kae tia amanhret jo.

⁴² Sânkathem khan rengpa hneng ahri, “Hivahi Rōngpu ṭonghri kae: ‘Ke’n that sik a ṭongpek kanei jo mipa kha nang in namasō jo jâra, ama hringkhō kathlenga nang hringkhō napek sik kae, khana ama remihei namasō hei jâra nang remihei suk manhmang sik hei kae.’”

⁴³ Reng kha malung kana tak leh kachâmtak a Samaria a-inna inle jo.