RENGHEI INKHATNA 2 - LEKHARABU INTHENG (BSI)

Solomon hneng David Ṭong manse Achaina

¹ David kha athi sik ahnai jo pha, asapa Solomon abek a mansena anei:

² “Kei thina sik pha kahong jo. Inngam roh khana intluk roh,

³ Rōngpu na-Pathen in tlo sik a ṭong apek che kha tlo roh. Khova hmun a nasena nakhang touna sik a, Moses Dânrabu a a’nzet ama dân leh aṭongpek rakip kha jui roh.

⁴ Nang in ama najui inchu, kasōn he’n ama ṭongpek taksentak a anmalung leh anrathla akhenga anpek sōt a anjuilai seng, Israel chunga vai anrônṭhak sik tia Rōngpu’n kahnenga aleihri ale’ntepna kha anit sik.

⁵ “Ahlop inkhat laka-om nôk. Joab in Israel remihei hlamkakei 2 Ner sapa Abner leh Jether sapa Amasa athat heia kahnenga atlona eng hi nang in nanmandonsōt. Re tlolaia anmani’n mi thina antamasō kha re tlomakna, mōngna pha shunga phuhlōna athat heia kae. Ṭhenakasehei kha athat heia tûnchu ke’n khava antlona rahno kha karôn joa inreng eng.

⁶ Heimo tlo sik nang in namanhret; ama kha thi ngaia namanthi mak sik kae.

⁷ “Tâk-kha Gilead a Barzillai sapahei khachu lungset hei roh, ajârchu na-upa Absolom a inphut katlânsōt lai khan anmani’n lungset a anirôn eng.

⁸ “Khana Bahurim khōa Benjamin phung mi Gera sapa Shimei kha’m kae. Mahanaim kajōna kaselai ama’n kei ahâksêr eng, tâk Jordan tuidunga kei a’ntōpui eng lai khan, Rōngpu rahminga ama that mak ning tia ahnenga intepna kanei jo.

⁹ Tâk-kha ama hi karâk loa nadamak sik kae. Atloje kha namanhret, khavakha ama thina naman chang sik kae.”

David Thina

¹⁰ David kathi jo khana David khōpuia anvûm jo.

¹¹ Ama Israelhei reng kum 40 le’nṭang, kum 7 Hebrona, kum 33 Jerusalema vai aleirôn.

¹² Solomon in apa David kahlânga reng inṭang, khana arengram kha kahnettak a aphunsōt.

Adonijah Thina

¹³ Khava sōa Adonijah, anu chu Haggith kae, ama’n Solomon nu Bathsheba hneng vakase. Amanu’n ader, “Innshung changna nahong phâkna eng mo?” Ama’n amasôn, “Khanga kae.”

¹⁴ khana ahrisa a, “Heikhat der sik chea kanei,” ati. Amanu’n ader, “Heimo kae?” ati.

¹⁵ Ama’n amasôn, “Kei hi reng akachang dôr eng kae ti namanhret khana Israel mi rakip inum khanga anleimandon. Tâk-kha akaletting kasōk jo, kanaipa reng kachang jo, ajârchu hivahi Rōngpu lungdo kae.

¹⁶ Khana tûn ngek sik che inkhat lim kanei; hnōm mak atlopek mak roh.” Bathsheba’n ader, “Heimo kae?”

¹⁷ Ama’n amasôn, “Shunema nuhmei Abishag hi kanuhmei sik a, lungsettak a Reng Solomon hneng aderpek roh, nahnenga chu dâng timak ning ti kamanhret.”

¹⁸ Amanu’n amasôn, “Kaṭha hêr jo. Nang sik a rengpa hneng kahri sik.”

¹⁹ Khava jâra Bathsheba reng hnenga kasea Adonijah kahlanga ṭong avahri jo. Rengpa kha anu chibei buk sik a kangirsōt a, ahnenga inkun. Hivasōa areng in-ongna in-ong jo, khana in-ongna sik inkhat anheichoia anu kha Solomon changting in-ong jo.

²⁰ Amanu’n ahri, “Ke’n nahnenga ajingte der sik kanei; kei ṭong hi hnōm mak tlomak roh.” “Heimo kae, Anu,” tia ader? Ke’n hnōm mak tlomak ning.”

²¹ Amanu’n amasôn, “Na-upa Adonijah’n Abishag hi anuhmeia inlo jo rasoh.”

²² Rn in amasôn, “Heisik jâr pena mo ahnenga pek sik a Abishag nader eng?” Kareng inchang hi’m ama pekna sik a nader thei eng kae. Hei-achang inum ama chu ka-u kae, khana Abiathar leh Joab ama langting ka-om heia kae!”

²³ Khava sōa Solomon in Rōngpu rahminga intepna anei, “Tuning Adonijah’n hivahi ader eng jâra ahringkhō leh kathlengmak inchu Rōngpu’n kei avōk hlon rasoh!”

²⁴ Kapa David reng in-ongna hin Rōngpu’n kei kahnet a aphunsōt jo eng; a’ntepna kha anit a kei leh kasōnhei hneng rengram kha apek jo ung. Tuningtak hin Adonijah akathi sik kae tia akahring Rōngpu rahminga intep eng!” ati jo.

²⁵ Khava jâra Solomon in Benaiah hneng ṭong apek a, vakasea Adonijah kha avathat jo.

Abiathar Hnongsōtna leh Joab Thina

²⁶ Khava sōa Reng Solomon in Abiathar thempu hneng ahri, “Nang naram shunga Anathoth ting inle roh. Nang akathi sik a rahōi jo che kae, tâk tûnchu that mak che rong, ajârchu kapa David hring lai Rōngpu Intepna Bôm ka-ensui che kae, khana akhōdeng theina rakip a nalei thōkpuia kae.”

²⁷ Khava sōa Solomon in Abiathar kha Rōngpu thempu ale’nṭang kha amanbâng jo, hing’hin Rōngpu’n Shiloa Eli leh asōnhei sik a ahrina kha katlung joa kae.

²⁸ Omchen kasōk kha Joab in athei jo. (Ama’n Absolom changloa, Adonijah ale’nṭangpui.) Khava jâra Rōngpu omna Pōn-inn shunga katlân inhlut a maichâm raki amatua ka-om jo.

²⁹ Joab in pōn-inna atlân inhlut a maichâm hnenga a-omna ṭong hi Reng Solomon hneng atlung jo pha, Solomon in mi inkhat atira heisa mo maichâma akatlân inhlut ti kha ajōng mander. Solomon aṭit jâra ama Rōngpu hneng akatlân kae tia Joab in amasôn. Khava jâra Reng Solomon in Joab kathat sik a Benaiah atir jo.

³⁰ Ama Rōngpu omna pōn-inna kasea Joab hneng ati, “Reng in heisōk roh tia ṭong apek che.” Joab in amasôn, “Dâng, kei hin akathi sik eng kae.” Benaiah kha reng hneng inlea Joab ṭonghri kha ava manthei nôk.

³¹ Solomon in amasôn, “Joab tahri kapōa vatlo jo roh. That ina vûm roh. Khava sōa chu kei leh David sōn inkhatbek in Joab in ṭhenakase hei athat hei jâra rahno kha rônmak jo ning.

³² Kapa David manhretna omloa khava mi athat hei jâra, Rōngpu’n Joab kha akarâk sik kae. Joab in ama kanek a mikaṭha, ṭhenakase 2 aleithat hei: Abner, Israel remi hlamkakei, khana Amasa, Judah remi hlamkakei.

³³ Anmani thatna jâra karâkna kha Joab leh asōnhei chunga ahei tik a akatla sik kae. Tâk-kha David leh asōnhei, areng in-ongna a’n-ong hei chunga hmesōna kha apek sik hei.”

³⁴ Khava jâra Benaiah kha Rōngpu omna pōn-inna kasea Joab kha athat jo, ramhânga ama inna khan avûm jo.

³⁵ Reng in Joab inṭangna hmun a Benaiah kha remi hlamkakei amanṭang jo khana Zadok thempu ṭōnhmun a Abiathar amanṭang jo.

Shimei Thina

³⁶ Rengpa’n Shimei ava manbek heia ahri, “Jerusalema nang sik a inn insak roh. Khana khan om roh khana khōpui kha dahlon mak roh.

³⁷ Nang vâng nasesōt a, Kidron kavadung rekhat narakan inchu akathi nger sik che kae, nang nabinga rahno narôn sik kae.”

³⁸ Shimei in amasôn, “Kaṭha hêr jo, Reng Kalûr. Naṭong hri kha ke’n katlo sik.” Hiva jâra ama Jerusalema pha kasôttak leika-om.

³⁹ Kum thum sōa, Shimei sōk 2 hi Gath rengpa, Maacah sapa Achish hnenga katlân jo hei. Gath khōa ka-om hei tia Shimei in athei pha,

⁴⁰ ama’n shakōrtung achōnga Gath a Reng Achish hneng, asōk-hei kajōnga kase jo. Ahmu heia inna aheiṭhōi male hei.

⁴¹ Shimei in atlona hei kha Solomon in athei pha,

⁴² ama hneng mi atira ati, “Nang in Jerusalem nadahlon makna sik a Rōngpu rahminga intepna naleinei. Khana nang in nadahlon inchu akathi nger sik che kae tia ṭong kaleipek che. Hivahi leihnōm mak che mo khana kei hi najui sik enga leihri mak che mo?

⁴³ Achang inchu, heisa mo naṭongtepna kha nasuk khōi, khana kaṭong pek che najui mak?

⁴⁴ Kapa David hnenga naleitlo ṭōnse rakip kha kaṭha namanhret. Khava sik a Rōngpu’n akarâk sik che kae.

⁴⁵ Tâk-kha kei chu mahâmṭhat apek sik eng, khana David rengram kha aheitik a aka-un ṭhak sik.”

⁴⁶ Hivasōa rengpa’n Benaiah ṭong apek a, ama kasea Shimei kha avathat jo. Tûnchu Solomon in pui katluk a akut a heirakip ada jo.