RENGHEI INKHATNA 18 - LEKHARABU INTHENG (BSI)

Elijah leh Baal Sânkathemhei

¹ Pha bongkhat sōa, khōkang kum 3 changna, Rōngpu’n Elijah hneng ati, “Se roh natak khet Reng Ahab hneng va’nlâr roh, khana ke’n khō kahei tir sik jo.”

² Khava jâra Elijah kha se aphut jo. Samaria ram a ṭâm kha inhnak hêra kae,

³ khava jâra Ahab in reng-innpui aka-ensui inṭang Obadiah kha abek. (Obadiah kha Rōngpu kaṭit mi leikae,

⁴ khana Jezebel in Rōngpu sânkathemhei athat lai hei, Obadiah hin sânkathem 100 aṭhōi heia, 50 et a hlungkōk inhnia athup heia antasâk sik bu leh tui avathak hei.)

⁵ Ahab in Obadiah hneng ahri, “Eini se me sona ram shunga tuiripût leh tuidung shung va-en hei rih, shakor leh shakōrtung hei hringna sik a kahar vajong rih. Ranhei hi ankhenga manthipet loa ka-om thei khet sik heia kae.”

⁶ Anmani ramṭhen et a anse sik kha kahnōm heia ramkei ahlop-hlop a se anphut jo.

⁷ Obadiah kha khanga aselai manhret manloa Elijah leh intō jo hei. Ama kha amanhret a inkuna ahmai kunga akamuk, khana ader, “Apu, nangkhet che mo?

⁸ Ama’n amasôn, “Ôk, kei Elijah eng kae. Se ina nakapu Ahab hneng kei hin ka-om eng tia vamanthei roh.”

⁹ Obadiah’n amasôn, “Ke’n heimo katlo joa Reng Ahab in athat sik enga namadu eng?

¹⁰ Akahring ṭhak Rōngpu Pathen kapan a kahri kae, rengpa’n nang hi raleichunga ram rakip a ajong che kae. Ram vaikarôn he’n anram shunga nang om mak che anti’nchu, Ahab in vaikarônhei kha nang ahmu makna che kha manchênna sik amanhâkser hei kae.

¹¹ Khana tûnhin kei kase leh nang hin ka-om che tia avakahri sik namadu eng mo?

¹² Kei kasesōt lim leh Rōngpu rathla’n manhret theiloa ram inkhat a aṭhōisōt che’nchu heikhong sik? Khana, ke’n Ahab hnenga nang hin ka-om che tia kahri pek pha, ahmutor mak che’nchu, ama’n athat sik jo eng. Kei naipang kachang laia inphut Rōngpu kaṭittak a a’nmuk eng kae mandon roh.

¹³ Jezebel rengnu’n Rōngpu sânkathemhei athat lai khan anmani 100 kha, 50 et a rup hnia hlungkhur shunga kathup hei, khana bu leh tui kaleithak hei kha theimak che mo?.

¹⁴ Khava jâra heikhong inmo reng hnenga sea nang hin ka-om che tia ṭong akahri pek sik a ṭong napek tor eng? Ama’n athat sik eng!”

¹⁵ Elijah’n amasôn, “Ke’n karazen akahring Rōngpu kapan a kei a’ntep eng kae, tuning katak khet rengpa ângkunga a’nlâr sik eng kae.”

¹⁶ Khava jâra Obadiah kha Reng Ahab hneng kasea ava manthei, khana ama kha Elijah inhmupui sik a kasesōt jo.

¹⁷ Ahab in ahmu pha, “Israel shunga akaṭhamak tak inrimna katlo nang hin ka-om jo che!”

¹⁸ Elijah’n amasôn, “Tlo manrimna katlo kha kei changmak eng. Nang che kae, nang leh napa chei kae. Nangni’n Rōngpu ṭongpek juimak cheia Baal limsyem nantakamuk kae.

¹⁹ Tûnchu Carmel tlânga kei inhmupui sik Israel mipui ṭong pek hei roh. Rengnu Jezebel in avei hei Baal sânkathem 450 leh Asherah pathennu sânkathem 400 hei heiṭhōisa hei ruh.”

²⁰ Khava jâra Ahab in Israel mihei leh Baal sânkathemhei Carmel Tlânga abek mantûp jo hei.

²¹ Elijah kha mipui langting kaketoua ahri, “Nanmalung syemsōtna sik a heituk kasôt mo alaka-om sik chei? Rōngpu hi Pathen achang inchu, ama kamuk ruh; khana Baal hi Pathen achang inchu, ama kamuk ruh! Tâk-kha mipui he’n ṭong inkhatbek hrisōt mak hei.

²² Khava pha Elijah’n ahri, “Rōngpu sânkathem aka-om hi kei rōk jo eng kae, tâk Baal sânkathem chu 450 hin ka-om hei.

²³ Sehratche 2 heikei ruh; Baal sânkathem he’n inkhat that heisona inlo hei rasoh, khana tuk rabun hei sona thingbuk chunga da hei rasoh, hmei chu mansûk mak hei rasoh. Sehratche inkhat kha ke’num khanga katuk rabuna kada sik.

²⁴ Khava sōa Baal sânkathem he’n an-pathen hneng der hei rasoh, ke’num Rōngpu hneng kader sik, derna amasôna hmei ajōng katir kha Pathen kae.” Mipuihei khan kahnōm heia ka-ông jo hei.

²⁵ Hivasōa Elijah’n Baal sânkathemhei hneng ahri, “Nangni mi nantam jâra, nangni’n sehratche inkhat lona sik mantluk masa ruh. Nan-pathen hneng der ruh, tâk thinga chu hmei mansûk mak ruh.”

²⁶ Anhnenga anta heikei sehratche inkhat kha anloa anmantluk a Baal hneng sûnṭim katlung ander jo. Anmani ka-ông heia, “Baal, amasôn roh!” antia antasyemsōt maichâm hnenga kalâm hei. Tâk masônna heite jōngmak.

²⁷ Sûnṭim ahongtluk jo pha Elijah khan amanuisō jo hei: “Rahnaktak a beruh! Ama kha Pathen inkhat kae. Mandonna aneilaitak mo, khana a’nhnga laitak mo, khōhmea asesōt laitak mo kachang thei! Achangmak leh akaje kachang thei, khava jâra nantamathōi sik kae!”

²⁸ Khava jâra sânkathemhei khan kare inhrekdet a anleider khana anmani bekdân kapōa thisen alōngmak kârseng chemcha vânga antaksa ankarittana kae.

²⁹ Kani sûnṭim akhe jo katlunga hnuknat leh thangtôma rasa anneiṭhak a kae; tâk masônna inkhatbek hongmak, kare rasa inkhatbek um intheimak jo.

³⁰ Khava sōa Elijah’n mihei hneng ahri, “Kahnenga heihnai ruh,” khana ankhenga ahnenga intûp jo hei. Ama’n Rōngpu maichâm anset kha asyem manṭhat a kae.

³¹ Ama’n hlung 12 alo, inkhat et kha Rōngpu’n Israel tia rahming aleiphō, Jacob sapa 12 hei phung rahminga aphō jo hei.

³² Khahei vâng khan Rōngpu kamukna maichâm asyem jo. Khava kimvea a tui litre 14 kapō akan tuikhông achoa kae.

³³ Hivasōa maichâm chunga thing kha ada, sehratche kha atuk rabun khana thing chunga ada. Ama’n ati, “Bephu 4 tui mansip ruh, inthoina leh thing chunga sunthlōn ruh.” Anmani’n khanga antlo jo,

³⁴ khana ama’n ati, “Avea tlo nôk ruh,” anmani’n khanga antlo nôk jo. Ama’n ati nôk, “Vōi khat tlo nôk ruh,” anmani’n anleitlo nôk.

³⁵ Tui kha maichâma inphut heikalōng inthla a akimvea tuikhông kha kasip jo.

³⁶ Sûnṭimsōa inthoina pha khan sânkathem Elijah’n maichâm kha ahei hnaia derna anei jo, “O Rōngpu Abraham, Isaac, Jacob Pathen, tûnhin kei Pathen nachangna leh kei nasōk kachangna khana nang ṭongpek a hihei rakip hi katlo kae ti hi jōng malâr jo roh.

³⁷ Hiva mihei hin Rōngpu nang hi Pathen che kae khana nahnenga anmani naheiṭhōi male hei kae ti hi manhret hei rasoh.”

³⁸ Rōngpu’n hmei ajōng mathlâk jo, khava khan inthoina, thing leh hlunghei khana ralei katlunga akâng jo khana tuikhônga tui kha kachârsō jo.

³⁹ Mipui he’n khavakha anhmu pha raleia inkun heia ka-ông heia anhri, “Rōngpu hi Pathen khet kae; Rōngpu rōk hi Pathen kae!” anti.

⁴⁰ Elijah’n ṭong amasō, “Baal sânkathemhei kha sur hei ruh; anmani inkhatbek um mantlânsōt mak hei ruh!” Mipui he’n ankhenga ansur hei, khana Elijah’n anmani kha Kishon Tuidunga aṭhōisōt heia athat jo hei.

Khōkang Bângna

⁴¹ Khana Elijah’n Reng Ahab hneng ahri, “Tûnchu se’na sâk leh in vatlo jo roh. Ke’n khō inri rasa akahong kathei jo.”

⁴² Ahab khan akasâk sik a aselai, Elijah kha Carmel Tlâng chunga kaketou jo, khava hmun a ake inhni kâk a alu ada a, raleia inkuna kae.

⁴³ Ama’n asōkpa hneng ahri, “Se’na tui-ôngpui langa va-en roh.” Asōkpa kha kasea he’nlea ati, “Heite hmumak eng.” Vōi 7 Elijah’n se’na va-en roh atipek.

⁴⁴ Vōi 7 tlukna khan chu ama he’nlea ati, “Mihring kutpha kakhemak sumtuk tui-ôngpuia inphut ahong kaketou kahmu.” Elijah’n asōkpa hneng ṭong apek, “Ahab rengpa hneng se roh khana ashakor gâria achōng leh khōsûr in aphâk mak hma inna a’nlena sik vahri pek roh.”

⁴⁵ Bongkhat kâra khan marvân kha sumtuk kadup in amakhu jo, thli kahrâng inphut jo, khana inhnaktak a khōsûr aphut jo. Ahab kha ashakor gâri achōnga Jezreel ting inle jo.

⁴⁶ Elijah chunga Rōngpu rathahrat jōng katlung jo; apōn vâng akhon kahnet a akhit a Ahab akhehlona Jezreel katlunga katlâna kae.