RENGHEI INKHATNA 16 - LEKHARABU INTHENG (BSI)

¹ Rōngpu’n Hanani sapa Jehu sânkathem hnenga ṭong ahri khana hiva ṭong hi Baasha sik a aleipek:

² “Nang heite changmak che, tâk ke’n kami Israelhei hlamkakei kamanchang che. Tûnchu Jeroboam kapōa kaset jo che khana kamipuihei setna naṭhōi manhlut jo hei. Anmani setna khan kahnuk natna kachang jo,

³ khava jâra Jeroboam hnenga kaleitlo kapōa, nang leh na-innshung kei leh a’nṭhen sik jo me kae.

⁴ Na-innshung mi khōpui shunga akathi rakip uihe’n ansâk sik hei, khana ramhânga ankathi rakip hmuthong he’n ansâk sik hei.”

⁵ Baasha’n aleitlo rakip khana avak ṭhatna aleitlo hei kha Israelhei Thuhming Rabua inzet heia kae.

⁶ Baasha kha kathia Tirza a anhre jo, khana asapa Elah khan arengchang athleng jo.

⁷ Baasha khan Rōngpu dōina setna atlo jâra khava ṭong kha Baasha chunga Rōngpua inphut sânkathem Jehu hneng ale’npek kae. Ama mak hma a Reng Jeroboam taleitlo kapōa ṭhatmak atloa Rōngpu hnuknat akachōr rōk kha changmak, ama’n Jeroboam innshung rakip athatsa heia kae.

Israelhei Reng Elah

⁸ Judah hei Reng Asa vairônna kum 26 tlukna shunga, Baasha sapa Elah khan Israelhei reng hongkachang, khana ama’n Tirza a kum 2 vai aleirôn.

⁹ Rengpa shakor gâri aṭimkhat ka-ensui ṭōnpui karôn inkhat, Zimri khan achunga lungthim atloa kae. Tirza a ni khat Elah kha reng-innpui ka-ensui Arza intipa inna ju le’nruia kae.

¹⁰ Zimri kha innshunga kahlut a Elah kha athat jo, khana arengchang kha athleng jo. Hivahi Judah Reng Asa vai rôna kum 27 tlukna shunga kae.

¹¹ Zimri khan reng ahongchang tak leh Baasha innshung rakip athat jo hei. Innshunga pase leh aṭhōn changpui rakip athat jo hei.

¹² Khang’khan, Rōngpu’n Jehu sânkathem hnenga Baasha chunga aleihri dungjuia, Zimri’n Baasha innshung rakip athat jo heia kae.

¹³ Anmani limsyem kamukna leh Israelhei setna ting anṭhōi manhlut hei jâra Baasha leh asapa Elah khan Rōngpu, Israelhei Pathen kha ahnuk anmannat pek jo.

¹⁴ Elah’n aleitlo rakip Israel Renghei Thuhming Rabu shunga inzet a kae.

Israelhei Reng Zimri

¹⁵ Judah Reng Asa vai rôna kum 27 tlukna shunga, Zimri’n Israelhei chunga Tirza a ni 7 vai aleirôn. Khava lai Israel remi rup he’n Philistihei Gibbethon khōpui ankakekhuma kae,

¹⁶ Zimri’n reng chunga lungthim atloa athat jo ti ṭong anmani’n anthei pha, khana khava hmun bât a khan anmani rehlam kakeipa Omri kha Israelhei reng kachang jo tia anphông jo.

¹⁷ Omri leh aremi rup he’n Gibbethon andahlona Tirza anvakekhum jo.

¹⁸ Khōpui kha katlu jo ti Zimri’n ahmu pha, ama kha reng-innpui ashungpena rekur shunga kahlut jo, khana reng inn kha hmei aro jo, khana hmeimalea khan kathi jo.

¹⁹ Hivahi Rōngpu chunga aset jâra akasōk jo kae. Ama mak hma a reng Jeroboam kapōa ama setna leh Israelhei setna langting aṭhōi manhlut hei jâra Rōngpu kha mantlaimak a kae.

²⁰ Zimri’n aleitlo rakip, kha ama lungthim tlona leh inṭhōia, Israel Renghei Thuhming Rabua inzet a kae.

Israelhei Reng Omri

²¹ Israel mipuihei hi rup inṭhen jo hei: ṭhahrep he’n Ginath sapa Tibni kha reng anmanchang hnōm, khana ahlop he’n Omri anmadu.

²² Achaina chu, Omri indu hei khan antor jo hei; Tibni kha kathi joa Omri reng kachang jo.

²³ Khava jâra Judah Reng Asa vai rôna kum 31 tlukna shunga, Omri kha Israelhei reng hongkachang, ama’n kum 12 vai aleirôn. Ahma kakei kum 6 kha Tirza inphut vai arôn,

²⁴ khava sōa Samaria hmebung inkhat Shemer intipa hnenga inphut dangka 6,000 apek a arachôk. Omri’n hmebung kha rekur atukkhum, khana khan khōpui asyem, khana khavakha ahma kakei akapupa Shemer rahming aloa Samaria tia aphō jo.

²⁵ Omri’n ama mak hma a renghei kanek a Rōngpu dōina setna atlo jo.

²⁶ Ama mak hma a Jeroboam kapōa, ama setna leh mipuihei setna langting aṭhōi hei jâra Rōngpu Israelhei Pathen kha ahnuk amannat pek jo.

²⁷ Omri’n aleitlo rakip khana hme aleisōna rakip Israel Renghei Thuhming Rabu shunga inzet heia kae.

²⁸ Omri kha kathia Samaria anhre jo, khana asapa Ahab in arengchang kha athleng jo.

Israel Reng Ahab

²⁹ Judah Reng Asa vai rôna kum 38 tlukna shunga Omri sapa Ahab kha Israelhei reng hongkachang, ama’n Samaria a kum 22 vai aleirôn.

³⁰ Ama hma renghei kanek a setna aleitlochet a kae.

³¹ Rn Jeroboam kapōa aset tlo rōk khan leitluk mak; akakhea atloa Sidona Reng Ethbaal sanu Jezebel a-ompuia Baal akamuk a kae.

³² Ama’n Samaria a Baal bek-inn asyem, maichâm asyempek, khana bek-inn shunga ada manhlut.

³³ Asherah pathennu limsyem kha’m adasa. Ama hma aleika-om Israel reng rakip hei kanek a Rōngpu, Israelhei Pathen hnuk natna sik akakhea atlosōt a kae.

³⁴ Ama vairônna shunga hin Bathel a Hiel in Jericho kha asyem manther. Rōngpu’n Nun sapa Joshua hneng aleihridek jo kapōa, Hiel in Jericho innhmun adeng pha asapa upapen Abiram kathipek a kae, khana asapa mathlum pen Segup kha khōpui kekot-hei asyem lai kathipek a kae.