RENGHEI INKHATNA 14 - LEKHARABU INTHENG (BSI)

Jeroboam sapa Thina

¹ Khava lai khan Reng Jeroboam sapa Abijah kana a leika-om.

² Jeroboam in anuhmei hneng ati, “Tu inkhat in anmanhret makna sik che nahme thup roh, khana kei hnenga reng akachang sik che kae anilei kati Ahijah thempu omna Shiloa vase roh.

³ Buhlom 10, khana khōihning kōklei inkhat choi pek roh. Khana ahnenga nisapa chunga heimo akasōk sik der roh, khana ama’n amanthei sik che.”

⁴ Khava jâra amanu Ahijah inn Shiloa vakase jo. Kater achang jâra Ahijah kha ahmit hmumak jo.

⁵ Rōngpu’n ahnenga Jeroboam hnumei in asapa dammak chungchânga akader sik a kahong tia anhri pek. Khana Rōngpu’n Ahijah hneng heimo hri sik amantheia kae. Jeroboam nuhmei kha ahong tlung pha, mi inkhat kapōa inhlemsak a kae.

⁶ Tâk-kha amanu hong kha Ahijah’n athei pha, ama’n ati, “Heihlut roh. Nang Jeroboam nuhmei che kae, kamanhret che. Heisa mo mihlop a’nhlemsak che? Nang sik a ṭong kaṭhamak kanei.

⁷ Se roh Jeroboam hneng hivahi Rōngpu, Israelhei Pathen in ahnenga ahri kae tia manthei roh: ‘Mipuihei kâra inphut ke’n kakadei che khana kami Israelhei vai karôna kasyem che.

⁸ Ke’n David sōn heia inphut rengram hi kalosōt a nahnenga kapek che. Tâk-kha kei manṭhatna rōk akatlo, kaṭong pek kajui, kasōk David kapōa changmak jo che.

⁹ Nang hma vaikarônhei kanek a setna kalen chet natlo joa kae. Nang in nadahlon enga kamuk sik a limsyem leh thir limhei nasyem heia kahnuk namannat a kae.

¹⁰ Hiva jâra hin nang phung hruia inrimna kahei choi sik kae khana nasōn paseseng kathatsō sik kae, upa leh naipang ankhenga. Na-inn shunga inphut inkâr sik eng; anmani kha ek kapōa hlonsōt sik hei kae.

¹¹ Na-innshung mi khōpui shunga akathi rakip kha uihe’n ansâk sik hei, khana ramhânga akathi rakip kha muthong he’n ansâk sik hei. Rōngpu ke’n kahri jo kae.’”

¹² Khana Ahijah khan Jeroboam nuhmei hneng ahri manjōm a, “Tûnchu inna inle jo roh. Khōpui kha natlunglim leh nasapa kha kathi sik.

¹³ Israel mipui in ṭajai ansui sik khana anvûm sik. Ama rōk kha Jeroboam innshunga injentak a antahre kha kachang sik, ajârchu ama rōk chunga Rōngpu Israelhei Pathen in tlaina anei kae.

¹⁴ Jeroboam phunghei rengchang inbâng sik a Rōngpu’n Israelhei chunga reng inkhat ada sik.

¹⁵ Rōngpu’n Israel akarâk sik, amanu hi kava dunga pengkung kapōa innok inthing sik. Hiva anpu sōnhei aleipek ram kahōia inphut anrajung aphuksōt sik, khana Euphrates Tuidung rekhat ting akathek manchai sik hei, ajârchu pathennu Asherah lim ansyema ahnuk anmannat pek joa kae.

¹⁶ Rōngpu’n Israel hi adahlon sik, ajârchu Jeroboam in setna atloa Israel mipuihei hi setna shunga aṭhōi manhlut heia kae.”

¹⁷ Jeroboam nuhmei kha Tirza ting inle jo. A-inn ahlut lim leh, naipang kha kathi jo.

¹⁸ Israel mipui he’n, Rōngpu’n asōk Ahijah sânkathem hnenga aleihri kapōa, ama sik ṭajai ansuia anhre jo,

Jeroboam Thina

¹⁹ Reng Jeroboam in aleitlo rakip, are leituk, heikhonga vai aleirôn, khahei seng kha Israel Renghei Thuhming Rabua inzet a kae.

²⁰ Jeroboam in kum 22 reng inkhat a vai aleirôna kae. Ama kathia anvûm jo, khana asapa Nadab in arengchang athleng jo.

Judah Reng Rehoboam

²¹ Solomon sapa Rehoboam kha Judah reng ahongchang pha khan kum 41 katluk jo, khana Rōngpu’n ama kamukna sik a Israelhei ram pumpuia inphut akadeisōt khōpui, Jerusalema kum 17 vai arôna kae. Rehoboam nu kha Ammon a inphut Naamah inti.

²² Judah mipui he’n Rōngpu kadōia setna anleitlo jo khana anpu sōnhei taleitlo kanek a kakhe chet a antloa anchunga ahnuk natna kha kachōr joa kae.

²³ Akadik mak pathenhei kamukna hmun ansyem hei, khana hlung kacho anmatunga Asherah limsyem tlâng chunga leh thingkung thōi heia kamukna sik a antâr hei.

²⁴ Akaṭhamakpen khachu, khava khōvelhei kamukna hmun heia khan nuhmei leh pase noti ṭōnkatlo ka-om heia kae. Israel he’n hma an-omchen Rōngpu’n aleihnongsōt mipuihei taleitlo inzakpui ka-om rakip kha Judah mihe’n antlo joa kae.

²⁵ Rehoboam vai rôna kum 5 tlukna Egypt a Reng Shishak in Jerusalema abuhlua kae.

²⁶ Bek-inn shunga karōi rakip khana reng-innpui shunga Solomon tasyem sana pho inveina achomsō pet a kae.

²⁷ Khahei thlengna sik a, Reng Rehoboam in sum-êng pho asyema reng-innpui kekot kahrung ka-ensuihei hneng apek sōt jo hei.

²⁸ Rengpa’n Bek-inna ase akaia, kekot kahrung he’n pho hei kha anmatu, khana ahrungna den shunga anda male nôk hei.

²⁹ Reng Rehoboam in aleitlo rakip Judah Renghei Thuhming Rabua inzet a kae.

³⁰ Hiva pha shung senga hin Rehoboam leh Jeroboam kâra re le’ntuk ṭhak hei.

³¹ Rehoboam kathia David khōpuia reng thlânpuia anhre jo, khana asapa Ahijah’n arengchang kha athleng jo.