RENGHEI INKHATNA 13 - LEKHARABU INTHENG (BSI)

¹ Rōngpu ṭongpek dungjuia Judah inphut sânkathem inkhat Bethel a vakase khana Jeroboam in khana khan inthoina tōk sik a angirlai khan vakatlung jo.

² Rōngpu ṭongpek kha ajuia, sânkathem khan maichâm kha amaset a ati, “O maichâm, maichâm, Rōngpu’n ṭong ahri kha hi kae: Naipang inkhat arahming Josiah inti David innshunga hong inte sik, Ama’n nachunga hiva khōvelhei maichâma ṭōn inzen inthoina katōk thempuhei hi athat sik hei, khana nachunga mihring ruhei aro sik hei kae.”

³ Sânkathem khan abân ahri nôk a, “Hiva maichâm hi ahar-ahak a kakōi sik, khana achunga ravut hei inchai kathek sik. Khava sōa Rōngpu’n kei hneng ṭong ahri ti kha namanhret sik jo.”

⁴ Reng Jeroboam in hivahi athei pha, ahnenga akut akhinga ṭong apek hei, “Khava mipa kha sur ruh!” ati. Khava phatak khan rengpa kut kalâng kha kathi joa katumthei nôk mak jo.

⁵ Sânkathem in Rōngpu rahminga ahri kapōa maichâm kha manhret manloa ahar-ahak a kakōi jo khana achunga ravut hei kha’m raleia inthek inchai jo.

⁶ Reng Jeroboam in sânkathem hneng ati, “Kakut hi adam nôkna sik Rōngpu na-Pathen hnenga aderpek roh!” Sânkathem khan Rōngpu hneng ader a, rengpa kut kha kadam jo.

⁷ Hivasōa reng in sânkathempa hneng ati, “Kei leh inna se rih heikhat vasâk hi roh. Naṭōn tlona jâra tloman kapek sik che.”

⁸ Sânkathem khan amasôn, “Nanei rakip aṭimkhat kei napek eng inum, nang leh inṭhōia semak ning khana heite inkhat sâk leh in tlosap mak ning.

⁹ Rōngpu’n heite sâk leh in tlothei mak tin tia ṭong apek eng, khana kahongna hlam a khan he’nle theimak tin ati.”

¹⁰ Khava jâra ahongna hlam a khana inlemak a ahlop inkhat a inle jo.

Bethel a Sânkathem Kater

¹¹ Khava lai khan Bethel a sânkathem kater inkhat leika-om. Asahei kahong heia Judah sânkathem khan khava ning Bethel a heimo atlo khana Reng Jeroboam hneng heimo ahri ti kha anhri pek.

¹² Sânkathem katerpa khan anhnenga ader hei, “Ama kha ase pha khova hlam mo ahro?” Anmani’n hlam kha anmanthei.

¹³ khana ashakōrtung chōng sik antamantluk sik a amanthei hei. Anmantluk pek a achunga kachōng jo

¹⁴ Judah ram a sânkathem ajuia sasōkung inkhat thōia ale’n ong kha avahmu jo. “Judah ram a sânkathem kha nang che mo?” tia ader. Mipa khan amasôn, “Kei eng kae.”

¹⁵ Ama’n ati, “Ka-inna hong roh, bu sâk hi rih.”

¹⁶ Tâk-kha Judah ram a sânkathem khan amasôn, “Nang inna kei sethei mak ning, khana nang mi ralam theina kha’m rahlâng tor mak ning. Khana hinahin nang leh sâk leh in tlosap theimak ning,

¹⁷ ajârchu Rōngpu’n sâk leh in tlothei mak tin che tia ṭong apek eng, khana kahongna hlam a khan hong inle theimak tin che tia ati eng.”

¹⁸ Khana Bethel a sânkathem katerpa khan ahnenga ati, “Kei um nang kapōa sânkathem inkhat eng kae, khana Rōngpu ṭongpek a ngeva inkhat in kahnenga ahri pek eng dungjuia nang hi ka-inna kaṭhōi chea sâk leh in pek sik chea ahei tir eng kae.” Sânkathem katerpa khan maleiseia ahri kae.

¹⁹ Judah ram a sânkathem kha sânkathem kater kha leh kase heia ansâk an-in jo.

²⁰ Anmani’n bu ansâk a an-omlai sânkathem katerpa hneng Rōngpu ṭong kajōng jo,

²¹ ama’n Judah ram a sânkathempa hneng ka-ônga, ahri “Rōngpu’n aṭong juimak jo che khana aṭongpek tlosōt mak jo che ati.

²² Khava kanek a ama’n sâk mak roh ati kha inle nôk chea nasâk jo khava jâra nang akathi sik che kae, nakalōng kha na-innshunghei thlânpuia invûm mak tin che.”

²³ Sâk leh in kha a’nchai jo pha sânkathem katerpa khan Judah sânkathempa tachōng sik a shakōrtung amantluk pek jo,

²⁴ ama kasesōt jo. Ahlam hrona shabakkai inkhat a’ntōpuia athat jo. Akathi kalōng kha hlamlena inthlonga ka-om, ahnenga shabakkai leh shakōrtung hei kha kangira ka-om hei.

²⁵ Mi ṭhahrep khava hnenga kase he’n hlamlaia kathi kalōng inthlonga a-om leh ahnenga shabakkai kangira a-om kha anhmua kae. Anmani’n omchen kasōk antahmu kha Bethel a anvahri jo.

²⁶ Bethel a sânkathem katerpa khan hiva ṭong hi athei pha hinga ahri, “Khavakha Rōngpu ṭongpek kajuimak sânkathem kae! Rōngpu’n tlo sik a ahri kapōa, Rōngpu’n shabakkai kha ama kabuhlua akathat sik a ajōngtir kae.”

²⁷ Hivasōa ama’n asapahei hneng ahri, “Kashakōrtung kha shapher adapek ruh.” Asa he’n anmantluk pek jo,

²⁸ khana achōnga sânkathem kalōng kha hlamlen chunga inthlōnga a-om leh shakōrtung leh shabakkai he’n aleikangir sap hei kha avahmu jo hei. Shabakkai khan akathi kalōng kha’m sâk mak, shakōrtung kha’m thatmak.

²⁹ Sânkathem katerpa khan akathi kalōng kha shakōrtung chunga ada a Bethel a ṭajai suina sik a ahei rôna avûm jo.

³⁰ Ama’n a-innshung thlânpuia avûm jo, ama leh asahei seng in ṭajai ansuia anhri, “Oh kansōpuipa, kansōpuipa!”

³¹ Anvumsō pha, sânkathempa khan asahei hneng ahri, “Kei kathi pha leh, amapa hnenga hin ke’m avûm ruh.

³² Ama’n Rōngpu ṭongpek a Bethel a maichâm leh Samaria khōpuia kamukna hmun rakip kadōia ṭong aleihri rakip kha hui akatlung nger sik kae.”

Jeroboam Setna Kakhôktak

³³ Israelhei Reng Jeroboam kha atlo dikmakna inphut tûn katlung hong inlemak a kae, michamhei innshunga inphut amaichâm syemna ṭōn inzen sik a thempu aleikadei ṭhak hei. Thempu akachang hnōm rakip hei kha manthengna anei heia kae.

³⁴ Ama’n setna atlosōt jâra a-innshung mihei chunga akatluk set inhmangna jōng katlunga kae.