RENGHEI INKHATNA 12 - LEKHARABU INTHENG (BSI)

Sak tinga Phunghei Rephut

¹ Rehoboam khan, sak tinga Israel mipui he’n ama reng manchangna sik a an-intûpna Shechema vakasea kae.

² Nebat sapa Jeroboam, Reng Solomon a inphut akatlânsōt a Egypt a ka-ompa khan ṭong hi atheia Egypt a inphut he’nle jo.

³ Sak tinga mipui he’n ama kabek sik a mi antir heia, khava sōa ankhenga Rehoboam hneng kase heia anvahri,

⁴ “Napa Solomon khan êng kasetak a arazen ung khana kanchunga phur kahrik amanrôn ung. Kanphur hrik hi namanyâng det a khana hringkhō hi namanhōi det inchu keini naṭong kajui mipui kachang sik ung.”

⁵ “Ni 3 sōa hong nôk ruh, khan kamasôn sik chei,” tia amasôn hei. Khava jâra inle jo hei.

⁶ Reng Rehoboam in apa Solomon hnenga mansena aleikanei katerhei hnenga alei derheia “Hei ṭongpek mo hiva mihei hnenga masônna sik a nanta manthei sik eng” tia aleider hei.

⁷ Anmani’n anmasôn, “Hiva mihei hi kaṭha narazen hnōm he’nchu, anmani ngekna che kha antamadu hrep sik a masôn hei roh, khan chu ṭong kajuitak a anrazen ṭhak sik jo che.”

⁸ Tâk-kha ama’n katerhei mansena kha leidon mak a khangther, ama leh ahong kakhangsap hei khana tûntûna ama inse mihei hneng jôk vakase jo.

⁹ Ama’n ader hei, “Heimo tlo sik a nantamanse hnōm eng? Anphur hrik amanyâng det pek roh anikati mipuihei hnenga heimo kahri sik?” ati.

¹⁰ Anmani’n anmasôn, “Anmani hneng nahri sik kha hi kae: ‘Kakutte hi kapa khōn kanek a insâdet jôk!

¹¹ Hripek hei roh, ‘Kapa’n phurhrik hei nanchunga aleida; ke’nchu khavakha kaman hrikdet sik hei. Ama’n sung vâng avōk chei ke’nchu shakor sung vânga kavōk sik chei!’”

¹² Ni 3 sōa Jeroboam leh mipuihei kha Reng Rehoboam hneng, aman theinahei dungjuia he’nle jo hei.

¹³ Rengpa’n katerhei ṭong mantheina kha donmak joa mipuihei hneng êng kasetak a arakôk jo hei,

¹⁴ khangtherhei mansena dungjuia atloa kae. Ama’n ati, “Kapa’n phurhrik hei nanchunga aleida; ke’n khahei kha kaman hrikdet sik. Ama’n sung vânga avōk chei; ke’n shakor sung vânga kavōk sik chei!”

¹⁵ Hivahi Shiloa Ahijah thempu’n Nebat sapa Jeroboam hnenga aleihri kha hui mathlung sik hi Rōngpu lungdo hei kae. Hiva jâra hin rengpa’n mipuihei chunga amalung leihlut mak jo.

¹⁶ Reng khan mipuihei ṭong kha rangei mak ning ti anmanhret jo pha, anmani ka-ông heia, “David leh a-innshunga inphut inṭhen jo rih! Eini sik a heimo antatlo pek jo me? Israel mipuihei, inna inle jo rih! Rehoboam in abinga sik mandon jo rasoh!” anti. Khava jâra Israel mipuihei kha inphin jo hei,

¹⁷ Rehoboam kha Judah ram a ka-om mipuihei sik rōk a reng kachang sik a andahlon jo.

¹⁸ Hivasōa Reng Rehoboam in Adoniram, rumhrat a ṭōn mantlohei ka-ensuipa kha Israelhei hneng aleitir, tâk ama kha hlung vânga anleideng that jo. Khana, Rehoboam khan ashakor gâri chunga kaketoua Jerusalemting katlân inhlut jo.

¹⁹ Khava pha inphut Israel sak tinga mihei kha David phung hrui hei chunga andōi ṭhak jo heia kae.

²⁰ Israel mipuihei khan Egypt a inphut Jeroboam hong inle jo ti ṭong anthei pha, ama kha mipui intûpna hmun a anbek a Israelhei reng anmanchang jo. Judah phung rōk kha David sōn leh pârhei chunga rangei inlûr kachang jo hei.

Shemaiah Ṭongsân

²¹ Rehoboam khan Jerusalema ahong tlung pha, Judah leh Benjamin phunghei kâra remi kathem pen 180,000 abek mantûp hei. Ama’n sak tinga Israel phunghei chunga re tloa athōia da nôkna sik a le’ntluk.

²² Tâk-kha Pathen in Shemaiah sânkathem hneng

²³ hiva ṭong hi Rehoboam leh Judah khana Benjamin mipuihei hneng amanthei sik heia ahri pek:

²⁴ “Israel mipuihei, nansōpui khet hei chunga buhlu mak hei ruh. Nankhenga inna inle ruh. Akasōk seng hi kei lungdo kae.” Ankhenga Rōngpu ṭongpek anjuia khana innting inle jo hei.

Jeroboam in Rōngpu a inphut A’nhesōt

²⁵ Reng Jeroboam kha Ephraim tlângrama Shechem khōpui kha rekur akursia pha bongkhat leika-om. Hivasōa adahlona Penuel khōpui kha rekur avakur nôk.

^26-27 Abinga amandon, “Tûn omchen kasōk dungjuia, kamihei hin Jerusalema ansea khana aka-om Bek-inna Rōngpu inthoina antōk inchu Reng Rehoboam leh inhretna annei nôk sik a kha kei anthat sik jo eng.”

²⁸ Khanga amandon joa, ama’n sehrat chere 2 sana vânga asyema amihei hnenga hinga ati, “Nangni Jerusalema kamukna sik pha kasôttak kase jo chei. Israel mipuihei, Egypt a inphut nankaṭhōisōt nan-pathen hei kha hin ka-om jo!”

²⁹ Ama’n sana sehrat chere inkhat kha Bethel a inkhat khana Dan a ada hei.

³⁰ Khang’khan mipuihei kha Bethel leh Dan a kamukna sik a kase heia setna antlo jo.

³¹ Jeroboam in bung inshâng chunga kamukna hmun asyemsa hei, khana Levi phung teilo thempu akadei jo heia kae.

Bethel a kamukna Mandik makna

³² Jeroboam in, Judah ram a rehōi kapōa, thla 8 tlukna ni 15 ning beklanga rehōi um amatungsōt a kae. Bethel a maichâma sana sehrat chere hnenga inthoina atōk hei, khana Bethel a khan kamukna hmun asyem heia khan ṭōn inzen thempu ada jo heia kae.

³³ Khana thla 8 tlukna kani 15 ning, ama tatepna kani ning hin, Bethel a kasea ama’n Israel sahei sik amatungsōt rehōi nitna sik a maichâm chunga khan inthoina atōk a kae.