RENGHEI INKHATNA 11 - LEKHARABU INTHENG (BSI)

Solomon Pathena Inphut A’nhesōt

¹ Solomon in ram hlop nuhmei katamtak amadu hei. Egypt Rengpa sanu rōk changloa, Hit nuhmeihei a-ompui hei khana, Moab, Ammon, Edom leh Sidona nuhmeihei a-ompui hei.

² Anmani hin Israelhei kha pathen ralak anmanjui jôk sik hei ti jâra, Rōngpu’n hiva mihei hi leh hmōi inlona mak ruh tia Israelhei hneng ṭong apek hei ravâng ama’n aleiompui jo hei.

³ Solomon in reng sanu 700 khana nuhmei manbo 300 aneisa hei. Anmani hin amalung Pathen hnenga inphut anmahepek a kae,

⁴ khana ama upa ahongchang jo pha anmani hin ram hlop pathen kamukna ting anthōi joa kae. Ama apa David kapōa Rōngpu hneng taksenthei changmak jo.

⁵ Sidonhei pathennu Astarte, khana Ammonhei mater ka-om tak pathen Molech abek jo.

⁶ Ama Rōngpu kadōia setna atlo jo khana apa David kapōa kadik a chônmak jo.

⁷ Jerusalem nisōtinga tlâng chunga Moab-hei pathen mater ka-om tak Chemosh, khana Ammonhei pathen mater ka-om tak Molech kamukna hmun amatung hei.

⁸ Ama’n anuhmei jât-hlop he’n an-pathen et hnenga marim katui leh inthoina antōk theina sik a kamukna hmun asyemsa hei.

^9-10 Rōngpu Israelhei pathen khan Solomon hneng vōi 2 le’nlâra ram hlop pathen kamuk makna sik a ṭong aleipek jo ravâng, Solomon in Rōngpu ṭong leijui mak, tak ama hnenga inphut inhe joa kae. Khava jâra Solomon chunga Rōngpu ahnuk kana joa

¹¹ ahnenga ati, “Nang in namanhret pupuma kei leh na’ntepna namakhōi jo, kei a’ntep eng kae khachu narengram hi nanga inphut kalosōt a naṭōn karônhei kâra inkhat hneng kapek sik jo kae.

¹² Achang ravâng, napa David jâra nahring lai seng chu khavatak kha tlomak ning, nasapa vairôn shunga katlo sik.

¹³ Rengram akhenga ama hnenga inphut losōt mak ning; khava kanek a kasōkpa David leh ke’n keita kamanchang jo Jerusalem sik a phung inkhat chu kadahlon pek sik.”

Solomon Inrepuihei

¹⁴ Khava jâra Rōngpu’n Solomon inrepui sik a Edom reng innshunga mi Hadad intipa kha amandōi jo.

^15-16 Hiva mak hma pha kasôttak a, David in Edom ram ahlōlai, aremi hlamkakei Joab kha mi kathi kalōng kavûm sik a khana khan vakase. Ama leh amihei Edoma thla 6 leika-om hei, khava pha Edoma pase rakip anleithat hei,

¹⁷ Hadad leh apa sōk, Edom mihei, Egypt a akatlân hei tei loa. (Khava pha khan chu Hadad chu naipangtek leikae.)

¹⁸ Anmani kha Midian andahlona Paran a leikase hei, khana khan mi ṭhahrep in anhnenga kahlutsa heia anleijui. Khava sōa Egypt katlunga kase heia reng hneng kahlut heia ram, omna inn khana sâk sik apek hei.

¹⁹ Hadad in reng kha thōn achangpuia, reng in ama nuhmei, Rengnu Tahpenes nainu kha, Hadad nuhmei sik a apek jo.

²⁰ Amanu’n Genubath inti sapa inkhat aneipek, rengnu’n reng-innpuia avei mankhanga, reng sapahei leh ka-omsap hei.

²¹ Egypt a Hadad in David thina leh remi hlamkakei Joab kathi jo hei ti ṭong athei pha, Hadad in reng hneng ati, “Karamting inle jo rong.”

²² Rengpa’n ader, “Heisa mo? Heikhat kapek mak che aka-om mo? Khava jâra mo na-innting a’nlehnōm che? Hadad in rengpa amasôn, “Ase rōk kha se jo rong.” Khana ama kha aramting inle jo. Edom reng inkhat kachanga, Hadad kha Israelhei inrepui akaṭhamak tak inkhat kae.

²³ Pathen in Eliada sapa Rezon kha Solomon kadōia amanṭangsa jo. Rezon kha akapu, Zoba Reng Hadadezer hnenga inphut katlânsōt,

²⁴ khana dân kajuimak, mikachom hei hlamkakei inṭang jo. (Hivahi David in Hadadezer atorsōa khana a’nloipui Syriahei athatsō hei kahnunga akasōk kae). Rezon leh amihei kha Damascus a kase heia vaka-om hei, khana khan ami he’n Syriahei reng anmanchang jo.

²⁵ Solomon hringkhō shunga ama hi Israelhei inrepui kha kae.

Jeroboam hneng Pathen Ṭongtep

²⁶ Reng Solomon kadōi ahlop inkhat kha, aṭōn karônhei kâra Ephraim shunga Zereda inphut Nebat sapa Jeroboam kae. Anu renghmeinu Zeruah inti.

²⁷ Hivahi re intlona thuhming kha kae. Solomon in Jerusalem nisōtinga ram hi inn asaksō jo khana khōpui rekur asyem manthersō jo.

²⁸ Jeroboam intipa hi pase rahōi kasōk leikachang, Solomon in aṭōntlo hratna kha amanhret a, Manasseh leh Ephraimhei ramṭhen shunga rumhrat a ṭōnkatlo rakip hei ka-ensui amanṭanga kae.

²⁹ Ni khat chu, Jeroboam in Jerusalema inphut kasesōt a, Shiloa sânkathem Ahijah leh hlam a ramhânga binga intō hei.

³⁰ Ahijah khan pōntherpet a’nsi kha alosōt a, ahar 12 a akei hlera,

³¹ Jeroboam hneng ahri, “Nang in ahar 10 hi inlo roh, ajârchu Rōngpu, Israelhei Pathen khan nahnenga ati, ‘Solomon kut a inphut ram hi kalosōt sik jo, nang hnenga phung 10 kapek sik che.

³² Kasōkpa David khana Israel ram pumpuia inphut keita sik a kakadeisōt Jerusalem jâra, Solomon in phung inkhat chu alanei sik.

³³ Hivahi katlo sik kae ajârchu Solomon in adahlon enga jât-hlop hei pathen akamuk a kae: Sidonhei pathennu Astarte; Moab-hei Pathen Chemosh; Ammonhei Pathen Molech. Solomon in kaṭong juimak jo; akadik mak atlo jo, khana apa kapōa kadân leh kaṭong pek nitmak jo.

³⁴ Tâk-kha Solomon kut chunga inphut ram akhenga losōt mak ning, khana ahring lai seng ratha kamannei sik a kae. Ke’n kakadeisōt khana kadân leh kaṭong pek kajui kasōkpa David jâra ke’n hivahi katlo sik kae.

³⁵ Rengram hi Solomon sapa kut chunga inphut kalosōt a phung 10 hi nang hneng kapek sik che,

³⁶ kha’num kei kamukna hmun sik a kakadeisōt khōpui, Jerusalema hin kasōkpa David sōn leh pârhei kha Jerusalema vai kamanrôn ṭhak theina sik a, Solomon sapa kha phung inkhat kaman ompui sik a kae.

³⁷ Jeroboam Israel reng kamanchang sik che, khana namaduna ram rakip a vai narôn sik kae.

³⁸ Kasōkpa David in atlo kapōa, nang in pui katluktak a kaṭong najui inchu, kadâna khan nahringa, kaṭong pek kha natlosōt a kei hnōm pekna nachen inchu, ke’n ka-ompui ṭhak sik che. David hneng katlo pek kapōa, Israelhei reng kamanchang sik che, khana nang kahnunga nasōn he’n sôiloa vai anrôn nôk sik.

³⁹ Solomon setna jâra David sōn leh pârhei kha karâkna kapek sik hei, tâk ahei tik a sik changmak ning.’”

⁴⁰ Khava jâra Solomon in Jeroboam kha that sik a arei jo, tâk ama Egypt rengpa Shishak hnenga katlâna Solomon thimak lai seng khana khan vaka-om jo.

Solomon Thina

⁴¹ Solomon in aleitlosōt rakip, achôndân leh asingna hei akhenga Solomon Thuhming Rabu shunga inzet hei.

⁴² Ama kha kum 40 Jerusalema Israel pumpui hei reng le’nṭanga kae.

⁴³ Ama kha kathia David khōpuia anvûm, khana asapa Rehoboam in arengchang athlenga kae.