PHILIPPIANHEI 3 - LEKHARABU INTHENG (BSI)

Dikna Inthengkhet

¹ Achaina, kasōpuihei, Rōngpu leh nan-inchunna khan inpâk hêr ruh. Hma inkeia kaheimazet chei kha avea heimazet nôk sik chei hi hōimak sakmak eng, khana hinga katlo’nchu nangni inhrung theidet sik chei.

² Khava ṭhatmak katlohei, khava uihei, khava vuntanna sik a mi kajôr heia inphut insing thei ruh.

³ Ajârchu, anmani changmak a eini jôk in vuntan kadiktak kha nichen kae, ajârchu Pathen kha ama Rathla vâng nikamuk a khana nihringkhō shunga Christa leh inchunna khan inpâk a ka-om mea kae. Eini’n vâng pônga ṭōn intlona chunga nitaksen changmak.

⁴ Khana, kei um khava chunga taksenna kaneithei. Tu mo inkhat in vângpông tinga ṭōn intlona chunga a’nhuk inhring sik a amandon inchu, ke’n khava kakhe chet a mandon theina hlam kanei.

⁵ Ka’ntet a inphut kani vekhat kahongtluk pha, kavun antan eng kae. Kei Hebrew thisen inthengtak, Benjamin phung, Israel mi inkhat eng kae. Jehudihei dân juitinga niti’nchu Pharisee inkhat eng kae,

⁶ khana khangtuk hrep thangset kanei kachang dungjuia ke’n bekrup kaleisuk manrima kae. Dân ṭongpek juina mikadik inkhat changna ting niti’nchu, kei ṭhenakase eng kae.

⁷ Tâk-kha khava kei hnemna hei tia katei thei rakip kha Christa sik a hnemna kase hei kae tia kalo jo.

⁸ Khavahei rōk kha’m changmak; ka-Rōngpu Jesu Christa manhretna kha aman atamchet jâra, khahei rakip kha hnemna kase kamanchang pet jo hei. Ama jâra heirakip kahlonsōt pet jo; Christa kha kachen theina sik a leh

⁹ pui katluk a kan-inchun theina sik, heirakip ramhnōk a kalo jo heia kae. Khana Dân juia hnemna, kabinga dikna inkhatbek ke’n neimak jo eng. Tûnchu taksen chunga a’nhnga, Pathena inphut akajōng, Christa taksen jâra a’npek dikna kha ke’n kachen jo.

¹⁰ Kei tamadupen khachu Christa manhret sik khana athōisōt nôkna ratha hratna manhret sik khana a’nrengna kha thōkpuia ama kapōa thi sik hi kae,

¹¹ hivahi thina inphut hringna anikei mathōi sik tia inhōrna nei jâra kae.

Bitin Hmun Kajōna Tlân

¹² Ke’n hme kasō jo a-emak leh pui katluk jo eng katina changmak. Tloman kha chenna sik a kei rahnak a inṭang eng, khava sik a Christa Jesu’n atâ amanchang dek jo enga kae.

¹³ Kha’num, kasōpuihei, ke’n khavakha kachendek jo tia mandon mak eng; hei-achang inum kei tatlo inkhat chu kakahnung seng kha mahngia, kahmatinga aka-om kha tlungna sik torchena tlo hi kae.

¹⁴ Khava jâra chunga hringkhō chenna sik Jesu Christa a Pathen bekna eng, tloman hmutorna sik a kei intlunhrek a bitin kaneia katlân eng.

¹⁵ Rathlatinga pui katluk eini seng in hiva malung kapō hi nirôn et sik kae. Nankâra ṭhahrep in malung hlop arôn inchu hivahi Pathen in amantheng pek sik chei.

¹⁶ Hei-hei achang inum eini’n tûn katlunga niheijuisa dân dungjuia hmating jōn rih.

¹⁷ Kasōpuihei, kei omchen inchu ruh. Keini’n nangni sik tekhing kadiktak dapek chei kha akajuihei chunga khan nanmalung manhlut ruh.

¹⁸ Hma khan hivahi ave-avea kalei manthei jo chei, khana tûnhin hmit-rathli pum a kahei male nôk: mi katamtak hei hringkhō khan thingrake chunga Christa athi kha dōina sik akatlo ka-om hei.

¹⁹ Anmani hmeikhura a’nchai sik hei kae, ajârchu anmani Pathen chu antaksa tamadu kha kae. An-inzakna sik chunga khan inlensakna jôk annei, khana raleia neinâk-hei chunga rōk anmandon.

²⁰ Hei-hei achang inum, eini chu marvân ram mi jo me kae, khana marvâna inphut akajōng sik eini Huksōtpa, Rōngpu Jesu Christa kha rangeitak a nihngâk kae.

²¹ Ama’n akatlasam akathithei nitaksa hi athlengsōt sik khana neinâk rakip avai rônna thōia akada ratha hratna kha ahmanga, ataksa kalûr kapōa eini’m asyem sik jo me.