PHILIPPIANHEI 2 - LEKHARABU INTHENG (BSI)

Christa Insinsakna leh Alenna

¹ Christa a nanhringkhō khan amanngar chei, khana alungset in amanmōng chei. Rathla leh inloikhômna nannei khat leh khat lum inlona leh lungset inrônna nannei joa kae.

² Khava jâra, mandonna inkhat rōk neia, lungsetna inkhat rōk chen a, malung leh rathla inkhat rōk changna vâng khan pui katluk a a’npâk mi amanchang ruh tia kangek chei.

³ Nangni’n tabing maduna inphut heite tlomak ruh khan chu heite kanimak maduna inphut inlensak mak ruh, tâk khat leh khat hnenga malung innemtak a om ruh, ahei tik a milak-hei kha nangni kanek a akaṭhadet a lo hei ruh.

⁴ Khana binga hnemna rōk enloa, khat leh khat hnemna sik jōng jôk ruh.

⁵ Nangni tanei sik malung kha Christa Jesu malungrôn kha kae:

⁶ Ama’n ahei tik a Pathen achangna ngai kha anei, tâk ama’n Pathen leh in-anga omna sik rumhrat a tlo sik mandon mak.

⁷ Khava kanek a, ama’n anei rakip seng kha arachamtak a adahlona, sōk inkhat omje kha alo jôk jo. Ama mihring inkhat kapōa jōng intet a, khana mihring kapōhrep a jōng inlâra kae.

⁸ Ama amalung innem khana thina katlung ṭong ajui, Thingrake chunga athi katlunga.

⁹ Khava jâra, Pathen in ama kha chung intongpena akadom manshâng jo. Khana rahming kâra rahming kalenpen kha apek jo.

¹⁰ Khava jâra Jesu rahming kajana marvân leh raleia khana ralei thōia aka-om seng in anmarkhup antathlep et sik kae,

¹¹ khana Pa Pathen kha manlûrna sik, Jesu Christa kha Rōngpu kae tia mi rakip in inphôngtak a anta-ôn sik kae.

Vânhnōia Khōvâr kapōa Akavâr

¹² Khava jâra kaṭhōnhei, kei leh ni-omsap laia kaṭong nantajui ṭhak kapōa khan, tûn nanhnenga ka-om mak pha hin kaṭong nantajui sik hi akakhôk chet apui karôn kha kae. Nan-inhuk inhringna pui atlukna sik, ṭittak leh ratha innok pum a ṭōn tlo ṭhak ruh,

¹³ ajârchu ama lungdo kha nanjui hnōmna sik leh nanjui torna sik a Pathen in ahei tik a nanshunga ṭōn atlo kae.

¹⁴ Heirakip rasa neiloa leh inherloa tlo ruh,

¹⁵ khavakha mikaṭhamak leh mikaset-hei kâra aka-ompui katluk Pathen sahei kapōa, a’nthengseng leh nōrna kase nanchangna sik a kae. Nangni anmani kâra marvân chunga ârsihei kapōa akavâr nger sik chei kae,

¹⁶ khavakha nangni’n anmani hneng hringna ṭong nanpek hei jâra kae. Nangni’n khanga nantlo’nchu, Christa Kani ning nangni jâra inlensakna kanei sik, ajârchu hivahin kei insalerna leh kaṭōn leitlo rakip kha môksek changmak jo ti kha amalâr sik a kae.

¹⁷ Nangni’n Pathen hneng taksenna vâng nantatōksōt inthoina kapōa kahringna thisen hi akalōng sik a inhui. Kha achang inchu, kei inpâk eng khana nangni seng hneng ka’npâkna hi kasem pek chei kae.

¹⁸ Kha leh in-anghrep a, nangni um a’npâk nger sik chei kae khana nan-inpâkna kha kei nanta’n sempui sik eng kae.

Timothy leh Epaphroditus

¹⁹ Pathen lungdo achang inchu, nanṭong kathei pha karatha ahrok theina sik, Timothy nanhnenga inranga kahei tir tor sik tia inhōrna kanei.

²⁰ Ama rōk hi lungria nankarôn leh kei malung inchunpui kha kae.

²¹ Khana alak he’nchu Jesu sik khôk sakloa, anbing sik khôk sakna kajōng hei kae.

²² Ama’n heikhong mo arahōi sōkna kha amalâr, heikhong mo ṭong kaṭha sik a ama leh kei, pa leh sa kapōa ṭōn kantatlosap, nangni nanbinga nanmanhret.

²³ Khava jâra kei omchen sik chungchâng ṭong kaman hretsō lim leh ama heitir sik a intluk eng.

²⁴ Khan chu ke’m nanhnenga inranga kahong thei sik eng tia taksenna Rōngpua kanei.

²⁵ Nisōpui Epaphroditus kei bômna sik a nangnihei ṭong karônle, kasir kapanga re katuk ama hi nanhnenga heitir sik arangei tia kamandon jo.

²⁶ Ama adammak ṭong nanthei jâra amalung inrim khana nangni nankhenga inhmupui sik a arangei hêr chei.

²⁷ Kadiktak a ama akana akathivet kae. Tâk-kha Pathen in amalungset, khana ama chung rōk a changmak, kei chunga’m khōdeng theina kalentak a inphut aṭhensōt enga kae.

²⁸ Ama nanhmu pha leh inpâk nôk sik cheia kha kamalung inrimna hi inhmang sik jo ti jâra kakhe chet a ama kahei tir hnōmhêr joa kae.

²⁹ Khava jâra nangni’n inpâktak a Rōngpu rahminga sōpui inkhat kapōa leirahlâng ruh. Ama kapō mi rakip hnenga kajana malâr ruh,

³⁰ ajârchu nangni he’n nantapektor mak eng inthōpuina anikapek sik a, Christa ṭōn jâra ahringkhō aphea akathivet kae.