PHILIPPIANHEI 1 - LEKHARABU INTHENG (BSI)

¹ Christa Jesu sōk Paul leh Timothya inphut, Christa Jesu leh a’nchun hei, bekrup hlamkakeihei leh bekrup inthōpui hei leh inṭhōia Philippia ka-om Pathen mi rakip hei hnenga:

² Ni-Pa Pathen leh ni-Rōngpu Jesu Christa khan maritna leh lung mōngna pek chei rasoh.

Paul in Achithi Katei hei sik Aderna

³ Ke’n nangni kamandon chei akaia ka-Pathen kha kamanpâk;

⁴ khana nangni sik a derna kanei akaia, inpâk pum a kader,

⁵ a’nphut ninga inphut tuning katlung ṭōn kaṭha ṭōna khan nan-inthōpui eng jâra.

⁶ Ke’n inchêna kamanhret, ti chu Pathen in nanhnenga aleiphut ṭōn kaṭha hi kani a’nchaimak kârseng Christa Jesu Kani ning katlung atlo manjōm sik a kae.

⁷ Kamalung shunga nangni ka-om ṭhak chei! Nangnihei seng hinga kamandon sik chei hi kei sik a akadikpen kha kae. Ajârchu ṭong kaṭha hrungna sik leh kahnet a phunsōt theina sik tuna kurkhum a ka-omlaia leh masōa kalei omlai, Pathen tapek eng pha kaṭha kha nangni nankhenga nanchenpui enga kae.

⁸ Nangni kalungria kamandon ṭhakna chei rakip hi Christa Jesu khet malunga inphut ahong kasōk kae tia ke’n kadik a kahrina chunga hin Pathen kha kasâkhi kae.

⁹ Nanlung setna kha manhretna kadiktak leh pui katluktak a in-ensuina leh inṭhōia ahong khang chetna sik a ke’n derna kanei,

¹⁰ khavakha nangni’n akaṭhapen kha nankadeisōt theina sik a kae. Kha achang inchu, Christa Kani ning khan nangni a’nthengmak rakip leh masetna inphut intheng seng sik jo chei.

¹¹ Pathen lûrna leh choi manshângna sik a, Jesu Christa rōk in ahei choisōt kadiktak a akaṭha tlotheina khan nanhringkhō kha kasip phet sik jo.

Christa a Akahring

¹² Kasōpuihei, kei chunga omchen kasōk hei hin ṭong kaṭha manlensōtna a’nthōpuikhet ti hi nantamanhret sik kamadu.

¹³ Khava kara khachu, kei Christa Jesu sōk kachang jâra kurkhum a ka-om hi reng-innpui kahngâk-hei leh hinna ka-om alak rakip in anmanhret joa kae.

¹⁴ Kei kurkhum a ka-om hin sōpui akatam lang Pathena inngam chetna amannei heia ṭitna neiloa pha rakip a ṭong hrilena anneia kae.

¹⁵ Khang’khan mi ṭhahrep in ankâra thangset neina leh innâk-inse jâra Christa kha anhri manthang, tâk ṭhahrep inchu malung inthengtak a anhrile.

¹⁶ Anmani’n lungset vânga hivahi antlo ajârchu Pathen in aṭong kaṭha kahrung sik a anganse eng hi anmanhret.

¹⁷ Her khat inchu malung inthengtak a Christa hi hrimanthang mak hei, tabing malunga antlo; ke’n kurkhum a ka-omlai hin suk manrim chetna sik enga anmandon.

¹⁸ Heite rōi om mak! Akadik tinga mo, dikmakna tinga mo Christa kha ahlam rakip a hrilena a-om inchu khava sik a inpâk eng,

¹⁹ ajârchu nan-inthōpuina eng leh nanderpekna eng jâra Jesu Christa Rathla inphut kei masō kachang sik eng ti hi kamanhret.

²⁰ Kathi’num kahring inum, kahringkhōa inphut hin Christa kha kajana achang theina sik kalungria kamadu leh ka’nhōrna kha hi kae, khachu, kaṭōntlo hi kabânsam mak sik, pha rakip a, tûnlaitak hin, inngamna kasip phet kanei sik hi kamadua kae.

²¹ Hringkhō hi heisik a mo? Kei hneng chu hringkhō hi Christa sik a kae. Khana thina hin kei hnemna kae.

²² Tâk-kha kahringa kala-om inchu ṭōn kaṭha kalatlo tor sik, kha’num khō jôk mo kadei sik manhret mak eng.

²³ Kei alang hnia ankeitō eng. Hiva hringkhō hi dahlona Christa leh lengsōm sik kha kamadu hêr jo, khavakha akaṭhapen kha kae;

²⁴ Tâk hinga kalahring sik hi nangni sik a chu apui karônpena akaṭha inkhat lakae.

²⁵ Kei manchênna kanei, laka-om sik eng ti kamanhret. Taksenna shunga nan-inpâkna leh nankhangtouna akabesa sik a, nangni nankhenga leh laka-omsōm sik me,

²⁶ khan chu kei leh avea ni’nhmu nôk pha, Christa Jesua inchunna shunga nanhringkhōa kei jâra nan-inlensakna sik ajâr katamchet nanhmuna sik a kae.

²⁷ Tûn, apui karônpen khachu, kei nanka-en kahong tor inum, kahong tor mak inum, mandonna inkhat rōk leh maduna inkhat rōk a ṭong kaṭha taksen jâra inpunkhôma, nanre thōkna ṭongjai kha katheina sik khan chu nanhringkhō kha ṭong kaṭha tamadu dungjuia nanchôn sik kha kae.

²⁸ Nan-inrepuihei kha ṭitmak hei ruh; ahei tik a inngamtak a om ruh, hivahin anmani katlu sik hei khana nangni’n nantor sik hei tina kha amanchên pek sik hei kae, ajârchu torna anikapek kha Pathen kae.

²⁹ Ajârchu nangni’n ama nantaksen jâr rōk a changloa, ama sik khōdeng nanthei jâra, Christa razenna sik pha kaṭha kha nangni a’npek jo chei kae.

³⁰ Tûnchu ke’n re kadena hin nangni inveithei jo chei. Hivahi hmalaia re kaleide nantahmu kha leh in-anghrep, khana tûn katlung re kalade nantathei kha kae.