PETER INKHATNA 5 - LEKHARABU INTHENG (BSI)

Pathen Kemōng Rup-hei

¹ Upa inkhat kachang ke’n nangni bekrup upahei hneng kahei ngek chei kae. Christa khōdeng theina inchênna akahmu kha kei eng kae, ahong inlâr sik lûrna kha ke’n chen kanei sik jo. Nanhnenga kangek chei,

² Pathen tapek chei kemōng rup kakhem kha chang ruh, khana ratha setpuma changloa, ratha kahroktak a Pathen tamantlo hnōm chei dungjuia ensui hei ruh. Hlō rahlâng theina hrep a ṭōnkatlo changloa, malung kahluttak a ṭōnkatlo kha chang ruh.

³ Nantatinta hei chunga vairônna sik mandon mak ruh, tâk khava rup-hei ta’nchû thei kha chang ruh.

⁴ Khana kemōng kakhem kalen kha ahon’lâr pha, akaṭōi hêrmak sik lenlukhu kavâr kha nantachen sik kae.

⁵ Khava kapōtak a khangtherhei nangni’n upahei ṭong thōia aka-om nger sik chei kae. Khana nangni nankhenga khat leh khat inzentō theina sik insinsakna nankhōna inkhit ruh. Ajârchu ṭong intheng in ahri: “Pathen in inlensak ahōt, tâk insinsak chu lum alo.”

⁶ Khava jâra ama’n aphahrep a akadom manshângna sik chei Pathen bân ratha hratna thōia insinsak ruh.

⁷ Nanmalung inrimna rakip ahnenga pek ruh, ajârchu ama’n nangni a-ensui ṭhak cheia kae.

⁸ Inrin ṭhak ruh, insing thei ruh! Nanta’nrepui Diabol kha shabakkai inhrung kapōa kalôna, tu mo inkhat madehlon sik a a-enlea kae.

⁹ Nantaksenna manhnet una ama kha ting ruh, ajârchu raleichung rakip a nangni kapō akataksen he’n hi leh a’n-anghrep khōdeng theina anleide jo ti hi nanmanhret jo.

¹⁰ Tâk-kha nangni’n pha bongkhat inrimna nande pha, Christa leh inchunna shunga kumsôt a lûrna kachen sik a nankabekpa, Pathen amatak in pui amathluk sik chei khana akahnet, ratha kahrat, ngirna hmun inkhat apek sik chei.

¹¹ Aheitik a ratha hratna atâ changṭhak rasoh! Amen.

Achaina Chibei

¹² Hiva chithi katôitek hi, ke’n taksen ka-om tak inkhat a kalo ni-Christian changpui, sōpui Silas inthōpuina vâng kaheimazet chei kae. Ke’n kamathok hnōm chei khana kei hringkhō thuhming hi kapek hnōm chei, ti chu hivahi Pathen maritna kadik kha kae. Hiva shunga hin ngir inhnet ruh.

¹³ Pathen in akadei inkhat Babylona ka-om nansōpui bekrup khan chibei ahei tlochei, khana kasapa Mark inum chibei ahei tlochei.

¹⁴ Inkhat leh inkhat Christian lungset a injôptō una chibei intlo ruh. Christa ta kachang nangni nankhenga lungmōngna’n ompui chei rasoh.