PETER INKHATNA 4 - LEKHARABU INTHENG (BSI)

Hringkhō Inthlenghei

¹ Christa’n taksa a aleide manrim achang jâra, nangni’m ama mandonna kapōa nanbinga a’nsuk inngar sik chei kae; ajârchu tu achang inum taksa akade inrim khan setna tlo nôk mak jo.

² Khava jâra tuna inphut a nanralei hringkhō hi mihring tamadu dungjuia changloa, Pathen lungdo dungjuia akahring nger sik chei kae.

³ Ajârchu hmalai pha kasôttak limsyem inmuk hei tatlo hnōm kha nanleitlo joa kae. Nanhringkhō hei kha mater ka-om, hurna, ju inrui, lôpna, ju-in lôm, khana enhnōm kakaimak limsyem kamukna nanlei hmang joa kae.

⁴ Khana tûnchu nangni’n khang khava omchen inhlei leh heite khôk kasak mak hringkhō kha anmani nantlosap puimak hei jâra antahri maset jo chei kae.

⁵ Tâk-kha akahring leh akathi ṭong katan sik a a’ntluk Pathen hneng anbing et a antintana antapek nger sik kae.

⁶ Khava sik jâra Ṭong kaṭha kha mi kathihei kâr a’m a’nhri inthangle kae, mi rakip ṭong antan kapōa khava taksa hringkhōa ṭong antan hei chunga khan; anrathla hringkhōa Pathen ahring kapōa anhring theina sik hivahi anhnenga ava’nhri kae.

Pathen Kutchoi pek Katinta Kaṭha

⁷ Heirakip a’nchaina sik pha kahnai jo. Nangni’m nander torna sik nanbinga insurthei una insing thei ruh.

⁸ Heirakip chunga nangni khat leh khat lungri tak a inlungset ruh, ajârchu lungset in setna katamtak akahuksia kae.

⁹ Beitamloa, khat leh khat khōhme inthlungtō ruh.

¹⁰ Pathen kutchoi pek katinta kathem kapōa, Pathena inphut kutchoi ahlopdet kutchoi achen kha alak-hei ṭhatna sik ahmang sik kae.

¹¹ Tu achang inum ṭong kahrile khan Pathen ṭong kha ahrile sik kae; mi inzen kha’num Pathen tapek aratha neina dungjuia arazen sik kae, khavakha heirakip chunga Jesu Christa jâra Pathen kha manpâk a a-omtheina sik a kae, lûrna leh ratha hratna ahei tik a Christa ta kae. Amen.

Christian Inkhat Chang jâra Khōdeng Theina

¹² Kasōpui marit hei, enmansinna inhnaktak nanchunga ajōng tlung pha, akasōk phung hêrmak aleichang jo’num le’npir mak ruh.

¹³ Khava kanek a inpâk jôk ruh, ajârchu alûrna kha ajōng inlâr pha nan-inpâkna kha pui atluk theina sik Christa demanrimna kha nangni’n nantachenpui kae.

¹⁴ Nangni inzakna anpek chei pha inpâk ruh, ajârchu Christa kahnung kajui chei kae; hivahi nanchunga Pathen Rathla, lûrna Rathla kha nanchunga inhnga tina kae.

¹⁵ Nangni khōdeng nanthei inum mithatna jâra, inru jâra, ṭōnse tlo jâra, miṭōn chunga inthon inhlut jâra changmak rasoh.

¹⁶ Hei-achang inum Christian chang jâra demanrimna nantade achang inchu, khava sik a inzak mak ruh, tâk Christa rahming nanrôn jâra Pathen manpâk ruh.

¹⁷ Ṭongtan inphutna sik pha kha kahong jo, hma inkeipena Pathen khet mihei chunga ṭong antan sik kae. Eini chunga ṭongtan a’nphut achang inchu, Pathena inphut Ṭong kaṭha akataksenmak hei inchaina kha heimo akachang sik?

¹⁸ Ṭong intheng in ahri kapōa: “Mikaṭhahei hukmanhring sik kha hmen intak; kha achang inchu, Pathen ka-ôimak set karônhei sik heimo akachang sik?”

¹⁹ Kha achang inchu, Pathen lungdo dungjuia khōdeng theina kade hei kha’n ankasyempa, an-intepna hui inthlung ṭhakpa kha, anṭōntlo ṭhatna vâng pui katluk a antaksenna kha antamalâr sik kae.