PETER INKHATNA 3 - LEKHARABU INTHENG (BSI)

Puise leh Nuhmeihei

¹ Khava kapōa nuhmeihei nanpuise hei ṭong thōia om ruh, ajârchu ankâra ṭhahrep in Pathen ṭong antaksen mak inchu, nan-omchen kaṭha vâng anmani’n anta hongtaksen hnōm sik kae. Nangni’n ṭong beikhat nanta hripek sik hei rangei mak,

² ajârchu anmani’n nan-omchen kha heituk a’nthenga kaja ka-om mo ti kha anhmu sik jo.

³ Nansam a inretna nantasyem, sana dangka, pōn leh der keia hme ṭhatna sik vângphông ting inretmak ruh.

⁴ Khava kanek a, nanhme ṭhatna khan nanshunga lungri kadiktak kha a’nveisa sik kae, khavakha Pathen hmit ena mankatampen nun-innem leh malung kadai, kum leh thla’n manvōi torlo hmeṭhat kha kae.

⁵ Ajârchu hmalaia Pathen tinga malung kahlut, Pathena inhōrna kanei nuhmeihei kha khanga anpuisehei thōia ka-om heia anhme ṭhatna anleisyem.

⁶ Sarah kha khava kapō kae; Abraham ṭong ajuia, ka-rōngpu aleitia kae. Tûnhin nangni’n heite ṭit lo jen a akaṭha kha nantloa achang inchu, ama sanu jo chei kae.

⁷ Khava kapōa nangni puise he’num nannuhmeihei kha nangni kanek a antlâksam kha manhret hei una ompui hei ruh, ajârchu anmani um Pathen kutchoi pek hringna kha nangni leh nantachensap sik kae. Nanderna kha heite’n akhâr makna sik khang’khan tlo ruh.

Akadik Tlo jâra Khōdengthei Dena

⁸ A’nchaina: nangni nankhenga malung pumkhat a mandonna inkhat rōk nantanei sik kae; sōpui kapōa inkhat leh inkhat inlungset ruh, inkhat leh inkhat insinsak leh lum inlona nei ruh.

⁹ Akaṭhamak kha akaṭhamak vâng male mak ruh, a-emak leh hâksêrna anikapek hei kha hâksêrna pek male mak hei ruh; khava kanek a, mahâmṭhat pek jôk hei ruh, ajârchu Pathen in abeklai chei, pek sik cheia ale’ntep kha hiva mahâmṭhatna hi kae.

¹⁰ Ṭong intheng in ahri kapōa: “Tu achang inum hringkhō kahōi leh pha kaṭha kahmu hnōm rakip in ṭong kadikmak ahri mak sik kae, khana maleisei hri akahai sik kae.

¹¹ Anmani ṭhatmak a inphut a’nhesōt sik hei khana akaṭha antatlo sik kae; anmani anmalung pumpui vâng intōk inchamna antatlo nger sik kae.

¹² Ajârchu mikadik-hei chunga Rōngpu’n a-ensui hei, khana anderna athei pek hei; tâk akaṭhamak katlohei chu adōi hei.”

¹³ Nangni ṭōn kaṭha tlona sik a nanmalung akahlut achang inchu, tu’n mo nanṭhat makna sik atlo sik?

¹⁴ Tâk-kha nangni’n akadik ṭōn nantlo jâra khōdeng nantathei achang inchu, heituk mikahōi chei mo! Tûte ṭitmak hei ruh, nanmalung um manrim mak ruh.

¹⁵ Tâk-kha nanmalunga Christa kha nan-Rōngpu manchang una kajana nei ruh. Nan-inhōrna kha tu mo inkhat in ader cheia achang inchu, nanhri manchên torna sik ahei tik a inrin ṭhak ruh,

¹⁶ tâk kajatak a leh malung innemtak a tlo ruh. Christa kahnung kajui nanchang jâra nan-omchen kaṭha tlo akahri inset he’n anmanuisō chei pha, anmani’n anṭong hrisōt a khan an-inzakna sik, nangni mandon ṭhen theina kha mantheng seng ruh.

¹⁷ Ṭōnse tloa demanrim sik kanek a, Pathen lungdo achang inchu ṭōn kaṭha tlo jâra demanrim sik kha kaṭha jôk.

¹⁸ Ajârchu, nangni Pathen hneng aṭhōi theina sik chei, mikaṭha inkhat kha mikaṭhamak-hei sik, Christa kha setna jâra aheitik a sik vōi khat kathi jo. Ama taksa a anleithat jo, tâk rathla a manhring jo kae.

¹⁹ Khana ama rathla a ahring lai khan kura a’nkhum rathlahei hneng leikasea ṭong avahrilea kae.

²⁰ Khava rathlahei kha, Noah rakōng suilaia Pathen in thōk-hlatak a ahngâk hei khana Pathen ṭong inngeimak rathlahei kha kae. Rakōnga mi akatlômtek, ankhenga mi 8 rōk tuia inphut ahuksōt heia kae,

²¹ Hiva tui hi atûna nangnihei kahuk inhring tuihlut tlona akhing mêrchîkna inkhat kae, taksa innim rasi manthengna changmak, tâk mandon ṭhen theina vâng Pathen hneng intepna kha kae. Hivahin Jesu Christa hringsōtna jâra ahuk manhring jo chei.

²² Ama marvâna kakea, Pathen changting ka-oma, ngeva rakip leh marvâna vaikarôn rakip khana ratha kanei seng chunga vai arôn jo.