PETER INKHATNA 2 - LEKHARABU INTHENG (BSI)

Akahring Hlung leh Jât Intheng

¹ Khava jâra ṭhatmak rakip a inphut nanbinga inkâr ruh; maleisei, inṭhat hlemsak, thangset, mi hnōisena tlo nôk mak ruh.

² Ahei tik a arathla netui intheng ka-in hnōma tui kahre ṭhak, khavakha nan-inle nankhangna sik khana hukmanhring nanchenna sik, naipang a’ntether kha pō ruh.

³ ṭong intheng in ahri kapōa, “Nangni’m Rōngpu kha heituk a lungsetna akalen mo ti nanbinga nanmanhret jo.”

⁴ Akahring hlung mihe’n hnemna kasea antahlonsōt, tâk Pathen inchu mankatamtak a akadeisōt, Rōngpu hnenga hong ruh.

⁵ Hlung kahringhei kapōa hong ruh, rathla bek-inn insakna khan inhmang ruh, khana khan thempu intheng kapōa Jesu Christa jâra Pathen hneng rathla a leh hnōmpek thei inthoina ṭōn razenna kha nantlo sik.

⁶ Ajârchu ṭong intheng in hinga ahri: “Ke’n hlung mankatam inkhat kakadei, khavakha Ziona rakir hlung kaman changa kada; khana tu achang inum ama kataksen kha a’nhōrna kōimak ning.”

⁷ Hiva hlung hi nangni akataksenhei sik a mankatamtak kae; tâk akataksenmak hei sik a chu: “Inn kasak he’n hnemna kasea antahlonsōt jo hlung kha apui karônpen kachang jo.”

⁸ Khana ṭong intheng hlop inkhat in ahri: “Mihei inpaina sik kha hlung hi kae, an-inpai inthlûkna sik kha hlungpui hi kae.” Anmani inpaihei ajârchu anmani’n ṭong kha taksen mak hei; anmani sik a khavakha Pathen lungdo kae.

⁹ Tâk-kha nangni chu kadeisōt phung, Rengpa thempu, a’ntheng jât, Pathen khet mi, Pathen ṭōntlo inlak kahrile sik a a’nthima inphut a vâr inlak a abeksōt jo chei kha kae.

¹⁰ Pha khat a nangni Pathen mi leichang mak chei, tâk tûnchu ami kachang jo chei; pha khat a nangni Pathen maritna leimanhret mak chei, tâk tûnchu amaritna chei kha nanchen joa kae.

Pathen Sōk-hei

¹¹ Kaṭhōn marit hei, hiva vânhnōia hin khōhme leh rekatlânhei hnenga kapōa kahei ngek chei. Ahei tik arathla kadōiṭhak taksa tamadu leh rangei heia khan inpek mak ruh.

¹² Limsyem inmuk he’n nangni ṭōnse nantlo tia anmaset chei pha, nanṭōn kaṭha tlo kha anmanhretsōt a, ama jōngna Kani ning Pathen anmanpâk theina sik, anmani kâra nan-omchen akaṭha sik kae.

¹³ Rōngpu jâra ratha kanei mihring rakip thōia om ruh: ratha kanei chunghnung Rengkalen Caesar thōia’m,

¹⁴ khana ama’n akaṭhamak katlohei karâkna sik a leh akaṭha katlohei choi ka-ânna sik a ram vaikarôn akadei hei thōia’m om ruh.

¹⁵ Mikamo he’n hei manhret loa anhrina kha, nanṭōn kaṭha tlo vâng nantamandai sik hi Pathen in amadu chei.

¹⁶ Ning leh hnōma aka-om hei kapōa om ruh; nanning nanhnōma nan-om kha ṭhatmak heikhat makhuna sik manchang mak ruh, tâk Pathen sōk kapōa om ruh.

¹⁷ Mi rakip kaja hei ruh, akataksen nanta’nloipui hei lungset ruh, Pathen kaja ruh, Rengkalen Caesar kha’m kaja ruh.

Christa Khōdengthei Tekhing

¹⁸ Sōk nangni, nankapu hei thōia a’npek inhlut nger sik chei kae, pui katluk a nankajana hei malâr ruh, lungset a nankarôn leh a’ndonthei hei rōk kha changloa, nun kasehei kha’m kaja hei ruh.

¹⁹ Nangni’m ama lungdo kha nanmanhret jâra, rahōi kasōkmak khōdeng theina nantathōk achang inchu, Pathen in khava sik a mahâmṭhat apek sik chei.

²⁰ Ajârchu nangni ṭōn kadikmak nantlo jâra rahōi kasōk vōkna nanden a kha heimo ahnemna ka-om? Tâk-kha ṭōn kadik nantlo pha, khōdeng theina nandea achang inchu khava sik a khan nangni Pathen in mahâmṭhatna apek sik chei kae.

²¹ Khava sik jâra nangni Pathen in abek chei kae, ajârchu Christa khet um nangni sik a inrengna kha athōk a khana akebi kha nanjui theina sik inchûnathei man enna inkhat a adahlon pek chei kae.

²² Ama’n setna neimak; abeisōa maleisei ahrina tûte’n theiphung hêrmak.

²³ Mi’n inzakna anpek pha ama’n tûte manzak male mak, inrengna ade pha mi maṭhitna neimak, tâk ṭongtan kadikpa Pathen chunga inhōrṭhak a ka-om.

²⁴ Eini hi setna shunga nithi theina sik khana akadik a nihring theina sik Christa amatak in nisetnahei kha ataksa chunga thingrakea arôn pek me kae. Asungbi rôn vâng khan nangni amandam jo chei kae.

²⁵ Nangni kemōng hlam invai kapō chei kae, achang ravâng tûnchu kemōng kakhempa nanrathla kahrungpa kahnung kajui sik a aheiṭhōi male jo cheia kae.