PETER INKHATNA 1 - LEKHARABU INTHENG (BSI)

¹ Jesu Christa sonle Peter a inphut, Pontus, Galatia, Kappadocia, Asia leh Bithynia ramheia rekatlâna a’nchek chaia ka-om Pathen takadei mihei hnenga.

² Ṭong kajui sik leh athisen vâng sukmantheng sik cheia alungdotak a nangni akadei jo chei kae khana arathla vâng mi intheng amanchang jo chei kae. Maritna leh lung mōngna kha pui katluk a nanta chang rasoh.

Inhōrna Akahring Inkhat

³ Eini’n ni-Rōngpu Jesu Christa Pa leh Pathen kha inpâkna pek rih! Ama maritna me jâra Jesu Christa thina inphut akei mathōina vâng khan eini hringkhōther apek jo me. Hivahin akahring inhōrna kha apek mansip me,

⁴ khava jâra Pathen in amihei sik mahâmṭhatna hingja ada kha nichenna sik nihma ting ni-en kae. Khahei kha anṭōi makna, an-inṭhet makna, an-invōi makna ram marvâna nangni sik a adapek chei.

⁵ Khahei kha, pha inchai ning malâr sik a a’ntluk hukmanhringna kha akachen sik a Pathen rathla’n nantaksenna jâra ahrunga ada jo chei nangnihei sik a kae.

⁶ Tûnhin pha bongkhat enmansinna katamtak nande manrim jâra nanchunga inrengna kha alaka-om nger sik achang inum, khava sik a khan inpâk ruh.

⁷ Khavahei mandonna khachu nantaksenna kadik kha mandangna sik a kae. A’nsetthei sana kha hmen hmei vâng enmansinna ka-om; sana kanek a mankatam nantaksenna khachu akasôt a-omtheina sik a enmansin nger sik kae. Khava sōa Jesu Christa ajo’nlâr Kani ning khan manpâkna leh lûrna khana kajana nangni’n natachen sik kae.

⁸ Nangni’m ama nanhmu mak ravâng nanlungset, khana tûn ama nanhmu mak ravâng nantaksena kae, khava jâra hritheilo leoa kalen leh kalûrtak a inpâk chei,

⁹ ajârchu nangni’n ama nantaksenna hlopen, nanrathla hukmanhringna kha nanchen jo.

¹⁰ Hiva hukmanhring chungchânga hin sânkathem he’n insing theitak a anta leijonga anta lei-ensui kae, khana hiva Pathen tapek sik chei mahâmṭhatna hi anmani’n anta leisânsōt kae.

¹¹ Anmani’n apha kha heitik, khana heikhonga ajōng katlung sik kha jongsōtna sik le’nṭang hei. Christa Rathla anshunga aka-om khan aleikhing pek hei, Christa’n inrim ade sik leh abâna alûrna sik hridekna kha hiva pha hi kae.

¹² Khava sânkathemhei ṭōntlo kha anbing hnemna sik changmak, tâk nangnihei hnemna sik a kae tia Pathen in anhnenga aleiphông pek hei. Khahei chungchânga anmani’n anta leihri kha tûn nangni’n marvâna inphut ajō’ntir Rathla Intheng ratha hratna vâng, Ṭong kaṭha kaphông tlângva heia inphut nanthei jo. Hiva ṭong hi ngevahei kapha’num antamanhret hnōm kae.

Hringkhō Inthenga Hringna sik Bekna

¹³ Khava jâra ṭōn katlo sik a nanmalunga intluk ruh. Insing thei ruh khana Jesu Christa ajo’nlâr pha pek sik chei mahâmṭhatna chunga inhōrna pui katluk a nei ruh.

¹⁴ Pathen ṭong jui ruh, khana hei-inhret mak nanchanglaia madu rangeina khan nanhringkhō aṭhōi sik chei kha hnōm mak ruh.

¹⁵ Khava kanek a chu, nankabekpa a’ntheng kapōa nantlona rakip a intheng ruh.

¹⁶ Ṭong intheng in ahri, “Intheng ruh ajârchu Kei intheng eng.”

¹⁷ Mi rakip ama ama ṭōntlo dungjuia in-angtlinga ṭongkatan Pathen hneng nander pha, Apa nantia kae; kha achang inchu, nanhringkhō alaka-om seng hichu ama kajana hmang jo ruh.

¹⁸ Ajârchu nanpusōn heia inphut hringkhō kahnemmak nantahong chen a inphut, ning leh hnōma masōna apek chei kha nangni’n nanmanhret; khavakha a’nhmangthei sana leh dangka kapō kha changmak;

¹⁹ khavakha masetna kase leh nōrna kase kemōngte inkhat kapō, mankatamtak Christa inpek sōtna kha kae.

²⁰ Vânhnōi insyem mak hma inphut Pathen in ama alei kadeisōt jo, khana kani hnung intonga hin nangni sik a amalârsōt jo kae.

²¹ Akathia inphut akei mathōia lûrna apek ama inphut nangni’n Pathen kha nantaksen; khava jâra nangni taksenna leh nan-inhōrna kha Pathen chunga a’nphun inhnet kae.

²² Khava jâra tûnchu aṭong nanjui jâra nanbinga insuk intheng jo chei, khana akataksen loihei chunga inthengtak a lungsetna nannei jo; nanmalung pumpuia lumlotak a khat leh khat inlungset jo ruh.

²³ Ajârchu akathithei kachangmak, akathi hêrmak Pa inkhat sahei kapōa, kumleikōa Pathen ṭong kahring ṭhak vâng a’ntether jo chei kae.

²⁴ Ṭong intheng in hing’hin ahri: “Mi rakip kahar kapō hei kae, Khana anlûrna rakip kha’m ram a reipâr kapō hei kae. Kahar kha kachâr ri, khana reipâr kha kaṭōi ria kae,

²⁵ tâk Rōngpu ṭong khachu ahei tik a ka-om ṭhak.” Hiva ṭong hi nanhnenga a’nhri inthang jo Ṭong kaṭha kha kae.