PETER INHNINA 2 - LEKHARABU INTHENG (BSI)

Mi’nthei Kadikmak hei

¹ Hmalai mihei kâra sânkathem kadikmak le’nlâr hei, khava leh in-anghrep a mi’nthei kadikmak hei nankâra ahong inlâr sik hei kae. Anmani’n ankahuk ankapu kha hnōm mak heia, khana insena kadikmak insuk-inpaina anheirônsōt sik, khana manhret manloa anbinga insuk inhmangna antamasō sik kae.

² Kha achang inum, mi katamtak in an-omchen kadikmak kahnung antajui sik kae; khana anmani ṭōntlo jâra akadik hlam kha mihe’n antahri maset sik kae.

³ Khava mi’nthei kadikmak hei phâmraiset jâra semsōt thuhming antahrina inphut hnemna anjong sik. Aheitik a sik a tûnchu anṭong Katanpa kha intluk jo, khana Ankasuk inhmangpa kha kathōisōt jo.

⁴ Marvân ngeva akaset hei kha, Pathen in ṭhensōt mak hei, tâk Ṭongtan Ning kani kahngâk a anmani kha thirhrui vâng akhit heia, khō inthim hmun khurkōk a ahlon manhlut sik heia kae.

⁵ Raleichung marō kha Pathen in ṭhensōt mak, tâk raleichunga bek-ôi kaneimak hei chunga tuishâng amanlen; ahuksōt hei khachu akadik kahrile Noah leh mi 7 hei rōk kae.

⁶ Pathen in Sodom leh Gomorrah khōpuihei kha maset amanchen a, hmei vâng asuk manhmang hei, khana bek-ôi kaneimak hei chunga heimo ajōng katlung sik man enna hei kha aleitlo heia kae.

⁷ Ama’n dân kaneimak hei jông leh kîk omchen taleisuk manrim mikaṭha, Lot khachu ahuksōt.

⁸ Khava mikaṭha ankâra aka-om khan ani tina akaṭhamak tlosōtna ṭong athei leh ahmu hei chunga malung inrimna aneia kae.

⁹ Khava jâra Pathena ka-om mihei kha mathlemna inphut Rōngpu’n anhûksōtje amanhret khana mikaṭhamak-hei kha’m Ṭongtan Ning ankarâkje amanhret,

¹⁰ kakhôk chet a khava akabōk antaksa maduna kajuihei leh Pathen ratha neina kahnōise hei chunga. Oja kadikmak hei kha inlensak hei khana anracham kase, khana chungtinga akalûr hei kha kajana heite pek mak hei; khava kanek a, inzakna anpek jôk heia kae.

¹¹ Oja kadikmak hei kanek a akalen leh akahrat chet marvân ngevahei khan hmen Rōngpu hmaikunga anmani kha manzakna sik masetna pek mak hei.

¹² Hiva mihei hin avângphông mandonna vâng ṭōn antlo, ramsha kapōa sur heia that sik hrep a a’ntet hei kae; antamanhret phâk hêrmak hei kha anmanuisō heia kae. Ramshahei kapōa suk manhmang sik hei kae,

¹³ anmani’n inrimna antamasō kapōa suk manrim sik hei kae. Antaksa tamadu mankhopna sik a sûn kanivâr thōia heirakip antatlo kha anhōina kae; pha rakip a mihōn mathlâkna langting anhōi lai, nanthlai sâkna kâra anhong invei kha inzakna leh hmesetna kae.

¹⁴ Anmani’n nuhmei omchen kaṭhamak-hei tei loa alak heite enhnōm mak hei; setna sik antarangei kha chimtor hêrmak hei. Anmani’n mi katlâksam hei kha châng shunga anṭhōi manhlut hei. Anmalunga phâmraiset inthemchûk hei. Anmani Pathen hâksêrna thōia ka-om hei!

¹⁵ Anmani’n hlam kadik kha andahlona anhlam invai jo hei; ṭōn kadikmak tloa sêr rahlâng sik indu Beor sapa Balaam tahro hlam kha anjui jo,

¹⁶ aset jâra antaraseipa kha kae. Asakōrtung khan mihring karesōa kaṭongsōt a khana sânkathem invet ṭōntlo kha akhâma kae.

¹⁷ Hinghiva mihei hi tuihnâr kachâr kapō, thlipui tatlen sumtuk kapō hei kae; anmani sik Pathen in khō inthimna hmun inkhat adapek hei.

¹⁸ Anmani’n inlensaktak a invet ṭong anhri, hringkhō kadikmak a ka-om mihei kâra inphut ahei kasōklim hei kha anchânga man-ôkna sik taksa hur leh êmna anhmanga kae.

¹⁹ Anmani khet um insuk inhmangna omchen sōk anchang lai khan, mihei kha ning leh hnōma omna sik intepna anneipek hei, ajârchu mi inkhat hi heikhat tator jo achang inchu khava akatorpa sōk akachang jo kae.

²⁰ Ajârchu ni-Rōngpu Jesu Christa manhretna jâra, raleichunga rumhrat ṭōn kadikmak heia inphut ahei kasōk jo mihei kha hnunga ṭhatmakna hei kha’n asur nôk heia ator nôk he’nchu, ahma inkeia an-omchen kanek a achaina akasechet kachang heia kae.

²¹ Anmani’n akadik hlam kha anmanhret sōa ṭongpek inthenga inphut an-inhesōt nôk sik kanek a antamanhret hêrmak sik kha akaṭha jôk kae.

²² Anchunga omchen kasōk ṭongchîk-hei hi kadik ti amalâr: “Ui in amalōksōt asâk nôk” khana “Vok rasi manthengsa khan dôp a inbe nôk,” inti hi akadik kae.