OBADIAH 1 - LEKHARABU INTHENG (BSI)

¹ Edom jât chungchânga Akahrat Chunghnung Rōngpu ṭonghri, Obadiah ṭong sânsōt kha hi kae. Rōngpu’n jât-hei hneng aṭong karôn atir jo hei, khana keini’n aṭong hi kanthei jo: “Inrin ruh! Edom re kasō sik a se jo rih!”

Rōngpu ’n Edom akarâk sik

² Rōngpu’n Edom hnenga ati, “Ke’n kaman tlâksam sik che; mi rakip in anhnōise sik che.

³ Na’nlensak na’n ahōn jo che. Nakhōpui chu hlungpui rekur kae; na-inn chu tlâng chung heia inshânga ka-om, khava jâra nabinga nati, ‘Tu’n mo akei mathlâk tornâk sik eng?’

⁴ Nang in na-inn kha mârhmu rabu kapōa inshângtak a nasak inum, ârsihei kâra aka-om a-ang jo’num, kakei mathlâk sik che kae.

⁵ “Inru he’n jân a anhong pha, antamadu rōk kha anloa kae. Mihe’n vomhrui thei anṭhōt pha, ajing chu andahlon ṭhak ri. Tâk nang chu inrepui he’n anchomsōt pet jo che.

⁶ Esau sōn leh pârhei, nankarōi manbuk anchom pek jo chei.

⁷ Nasap changpui he’n anhōn jo che; narama inphut anhnongsōt jo che. Kamōnga nanta-ompui mihei khan naram anlopek jo che. Bu nasâkpui naṭhōn he’n châng ankampek jo che; anmani’n, ‘Asing athemna seng kha khon mo ka-om jo?’ anti che.

⁸ “Edom kakarâk ning khan anmi kasing kathemhei kha kathat manram sik hei khana ansingna rakip kha kaman hmangpet sik.

⁹ Teman a re katuk mihei kha ṭit-inpirna kamanhmu sik hei, Edoma remi rakip that sik hei kae.

Edom Karâk sik Ajâr

¹⁰ “Ajârchu nang in nasōpuihei, nachom hei khana nathat hei nang that manram sik che kae khana ahei tik a kajana pek mak sik che kae.

¹¹ A-inrepui he’n asōngkot anvōkkhōi ning khan khava hnengtak a khan heikangir che. Jerusalem nei leh hao akarôn sōt hei khana anmani kâra insemna kaneihei khava khōhmehei kapōhrep a khan nang um ṭhamak che.

¹² Nasōpui Judah vângsetna chunga khan na-ê namanjo mak sik kae. Anmani suk inhmang ning khan ningṭhatna naneimak sik kae. Anmani inhmangna chunga khan naleimanuisō mak sik hei kae.

¹³ Anmani inreng ning khan ankhōdengthei chunga na-ê manjona sik a khana annei anhao chomsōtna sik a kamihei khōpui kha aleikahlut mak sik che kae.

¹⁴ Tlânsōtna sik a’nrei hei kasur sik a hlamsōa aleikangir mak sik che kae. Anmani inreng ning khan inrepuihei kut chunga naleipek sōt mak sik hei kae.

Pathen in Jât-hei chunga Ṭong atan sik

¹⁵ “Rōngpu ke’n jât rakip chunga ṭong katan sik kani kha hong kanai jo. Eh Edom, naleitlo kapōhrep kha nachunga a’ntlo nôk sik kae. Naleipek hei kha nachen male sik.

¹⁶ Kami he’n katlâng intheng chunga karâkna kōklei akakha kha an-in jo. Tâk akimvea ka-om jât rakip in hiva kanek a akakhadet karâkna kōklei an-in sik; anmani’n an-insō sik khana inhmangpet sik hei.

Israelhei Retorna

¹⁷ “Tâk-kha Zion Tlânga mi ṭhahrep chu katlânsōt sik hei, khavakha hmun intheng akachang sik kae. Antaneidôr kasōk ram kha Jacob mihe’n anlachen sik.

¹⁸ Jacob leh Joseph mihei kha hmei ka-ang sik hei; Hmei in neinâk kaṭhamak akâng manvâm kapōa Esau mihei kha anthat maram sik hei. Esau sōn leh pâr inkhatbek hringmak hei ning. Rōngpu ke’n kahri jo.

¹⁹ “Thlang tinga Judah mihe’n Edom anhlō sik; tlaitlâk tinga hmebung thōia mihe’n Philisti ansur sik; Israel in Ephraim leh Samaria anchen sik; Benjamin mihe’n Gilead anhlō sik.

²⁰ Israel sak tinga ka-om miram a hnongsōt remihei kha ho’nle sik heia kha Phoenicia khana sak tinga Zarephath katlung rea antor sik hei. Jerusalema hnongsōt hei Sardis a ka-om hei khan thlang tinga Judah khōpuihei anhlō sik.

²¹ Jerusalema re kahrâng he’n Edom anbuhlu sik khana anchunga vai arôn sik. Khana Rōngpu khet in Reng kachang sik.”