NEHEMIAH 9 - LEKHARABU INTHENG (BSI)

Mipui he’n Ansetna Antahrisōt

^1-2 Khava thla mama a ni 24 tluk ning Israel mipuihei kha anset jâra malung inrim malârna buhngōina sik a le’ntûp hei. Anmani kha ram hlop mihei seng leh inṭhendek jo hei. Anmani’n inrimna malârna inkhat a borapōn ansia anlua ravut anleiphi. Khava sōa anmani kangir heia anmani leh anpu anpa he’n anta leitlo setnahei kha anhrisōt manphut jo.

³ Pung 3 kapō hi anhnenga an-Rōngpu Pathen dân kha anleitei pek hei, khana abâna pung 3 khan ansetna anleihrisōt khana an-Rōngpu Pathen kha anleikamuk a kae.

⁴ Levihei sik a dokhâng inkhat leika-om, khava chunga khan Jeshua, Bani, Kadmiel, Shebaniah, Bunni, Sherebiah, Bani khana Chenani hei kha leikangir hei. An-Rōngpu Pathen hneng anmani’n rasa kasōk a anleider.

⁵ Athōia Levihei hin Pathen kamukna sik a bekna anleinei hei: Jeshua, Kadmiel, Bani, Hashabneia, Sherebiah, Hodiah, Shebaniah khana Pethahiah hei seng. Anmani’n anti: “Ngir una Rōngpu nan-Pathen kha manpâk ruh; Ahei tik a, ahei tik chenna ama kha manpâk ruh! Mihring manpâkna hi pui atluk mak innum mi rakip in ama rahming kalûr kha manpâk hei rasoh.”

Set Phôngsōtna Derna

⁶ Khava sōa Israel mipui he’n hiva derna hi anleider: “Rōngpu nang, nang rōk Rōngpu che; marvâna ârsihei leh nang in marvânhei khana bōirōk a ârsihei nasyem hei. Nang in ralei leh tuipui khana ashunga aka-om rakip nasyem hei; nang in ankhenga hringna kha napek hei. Marvân ratha kanei he’n inkun heia nang ankamuk che.

⁷ Rōngpu Pathen nang in Abram kha nakadeisōt, khana Babylona Ur a inphut nakeisōt; nang in arahming kha Abraham tia naleithleng.

⁸ Ama kha ṭong kajui inkhat achang kha nahmu sōt, khana ama leh ṭong intepna inkhat naleinei. Canaanhei ram, Hit leh Amorhei ram Periz hei, Jebush-hei khana Girgash hei ram kha ama sōn leh pârhei omna ram akachang sik a, ahnenga pek sik a le’ntep che. Nang in naṭongtep kha najui, ajârchu nang chu taksenthei che kae.

⁹ “Kanpu kanpa he’n Egypt a heituk mo khōdeng anta leithei ti nang in nahmu; Tuipui Kasen a inṭangpuina sik a anbekna che kha naleithei.

¹⁰ Nang in aram shung rengpa leh vaikarônhei leh mipui dōina sik a nang in ṭōn-inlak naleitlo hei, ajârchu anmani’n heituk-hrep a mo namihei kha anta-ôt hei ti nang in namanhret a kae. Khana tuning katlunga rahming ṭhatna nachen kha laka-om ṭhak a kae.

¹¹ Namihei sik a tuipui shunga hlam naleisyem, khana ramchâr kapōa anhlam naleiṭhōi hei. Anmani ankahnong hei kha tui inthûk shunga, hlung inkhat tuipui shunga a’nphûm kapōa inphûm jo hei.

¹² Sûna sumtuk vâng naleiṭhōi hei, khana jân a anhlam kha hmei vâng namanvâr pek hei.

¹³ Marvâna inphut Sinai Tlânga jōng kaṭum che; namihei hneng ṭong naleihri khana dân kaṭhahei leh ṭongpek kaṭhahei naleipek hei.

¹⁴ Nachâm hngatna kani kha inthengtak a anserna sik namanthei hei, nasōkpa Moses hnenga nadânhei kha napek heia kae.

¹⁵ “Anvon aṭâm pha, marvâna inphut buhlom napek hei, khana antui ahre pha hlungpuia inphut tui namansōk pek hei. Nang in anhnenga pek sik a na’ntepna ram kha an-inkimna sik a namanthei hei.

¹⁶ Tâk-kha kanpu sōnhei kha inlensak hei khana anrahe kase, khana naṭong jui sik hnōm mak hei.

¹⁷ Anmani’n naṭong juihnōm mak hei; naṭōn leitlo rakip anmahngi jo; ṭōn-inlak naleitlo hei kha anmahngi jo. Anmani inlensak pum a anhlam kakei inkhat ankadei Egypt a sōk changna ankaṭhōi inle sik a. Tâk-kha nang chu rangei indam Pathen che kae; nang chu marit leh lungset kathem che, hnuknat beimak che. Nang lungsetna hi kalen; nang in hlonsōt mak hei che.

¹⁸ Anmani’n sehratche kapō lim inkhat anleisyem khana Egypt a inphut anhei kaṭhōi kha hiva Pathen hi kae anti! Heituk a inzakna antapek jo che mo!

¹⁹ Tâk-kha nang in nêrdiram a khan dahlon mak hei che, ajârchu nalungset hi kalen, sûn leh jân a anhlam hmutheina sumtuk leh hmei kha losōtpek mak hei che.

²⁰ Nang naṭhat jâra heimo antatlo sik kha namanthei hei; manna vânga navei hei, khana tui in sik napek hei.

²¹ Nêrdiram kâra kum 40 hi antarangei rakip naleipek hei; anpōn ander leichijen mak, anke hei kha inthlinga leina hêrmak.

²² Anramria ka-om ramhei kha nang in jât leh rengramhei kha namantor hei. Sihon in vai arônna Heshbon ram, Og reng changna Bashan ram kha anmani’n anhlō heia kae.

²³ Marvâna ârsi jahrep ansa annai napek hei, khana anpu anpahei hneng pek sik a naleitep ram kha namanhlō heia naman om heia kae.

²⁴ Anmani’n Canaan ram kha anleilo; khana aka-om mipuihei kha nang in naleitor heia kae. Canaan mihei leh renghei chunga anmani antamadu ratha neina kha napek hei.

²⁵ Namipui he’n rekur tukkhum khōpuihei, ram ṭhatna hei, karōi kasip innhei, antakhōrsa tuikhurhei, Olive kunghei, theikung hei leh vomhrui rahōnhei kha anhlō hei. Antamadu chenna ansâk a katur jo hei; nang in neinâk kaṭha napek hei seng kahōia anhmang jo.

²⁶ “Tâk-kha namihei khan inphin heia naṭong juimak hei; nadân a khan anmani’n hnung ansungsi jo. Nang hnengting anlei inhena sik a gîkna kanei sânkathemhei kha anmani’n anleithat hei. Pha khakhat leh nang kha inzakna anleipek che,

²⁷ khava jâra anmani inrepui he’n namantor heia anchunga vai namanrôn hei. Anmani inreng pha inthōpuina sik a anbek che, nang in marvâna inphut najōng masôn hei. Nalungset alen jâra anmani inrepui heia inphut ankahuk sik a hlamkakei naleitir pek hei.

²⁸ Lung mōngna kha anchen nôk pha, anmani’n setna anleitlo nôk a kae, khana an-inrepuihei kha namantor nôk hei. Kha’num anmani’n an-insir phat a anmani hukna sik a anleider che pha nang in marvâna naleithei pek hei, khana pha khakhat leh, nalungset kalen vâng khan nalei huksōt hei.

²⁹ Nang mantheina hei kha anjuina sik a gîkna napek hei, nadân jui sik kha hringna hlam achangjen ravâng, inlensaktak a nadânhei kha anhlonsōt hei. Anrahê kasea naṭong rangei mak hei.

³⁰ Akum akum a nang in detheitak a anmani nalei gîk hei. Nasânkathemhei khan ṭong anhrina sik a hlimna napek hei, tâk-kha namihei kha ankōr kaset, khava jâra jât-hlop hei kha namantor heia kae.

³¹ Kha’num, nang lungsetna alen jâra, anmani hlonsōt mak hei che khana manhmang mak hei che. Nang hi lungset leh maritna kasip Pathen che kae!

³² “Eh Pathen, kan-Pathen, heituk a akalen che mo! heituk a ṭit aka-om leh ratha kahrat jo che mo! Naṭong sekamna kha taksen theitak a nanit a kae. Assyria reng he’n keini anlei-ôt ung pha inphut tûn katlung um, keini heituk a khōdeng kantathei jo mo! Kanrenghei, kanhlam kakeihei, kanthempu hei leh sânkathemhei, kanpu kanpahei leh kanmipui rakip khōdeng kanthei jo. Keini heituk a khōdeng kantathei jo mo amandonsōt pek roh!

³³ Keini karâkna pekna sik a akadik kha natlo jo; keini kanset jo tâk inum nang chu taksenthei kachang che.

³⁴ Kanpu kanpahei, kanrenghei, kanhlam kakeihei leh thempu he’n nadân hngâk mak jo hei. Anmani’n naṭongpek leh nagîkna hei kha rangei mak hei.

³⁵ Nang vângpekna leh inṭhōia, reng he’n namihei vai anrôn hei nang in naleipek hei akalen akaṭha ram a khan anleiom pha; tâk-kha anmani setna inphut he’nle mak hei, nang arazen mak hei che.

³⁶ Tûnchu keini napek ung ram shunga sōk kachang jo ung, sâk leh in anikape ram kaṭha shunga hin.

³⁷ Keini kanset jâra ram kara nei seng kha keini chunga namaṭung, renghei hnenga kase sō. Anmani’n keini hneng leh kanranhei chunga antatlo hnōmhnōm antlo, khana keini inreng hêr unga kae!”

Mipui he’n Inhnōmna Antamazet

³⁸ Ṭōn kasōk hei jâra hin Israel sa keini’n hinahin kalûrtak a inhnōmtōna mazetna inkhat kansyema kae, khana kanhlam kakeihei, kan-Levihei khana kanthempu he’n khava chunga mêrchîkna annam khuma kae.