NEHEMIAH 8 - LEKHARABU INTHENG (BSI)

Ezra in Mipui hnenga Dân Atei pek hei

¹ Thla 7 tlukna khan Israelhei kha ankhōpui et a khō anleisât jo. Khava thla ahma inkeipen kani ning anmani Jerusalema, Tui Kekot telaia anmani le’ntûp hei. Anmani’n Ezra thempu leh lekha kathemhei hnenga, Israelhei sik a Rōngpu’n Moses hnenga aleipek Dânrabu kha avalôna sik a anleider.

² Ezra khan pase, nuhmei, naipang ṭong kalothei sik a katluk a akalen jo mipuihei intûpna hmun a khan Ezra’n ahei choi pek jo hei.

³ Kekot hnenga telaia khan khōvâra inphut sûn katlung dân kha ama’n atei pek hei, khana ankhenga malung kahluttak a anrangeia kae.

⁴ Khava rōi sik a anta leisyem thing dokhâng chunga Ezra kha kangir. Athōia mihei hi ama changting kangir hei: Mattithiah, Shema, Anaiah, Uriah, Hilkiah khana Maaseiah hei seng; khana athōia hei hi aveiting kangir hei: Pedaiah, Mishael, Malchijah, Hashum, Hashbaddanah, Zechariah khana Meshullam hei seng.

⁵ Ezra’n mipuihei kanek a inshângdet a dokhâng chunga angirlai ankhenga ama anlei en. Ama’n lekha kha amahlang lim leh anmani ankhenga kangirsōt hei.

⁶ Ezra’n ati, “Rōngpu akalen Pathen kha manpâk ruh!” Mipui seng khan anbân ankadom manshânga anleimasôn, “Amen, Amen!” anti. Anhmai ralei anhnget a anmarkhup anthlep a kae.

⁷ Khava sōa anmani katho heia khana anhmun et a kangir hei, khana athōia Levihei hin anhnenga dân kha anhri manchên pek hei: Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan khana Pelaiah hei seng.

⁸ Mipuihei khan anmanhret theina sik a anmani’n Pathen Dân kha anbeia anmalesōt a anhri manchên pek heia kae.

⁹ Dân khan heimo arangei ti kha anmani’n anthei pha, anmalung atôn joa ṭap anleiphut jo. Khava jâra ram vaikarônpa Nehemiah, thempu leh Dân kathem Ezra, Dân kahri inchên Levihei hin mipuihei anmanthei jo hei, “Hiva kani hi Rōngpu nan-Pathen sik a a’ntheng kae, khava jâra nangni ṭajaisui leh ṭapna nantanei mak sik kae.

¹⁰ Tûn nan-inna se una sâklôm tlo ruh. Sâk katluk a akaneimak mihei kha sempek hei ruh. Tuning hi ni-Rōngpu sik a a’ntheng kae, khava jâra nanmalung manchâm mak ruh. Rōngpu tapek chei ningṭhatna khan nangni amanhrat sik chei.”

¹¹ Levihei khan kase lele heia khava kapō kani intheng ning khan mipui malung anchâm makna sik a anmanthei hei.

¹² Khava jâra mi rakip inna kase heia ningṭhat pum a ansâk an-ina mi ralak-hei leh antanei kha insem heia kae, ajârchu anhnenga antatei pek hei kha anmanhret joa kae.

Rabuk Kût

¹³ Abâna kani ning khan phungṭhen hlamkakeihei khan thempuhei Levihei leh inṭhōia Dân inthemchûk sik a Ezra hneng leikase hei.

¹⁴ Rabuk Kût shung senga mipuihei kha in-ungna rabuk shunga pha bongkhat an-omna sik a ṭong kapek, Moses hnenga Rōngpu’n aleipek Dân kha anleihmusōt jo.

¹⁵ Khava jâra anmani’n athōia mansenahei hi anleipek heia anmani kha Jerusalem leh alak khōpui leh khōte heia anleitir jo hei: “Tlânga son vase ruh khana Dân a a’nzet mantheina dungjuia in-ungna rabuk hei sakna sik a hmeila, olive, mairtel, kahno, khana thingkung ralak-hei bâk-hei kha valo una in-ungna sik rabuk insak ruh.”

¹⁶ Khava jâra mipuihei khan thing bâk-hei kha anleichoia an-inn phuchunga, antelaia, Bek-inn sumpuk a, khana Tui Kekot leh Ephraim Kekot hnenga mipui tetlânga rabuk anleisak hei.

¹⁷ Sura inphut ahong inle hei seng khan in-ungna rabuk hei ansak a ashunga leika-om hei. Khavakha Nun sapa Joshua pha a inphut ahma inkeipen tlona leikachang khana mi rakip malung mathokna anneia le’npâk hei.

¹⁸ Revei a’nphut ninga inphut a’nchai ning katlunga anmani’n Pathen Dân kha ani tina ṭhen khat sâm anleitei. Anmani ni 7 rehōi anleitlo, khana ni 8 tluk ning khan Dân dungjuia achaina nitna inkhat le’ntloa kae.